2018-02-28

2.6K

【增強免疫力】蟲草花淮山圓肉杞子雞腳湯

突然口痕痕想食雞腳,但好諗唔到點煮好食,見天氣又凍凍地,所以就用蟲草花淮山圓肉杞子嚟煲雞腳湯,既可以過下口癮之餘,又可以嚟一個可以提高免疫力嘅湯水,打好個底咁就唔洗怕天氣時凍時熱易作病啦!

蟲草花的功效則和蟲草差不多(當然佢地兩者價錢差好遠啦),均有滋肺補腎護肝、抗氧化、防衰老、抗菌抗炎、鎮靜、降血壓、提高機體免疫能力等作用。而且蟲草花不寒不燥,具有補肺、補腎和護肝養肝的功效。淮山、圓肉同埋杞子都係一啲補中益氣嘅食材。依家啲天氣又好容易病,所以就煲多依啲有益湯水,咁就可以增強免疫能力,等病痛都少啲啦!

蟲草花一両、淮山一両、圓肉約二十粒、杞子一湯匙、紅棗六粒、雞腳十隻、瘦肉$20及蜜棗三粒~

雞腳洗淨汆水,記得啲腳趾唔好剪,因為一剪左就會係煲湯過程漏左啲雞油出嚟,咁成煲湯就一定會好油淋淋啦~

瘦肉都要先汆水~

紅棗洗乾淨後去核~

其他藥材就浸洗一陣~

煲內放約2.5L水,然後加入所有材料(雞腳除外)~

待滾起時,就用大火加蓋煲約30分鐘~

然後就加入雞腳~

再轉慢火加蓋煲多1.5小時~

最後加入少少鹽調味,就可以飲啦~

蟲草花我都煲得幾密(因為小小豬鐘飲嘛),今次可能加左紅棗同圓肉一齊煲關係,啖湯好似比平時煲嘅更加甜,加埋少少嘅雞油香味,所以話咁快一大煲就俾我地三口子KO晒啦!小小豬仲一口氣飲左四大碗,依隻豬仔真係越嚟越抵錫(我指飲湯方面....哈哈哈。

溫馨提示:
- 由於個別人仕體質不同,所以大家記得煲之前了解下自己,如有疑問,請先向註冊中醫查詢!

【編按:以上內容為作者之個人意見及立場】

相關文章

食過多垃圾食物成績變差!5招教你改善孩子飲食習慣

【營養師話你知】想奀仔奀女肥肥白白?良好進食氣氛好重要!

【營養師話你知】升糖指數高食物易令人疲倦 一定要食少啲?

【言語治療】小朋友不肯咀嚼食物怎麼辦?面部按摩幫到你

緊貼新冠肺炎最新相關資訊