美妝護膚

1.2K

向眼紋Say NO!眼霜都帶唔走表情紋,原來要靠佢?

眼紋可以話係女人嘅大忌,色斑、黑眼圈等,都仲可以用遮瑕修飾,眼紋就真係點都無得遮,甚至係如果遮瑕膏用得太重,問題就更明顯;為咗減淡眼紋,好多女士都願意花錢買眼霜,甚至係幾千蚊細細樽嘅天價眼霜!


動態與靜態皺紋大不同

要有效地擊退眼紋,首先要知道,其實眼紋可以分成動態紋靜態紋兩大類別;表情紋就係面部做表情時出現嘅紋,例如:笑就會出現嘅魚尾紋,而靜態紋就係因缺水形成嘅細紋,同埋年紀大咗而出現嘅皺紋。

眼霜用於靜態紋係有一定效用,例如:因乾燥而形成嘅乾紋,眼霜嘅補濕滋潤作用就起到作用啦。至於,因年紀漸長導致骨膠原流失,眼部肌膚失去支撐而形成嘅皺紋,就可以用針對抗衰老問題嘅眼霜,例如:含有維他命A衍生物(Retinol)、維他命C、維他命E等成分嘅眼霜。

但對於動態紋,眼霜就沒有成效啦!目前醫學上有效嘅方法,就係肉毒桿菌撫平動態紋,同單極射頻療程令骨膠原重組同增加。另外,平時搽眼霜嘅時候,都要記住塗搽嘅手法,最重要係輕柔,用拍壓法將眼霜輕拍喺眼周肌膚,避免打圈用力塗抹拉扯肌膚。

【編按:以上內容為作者之個人意見及立場】