施展穿搭魔法!新式復古宮廷風 低調中滲透法式情懷

作者:DaisyLaw

2019-04-30 2,023


最近不停物色六月去土耳其影結婚相嘅服裝,而其中一個我好想影嘅地方,就係伊斯坦堡新城區嘅景點-復古電車。



紅色嘅電車加上周圍都林立住唔少法式建築物,令我想襯翻一套比較復古嘅衫。

於是我開始上網搵靈感,搵吓一啲關於西方嘅復古服裝,然後俾我發現到以前嘅宮廷服原來係好靚,好吸引到我!



以上幾幅圖都係歐洲貴族宮廷嘅大禮服,然而如果著呢啲去影相,一嚟又好似太過誇張,二嚟我又唔知去邊到搵,所以諗住放棄呢個諗頭,直至有日我行行吓Zara見到呢件衫…



點解我會睇中呢件波點衫呢?因為佢最大嘅賣點係個方形領,可以露到鎖骨,即使件衫唔係低胸而且比較多布,但仍然帶出少許性感;而第二賣點就係佢個泡泡袖,復古味濃,而且對於有拜拜肉嘅女仔更係恩物添!仲有雖然佢同大禮服一樣都係方形領泡泡袖,但無咗個種誇張嘅感覺,可以話係比較低調嘅宮廷風服裝。

自此以後,極愛復古風嘅我簡直係瘋狂愛上咗呢款上衣,不停去搵,最後又俾我係一間叫Aleshia嘅香港品牌買咗呢件上衣!



簡簡單單一件全白復古風上衣,配上緊身牛仔褲(個人比較喜歡深藍色),加上一對搶眼嘅紅色高跟鞋,簡單得嚟帶點法式情懷。

呢款方形領嘅衫以前真係比較少見,又或者只係我無去特登搵過,但自從愛上咗後發現都有好多唔同款式,對於中意西式復古風嘅你,衣櫃入面又點可以無一兩件呢?

部份圖片來源:淘寶、維基百科

DaisyLaw

由自小愛上閃閃的芭蕾舞裙那刻開始,就已經對特別的服裝有著情意結。不跟着潮流和名牌走,務求在大家都能負擔得起的情況下襯出一套套獨一無二的裝束。沒有限死的風格,最愛卻是民族風、復古風和顏色比較鮮艷的打扮。