2019-01-20

5.6K

【10 Years Challenge】我與歲月間的第三者

呢幾日人人都搵返啲舊相出嚟,對比自己十年間嘅變化;講到要搵舊相,以前可能有啲難度,但今時今日,有網上平台嘅你,要搵張相,簡直毫無難度!至於呢個方便...... 確實令人又愛又恨,有時佢自己彈出嚟嘅動態回顧,更加係不堪入目。

講返睇舊相,望住自己同身邊人嘅面容轉變,其實最大變化嘅就係依家廿幾歲嘅新一代,講到自己,呢啲數埋都3字頭嘅80後,其實10年前個樣都大定晒啦,基本外表上,除咗多咗兩條眼紋,真係變化不大,反而係心態同身份,就真係坐上咗璀璨又刺激嘅過山車!

由初出茅蘆,到做咗人阿媽,經歷會教曉你好多事情,咁啱今日就喺抗癌少女李明蔚專頁上睇到呢句說話:「曾經太過堅強,但原來這是逞強,其實只會讓自己很累!有朋友提醒了我,其實你是可以脆弱的!」,的確做人係需要有脆弱嘅時候,就係要脆弱過先識得點樣堅強!

而呢個思維模式,有時我都會套用喺同阿仔「講耶穌」方面,例如:你絕對可以有情緒,可以唔開心,甚至可以發脾氣,但大前題係唔可以傷害別人,更加唔可以傷害自己!講到尾,做人唔係下下要做到100分嘅!

數數手指,下個十年阿仔將會係十二歲,到時感受應該更深!

【編按:以上內容為作者之個人意見及立場】

相關文章

緊貼新冠肺炎最新相關資訊