生活品味

1.5K

【煲劇攻略】《僅此一次的愛情》小鮮肉金明洙5月22日上架

近年韓國演藝文化可以話係帶動整個亞洲,韓劇產量更加係數之不盡,由愛情劇到懸疑,由懸疑去返穿越,時裝、古裝,同步播、轉播、全卷完,總之就係乜都有!真係煲足24小時都追唔晒,而且佢哋一般集數較少、節調明快,絕對係唔少媽媽放空時間嘅優質娛樂!

不過話時話,由於大部份靚仔都去晒當兵等回歸(朴炯植都要入伍啦。゚ヽ(゚´Д`)ノ゚。),令首選睇靚仔嘅小編最近都有啲失落,但係失落還失落,睇靚仔嘅心係絕對唔會咁易受到打擊!

講到靚仔,除咗最近熱推奇幻神劇《深淵》嘅安孝燮,聽日(22/5)!係聽日!由男團infinite嘅金明洙(L)主演嘅《僅此一次的愛情》就要上架喇!

金明洙([email protected])—《僅此一次的愛情》

韓國KBS電視台2019年新劇《僅此一次的愛情》由金明洙同申惠善主演,屬於輕鬆搞笑嘅愛情喜劇。

劇情簡介:

劇情講述一位天真爛漫天使(金明洙 飾),因為不斷惹禍而被貶入人間,需要幫助一位心高氣傲嘅芭蕾舞者(申惠善 飾)找尋真愛,先可以重返天界,而丹喺幫助芭蕾舞者嘅過程中,竟然發現自己陷入情網!

開播日期:2019年5月22日

除此之外,下半年仲有好多靚仔退伍回歸劇組,當中包括池昌旭、任時完,真係令人相當期待!

徐康俊 —《我們的關係是》

由人氣漫畫改篇嘅《我們的關係是》算係經典校園青春故事,講述一對高中同班好朋友,女主角都加英同男主角韓宇鎮一直處於「友達以上,戀人未滿」嘅關係之中,充滿住曖昧氣氛,但又始終不越界線。

可惜《我們的關係是》之前已經篤定男主角為徐康俊,但女主角就遲遲未有定案,暫時都係開拍無期,徐康俊嘅忠粉可能仲要等下喇!

池昌旭 —《請融化我吧》

由池昌旭、元真兒及尹世雅主演嘅《請融化我吧》,同樣係搞笑愛情劇,淨係聽個劇名已經溶咗一半!劇情講述綜藝電視台PD馬東燦(池昌旭 飾)及女主角元真兒,分別為咗製作出熱爆節目同500萬韓元,不約而同參加咗節目《冷凍人項目》作為實驗對象。

原本以為24小時之後就會醒返,但點知醒返已經係20年後,兩人為咗生存,要將平均體溫維持喺27.5°,面對驚險危機,同時帶嚟爽朗又不合情理嘅搞笑愛情故事。

任時完、李棟旭 —《他人就是地獄》

講到退伍回歸嘅靚仔仲有任時完!今次仲夥拍李棟旭為改編人氣網漫《他人就是地獄》驚悚上陣,劇情講述鄉村少年去到首爾之後喺考試院嘅生活,一個陌生環境住滿咗各種奇怪嘅人,少年會經歷啲乜嘢奇妙嘅故事呢?

《他人就是地獄》係OCN繼《圈套》之後推出Dramatic Cinema項目嘅第二部作品,結合電影及電視劇,由電影製作組以電影執導方式,融合電視劇拍攝嘅高密度劇情,打造精良類型劇。

係咪講到口水都流晒呢,之但係遠水總救唔到近火,如果想吊下癮,小編覺得不妨留意下電影《與神同行》入面飾演車太玄細佬嘅金東旭,由佢主演嘅《特別勤務監督官趙常風》屬於反映時弊嘅黑色喜劇劇種,雖然金東旭唔算係極靚仔,但反而増添咗一份貼地感!



劇情講述前暴力教師趙進甲(金東旭  飾)為咗堅持原則而不斷失業,好唔容易先通過咗公務員考試,成為一位勤務監督官,諗住今次一定要保住自己飯碗,但點知又比佢看到好多不公事件,所以就下定決心同私人偵探社甲乙企劃社社長千德久(金景南 飾) 齊齊打擊惡毒僱傭主,要對抗黑心企業。

開播日期:2019年4月8日

【編按:以上內容為作者之個人意見及立場】

相關文章

JM 票選心水視帝、視后!最佳劇集係《金宵大廈》定係呢套⋯⋯?

《愛回家》JM最喜愛角色,男角第二竟然係佢?!

JM票選2019「五大韓星」!孔劉、朴寶劍、池昌旭成大熱 

【日劇推介】6大男神強勢回歸秋季日劇!阿部寛 木村拓哉返嚟喇!