2019-01-23

1.6K

冷靜角的使用

冷靜角係一個冷靜嘅地方,唔係一個懲罰嘅工具。

有唔少朋友都用錯冷靜角,當小朋友發脾氣時,就「罰」去冷靜角,特別係幼兒,都發緊脾氣,仲肯聽你講入去企3分鐘咩?

冷靜角就好似廁所咁,係一個「中性」的地方,有需要就要去。當初次「介紹」呢個地方時,就應該係小朋友心平氣靜時,慢慢講佢知,好唔開心就可以去呢度冷靜一下,而且要練習的。但唔好期望練習完,小朋友想發脾氣就會自動自覺走去冷靜,大人都唔得啦!

當小朋友真係想發(或發緊)脾氣時,父母就可以一邊講出小朋友想要的事及心情,並希望小朋友可以冷靜同細細聲講出想要啲咩(我明白啱啱你講咗佢想要啲咩!但發脾氣嘅特性,就係唔講道理嘛!),例如:我知道小明而家好唔開心,好想食糖,你慢慢講俾爹哋聽你其實想點?然後一邊帶/拖/抱/捉佢去冷靜角。初次使用冷靜角時,以上對話及行為可以糾纏很久,你可以重覆使用,佢唔會記得你2秒鍾前講過的。記得頭幾次用時,你要有足夠時間「溫柔地堅持」。

當佢冷靜咗落嚟(其實係可能喊到攰咗),就可以讚佢靜咗落嚟,話數多10聲俾佢平靜一下(或20或30, 隨你鍾意,習慣咗之後,你數10/20/30聲就可以冷靜。但留意,唔係平時你兇佢果隻「嗱!1、2、3收聲」,錯哂!),然後同佢傾一啲方案,例如:我都知你想食糖,但係你呢排咳喎,不如我留一粒最大嘅俾你,等你好返就請你食啦!你想要咩色㗎?或留糖紅色俾你好唔好?(但係你好清楚佢係想要綠色的!)如果最後果句可以係問題的話,可能會更有效果。但第一:不要問「好唔好」;第二:要視乎小朋友嘅語言能力。

當幼兒習慣咗之後,你會感覺到小朋友喺情緒控制上進步咗。我嘅小朋友,大約18個月左右就開始使用了。

 

【編按:以上內容為作者之個人意見及立場】

相關文章

【教育方程式】4大方法 擺平Trouble Two無煩惱

Trouble 2乜都話「唔要」,原來因為……

常吃剪碎食物會導致口部肌肉問題?

【教出十優女兒】建立簡單「儀式」,可大減孩子不合作

緊貼新冠肺炎最新相關資訊