生活品味

558

JM 票選心水視帝、視后!最佳劇集係《金宵大廈》定係呢套⋯⋯?

臨近年尾,又係時候回顧返2019年嘅心目中嘅最佳電視劇、最佳男主角同最佳女主角!有JM喺討論區開帖,齊齊諗返過往一年,大台邊套劇集最好睇、同埋邊位男女演員值得登上視帝視后嘅寶座!唔知結果啱唔啱同大家心目中諗嘅一唔一樣呢?

JM心水視帝


1. 陳山聰

月頭啱啱同圈外女友結婚成為人夫嘅陳山聰,入行25年以嚟首次喺《金宵大廈》擔正做男主角,劇中佢要一人分飾前世同今生兩個階段嘅角色,有好多發揮機會,唔少JM都大讚佢演技進步咗好多,紛紛揀佢做心水視帝!

 

2. 馬國明

入行20年嘅馬國明,自2015年起年年都有份入圍爭視帝,雖然年年都係陪跑,但仍然獲網民選為「民間視帝」,演技毋庸置疑!今年佢憑住喺《白色強人》入面飾演嘅Dr. Tong一角,再次問鼎視帝,好多JM都睇好佢,諗住佢等咗咁多年,「應該排到佢喇掛」!

 

3. 姜皓文

入行33年嘅「黑仔」姜皓文,今年首次參演大台播出嘅劇集《鐵探》,喺劇中飾演警方嘅臥底Bingo,周旋喺Madam Man同黑社會大佬之間,展現咗精湛嘅演技。好多JM都話,如果黑仔有得提名男主角嘅話,一定會揀佢做視帝!

黑仔喺獄中同患有腦退化症嘅媽媽對望嘅呢一幕,唔少JM都睇到眼濕濕。

 

JM心水視后


1. 惠英紅

攞過三次金像獎影后嘅惠英紅,演技早已爐火純青,佢喺《鐵探》入面飾演嘅「鐵娘子」Madam Man霸氣十足,而且有唔少感情起伏,無論係同黃智賢對罵,定係喪子之痛嗰幕,佢嘅演繹都分成好幾個層次,睇到JM相當肉緊!所以,即使劇集半年前已經播完,到而家JM要揀視后嘅時候,仍然紛紛投票俾惠英紅!

 

2. 李施嬅

入行16年嘅李施嬅喺《金宵大廈》入面一人分飾兩角,好多JM都讚佢喺《金宵大廈》入面演得好好,絕對值得視后頭銜!不過可惜佢今年4月已經離開咗大台,JM們都異口同聲話「佢離咗巢,應該冇咩機會Lu」。

 

JM心水最佳劇集


1. 《金宵大廈》

上月啱啱播完嘅《金宵大廈》口碑載道,成為好多JM茶餘飯後嘅討論熱話,成為2019年JM心目中嘅最佳電視劇集!故事以前世今生為背景,劇中情涉及夢、寓言、曼德拉效應、蝴蝶效應同埋平行時空等奇幻嘅議題,好多JM都讚「故事夠特別」、「好少有呢類劇情電視劇」,甚至有JM係「全年唯一一套我每晚坐定定等夠鐘開電視睇嘅劇,好多年未試過!」

 

2. 《白色強人》

另一套JM心水嘅最佳劇集係收視高、卡士強、口碑好嘅《白色強人》,故事探討醫療界入面嘅權力遊戲,醫生除咗要面對病人,仲要面對人性貪婪同埋利慾薰心,劇情相當緊湊,而且有郭晉安、馬國明、李佳芯、蔣志光等多位好戲之人演繹,JM覺得「每集都水準穩定,有一定嘅追看性」。

 

3. 《鐵探》

警匪懸疑劇《鐵探》講述一班身心受創的嘅警察,同時要面對高智慧嘅悍匪,以及警隊高層權鬥,劇情相當緊湊,而且搵嚟惠英紅、姜皓文、石修等幾位電影界嘅演員參演,好多JM都讚呢套劇「戲味」十足,「勝在有好演員」!

除咗以上三套,JM心目中嘅最佳劇集仲有《十二傳說》。仲有未開播、由楊千嬅、黃浩然同周柏豪主演嘅台慶劇 《多功能老婆》,都有機會成為2019年JM嘅心水最佳劇集!

 

【編按:以上內容為作者之個人意見及立場】

相關文章

【劇集2019】盤點4套中港日韓滄海遺珠劇集 邊套超越《鬼怪》 ?

《愛回家》JM最喜愛角色,男角第二竟然係佢?!

【日劇推介】6大男神強勢回歸秋季日劇!阿部寛 木村拓哉返嚟喇!

【韓劇2019】花美男魯敏宇退伍回歸 《檢法男女2》引爆神級演技 !