生活品味

2.3K

《愛回家》JM最喜愛角色,男角第二竟然係佢?!

大台處境喜劇《愛回家之開心速遞》自2017年開播以嚟愈做愈好睇,唔少JM都有Keep住追,仲不時喺網上一齊討論劇情。早排有JM搞咗個「愛回家最喜歡的角色」選舉,結果男角、女角第一名都眾望所歸,但男角排第二嘅,竟然係佢……?!

愛回家JM最喜歡男角色


1. 金城安(周嘉洛 飾)

由周嘉洛飾演嘅「廢青」金城安眾望所歸成為最多JM鍾意嘅《愛回家》角色,佢喺劇中經常用好認真嘅表情做蠢事,令人忍唔住發笑!之前因應劇情需要,佢仲Show過啲結實腹肌出嚟,正宗演得又睇得!

「見到佢個樣同行為就好想笑」
「金城安,佢好慘嘅場面都覺得好攪笑,哈哈」
「金城安同蓮姐係目前最強組合」
「金城安同熊尚善,睇到金城安俾熊尚善糟質個樣就想笑」

 

2. 曹總(劉一飛 飾)

勢估唔到,第二受歡迎嘅男角色竟然係曹總!唔少JM都覺得佢唔鹹唔淡嘅廣東話好搞笑,好鍾意睇佢喺《愛回家》入面對熊若水痴心一片嘅設定。最近曹總仲戴上假髮,扮堂細佬曹格追求熊尚善,非常搞笑!

 

3. 龔燁(張景淳 飾)

張景淳飾演嘅龔燁表面上口花花,但實際上非常孝順有腦退化症嘅爸爸,而且對熊若水非常專一,絕對係一個暖男!最近有一集講龔燁為阿水挺身而出,Man到爆!難怪好多JM都話鍾意睇佢有份出場嘅劇情!

 

「愛回家JM最喜歡女角色」


 

1. 龍力蓮(林淑敏 飾)

愛回家最受JM歡迎嘅女角由「大小姐」龍力蓮奪得,實至名歸!大小姐無論喺「接龍集團」定「好爸Bar」都一樣充滿魅力,之前佢同金城安做主角嘅一集大放笑彈,睇到觀眾大讚過癮!不過,有JM覺得大小姐同咗送水輝一齊開舖頭之後,好似少咗機會發揮,希望編劇快啲俾佢返接龍!

「鍾意以前的大小姐,而家唔鍾意」
「我中意大小姐!就係貪佢夠惡!」
「我好少睇愛回家,如有大小姐會睇。」

 

2. 熊若水(呂慧儀 飾)

由呂慧儀飾演嘅熊若水非常受JM歡迎!除咗因為本身身材好、有觀眾緣,亦因為佢喺劇中嘅角色設定相當討好,經常口硬心軟幫助屋企人同啲朋友、同事。佢拒絕曹總追求嘅戲碼總係睇到觀眾哈哈大笑!

 

3. 群姐Isabella(許思敏 飾)

由綠葉演員許思敏飾演嘅群姐,霸氣得嚟又有義氣,可以話清潔阿姐嘅典範!佢嘅角色夠晒貼地,唔單只知道晒全公司上下同事嘅秘密,而且腦筋轉數快,經常諗到新鮮嘅橋段去幫人或者整蠱人,似足大家公司個清潔阿姐,好有親切感!

「群姐」早前如願同偶像歐陽震華一齊合演《愛回家》。


「愛回家JM特別大獎」


啤啤

唔少JM都話《愛回家》入面最鍾意睇熊家嘅寵物犬啤啤!唔講唔知,原來元祖啤啤喺現實世界中嘅主人係周嘉洛!不過因為主人唔想佢太辛苦,所以大半年前已經退出咗劇組,而家大家喺電視上見到嘅啤啤,係由另一隻貴婦狗飾演。

唔知咁多位JM又最鍾意《愛回家》入面邊個角色呢?Click入去一齊傾啦!

【編按:以上內容為作者之個人意見及立場】

相關文章

【劇集2019】盤點4套中港日韓滄海遺珠劇集 邊套超越《鬼怪》 ?

JM 票選心水視帝、視后!最佳劇集係《金宵大廈》定係呢套⋯⋯?

【日劇推介】6大男神強勢回歸秋季日劇!阿部寛 木村拓哉返嚟喇!

【韓劇2019】花美男魯敏宇退伍回歸 《檢法男女2》引爆神級演技 !