2019-08-22

484

【學童營養】送飯家長必知!小學生健康午餐食物及黃金比例!

好多人都話飲食習慣其實係由細培養,小朋友擁有均衡嘅膳食,身體先得以正常發育同生長。但普遍香港小學生都未能夠遵從健康飲食原則,甚至出現超重或肥胖問題。雖然小朋友「貪食」總比「唔願食」好,但作為父母少不免會擔心佢哋肥胖引致嘅健康問題。而選擇返學送飯嘅家長,又應該揀選邊啲健康食物,為小朋友準備符合飲食原則嘅健康午餐呢?

 

更多文章:【學童營養】各國小朋友午餐吃甚麼?
更多文章:
【學童營養】「今日煮咩餸好?」子女午膳飯盒切忌放呢幾款食物!

健康午餐嘅黃金比例

想為佢哋打造健康午餐,首先要了解小學生成長時期嘅營養需要。跟據衛生防護中心指引指出,每餐午膳穀物類、蔬菜同肉類所佔飯盒嘅比例應該維持喺3:2:1,同時烹調上都要注意少油、少鹽、少糖。

穀物類即係以含豐富碳水化合物嘅飯、粉麵、麵包等;但日日食白飯,小朋友可能會略嫌沉悶,家長可以考慮改以菜飯、粟米飯、蘑菇飯、五穀飯、蕎麥麵、菠菜麵或螺絲粉等,令穀物類款式更多變化,引起佢哋對飯盒嘅興趣。

家長嘅時間好似有種「唔見駛」嘅感覺,未必可以每日烹調子女當日嘅飯盒,因此大部份都係帶隔夜菜為主。針對蔬菜方面就要特別留意深綠色蔬菜係不宜「過夜」同翻熱!大部份蔬菜,特別係白菜、菠菜、菜心、西蘭花、芥蘭等都含有硝酸鹽,而加工程序、溫度、環境等因素都會影響硝酸鹽產生對人體有害物質——亞硝酸鹽嘅含量,進食過量容易引發癌症。建議可以非綠色蔬菜、瓜豆、菇類代替,例如:冬瓜、節瓜、蕃茄、椰菜等。

大多小朋友都熱愛肉類,但由於肉類脂肪含量較高,分量必須控制得宜,以免致肥。健康午餐當中嘅一份肉類,最好以瘦肉或白肉為主:去皮雞肉、瘦豬排、全熟牛柳、魚肉。

更多文章:【學童營養】學校小食部有乜食?零食都要食得有營!
更多文章:【學童營養】8款適合帶回校的兒童健康小食(內附詳細列表)

飯後水果同小食要點樣分配?

小朋友每日最好攝取到兩份水果,以確保攝取足夠嘅膳食纖維;其中一份可以安排喺午餐,橙、蘋果、香蕉、提子都係唔錯嘅選擇。但如果小朋友唔鍾意食水果,想用果汁代替的話,每次應以唔超過180毫升嘅無添加糖果汁為佳,同時每星期唔多過兩個返學日飲用。

另外,配備飯後果以外嘅日子,不妨為子女準備低脂牛奶、芝士、乳酪、豆漿等含豐富鈣質嘅食物,作為小食,以助子女骨骼發展。

更多文章:【學童營養】怕小朋友揀飲擇食所以不准帶飯?「有要求」和「挑食」是兩碼子的事!


相關文章

【學童營養】怕小朋友揀飲擇食所以不准帶飯?「有要求」和「挑食」是兩碼子的事!

【學童營養】西式快餐=唔健康?一文教你準備健康西式午餐及小食

【學童營養】「今日煮咩餸好?」子女午膳飯盒切忌放呢幾款食物!

【學童營養】學校小食部有乜食?零食都要食得有營!