2019-06-28

7.7K

第一眼見到BB時,你一定講過呢句說話!

好多明星或者媽媽Blogger喺網上面發文,都會將同BB初遇形容到好鬼浪漫。但試下除底濾鏡,就會發現通常第一眼都係不由自主咁覺得:嘩,咁醜嘅?

啱啱出世嘅小朋友生咩樣?咪血糊糊笠痴痴嘅一團肉,有啲仲呈紫色添架。最近碌forum睇到個post好盞鬼,問啲媽媽第一眼見到BB時有咩諗法。有媽媽仲話護士叫自己錫BB一啖,講真真係唔太想啜!睇到咁真實嘅反應,真係笑死~

仲有媽媽話見住佢仔仔離開母體時,係一臉錯愕。雖然冇圖冇真相,但唔知點解完全想像到個畫面呀!係咪出嚟見到呢個世界,心諗緊:我係邊個、呢度係邊度?!有啲BB出世時就係老公嘅迷你版,睇落真係好鬼得意。

咁除咗幽默嘅媽媽,都有好多媽媽認為第一次同佗咗咁耐嘅BB見面,係好夢幻嘅事。當呢位既熟悉又陌生嘅至親,瞓咗喺自己心口上面。講真,係會有莫名感動嘅感覺!有時小朋友大咗,開始勞心勞力教佢、督促佢溫書,好多時都會忘記第一次同BB相見嘅呢個「毛文」。當初唔係諗,佢健健康康就夠啦咩?依Juicy媽之見,得閒回味下唔係壞事!

最後戴返個靚頭盔先:本文講初生BB醜樣純屬搞笑,如有雷同,一定唔係巧合架啦~各位媽媽不需太認真~

即刻上討論區一齊傾

【編按:以上內容為作者之個人意見及立場】

相關文章

「親子」功課,咪即係媽媽做功課~!

小朋友帶給父母6個歡樂的理由