2018-12-20

2.8K

小朋友開Party,煩嘅係媽咪!打扮、整小食仲要應付奄尖家長

細路仔一年喺學校有唔少節目,萬聖節、聖誕節、國際日乜乜物物。唔單止要諗點打扮,有時仲要整埋小食。最怕家長group入面出現奄尖高要求人士,一陣又嫌呢位媽媽嘅小食唔夠健康,一陣又話不如多元化啲整多幾款啦。其實嚟嚟去去大家都係整雞翼、啫哩、菠蘿腸仔同水果之類嘅簡單小食,點會搞大龍鳳煮啲咩複雜菜色呀?

Juicy媽就咁諗嘅,唔好搞咁多嘢啦~一年先慶祝嗰一次,啲細路點會理啲食物有冇營養吖,可能攬住啲薯片猛食添呀。Party都係為開心啫,冇理由要全世界配合自己嘅餐單。如果自己小朋友有健康嘅關注,例如有咩唔食得,應該自己把好關啦。

而家啲家長咁精心打扮小朋友,個個都小王子小公主咁。真係唔想自己個小朋友企埋一齊成個鄉下仔咁,咪唯有上淘寶睇吓有咩平靚正衫仔。著得一次,下個Party又要換第二套,都幾頭痕。

呢個年代,做呀媽真係唔容易呀!

【編按:以上內容為作者之個人意見及立場】

相關文章

緊貼新冠肺炎最新相關資訊