2019-11-15

519

小朋友帶給父母6個歡樂的理由

好多年前有廣告話養大一個小朋友要400萬。今時今日,計埋通漲可能使多一倍錢都未得!討論區有唔少家長都講生小朋友使錢使到倒水咁、放假節目就係帶小朋友上興趣班、me time變咗homework time、兩公婆拍拖嘅機會都冇……生小朋友真係咁「地獄」?其實有好多歡樂,係生咗小朋友先體會到!

討論區熱話:我終於明白點解依家香港好多人唔生仔呀!


1. 再次經歷童年

你幾耐冇玩滑梯?行過公園見到韆鞦、搖搖板會唔會有個衝動想去搖返幾下?攤位遊戲嘅小手工活動似乎好有趣,好想大顯身手?自從大個咗之後,就要收起童心,展示成熟嘅一面,免得畀人話係「大唔透」。其實童心人人都有,偶然放鬆下真係好開心!帶住小朋友就可以大條道理去公園玩,教踩單車之餘自己都趁機兜幾個圈,真係好爽呢!

2. 夫妻有共同話題
自從結婚後,兩公婆日夜相見,拍拖時嘅新鮮感、浪漫、激情,都漸漸變成感情,生活平淡,除咗講下睇咩戲、去邊食飯之外,仲有咩話題?生咗小朋友之後,換片、戒奶、食飯、報興趣班,甚至連去poopoo順唔順暢都係可以講一大餐,日日新鮮,唔愁無話題。

3. 人生變得更充實
自從做咗爸媽之後,小朋友就成為咗人生寄託,為嘅要做小朋友的榜樣,有啲爸媽會戒/減少不良嗜好,例如戒煙酒、戒夜蒲、戒講粗口等等,雖然過程好辛苦,但換來了自己同小朋友健康的身體,得到更多親子時間,能夠見證小朋友第一個微笑、第一次站起身、第一次叫「爸爸」、「媽媽」,就一切都值得。爸媽喺小朋友一歲時忙戒奶樽;兩歲時忙戒尿片;三歲時忙上幼稚園……總之資有了小朋友之後,保證每日都有新挑戰、新問題、新事情要處理,生活過得非常實在!

4. 知識與時並進
現今世代生活完全唔同,細細個我哋可能想學樂器、學游水、參加足球隊,都未必有機會;而家啲小朋友玩「STEAM」、學寫電腦程式、設計機械人,佢哋嘅興趣同能力真係令人意想不到!有時為咗可以同小朋友搭得上嘴,都要學習新知識,做個與時並進嘅潮爸、潮媽!

5. 有就成感

長大之後,想要得到讚賞並唔容易,當人哋讚自己小朋友,就會覺得好自豪、好有成就感,就算小朋友只係「夠膽自己跳落水」咁簡單嘅事,都可以開心幾日,不停咁同親戚朋友講,真正以子為榮!另一方面,小朋友有咩事做唔到,都會搵爸媽幫手,因為佢地眼中,爸媽係偶像、無所不能嘅超人,諗到呢點真係令人好有就成感、好威架!

6. 擴闊社交圈子
自從踏入社會之後,生活圈子似乎就只得同事、屋企人、舊同學,如果有信仰嘅話,可能仲會有教友。做咗爸媽,就自然加入唔同嘅媽媽谷、學校家長谷,一齊講兒女經,唔愁無共同話題,認識來自五湖四海嘅家長,偶爾搞下家長聚會,社交圈子擴闊唔少呢!

總之針無兩頭利,生唔生小朋友,都有唔同嘅生活同快樂活!

【編按:以上內容為作者之個人意見及立場】

相關文章

多穿橙色衣物 響應「消除對婦女的暴力行為國際日」

3大類另一半常見壞習慣,有冇你份?

「親子」功課,咪即係媽媽做功課~!

老公唔做家務像大細路 竟成媽媽最大壓力來源?