2019-05-30

9.5K

專屬嬰幼兒嘅古典音樂會?6月尾開始有得免費聽!

古典音樂有助陶冶性情,所以唔少媽媽都會喺懷孕期間聽古典音樂嚟胎教,但當BB出世後,似乎就比較難搵到適合佢哋嘅音樂會。不過,嚟緊將會有一個專為0至6歲嬰幼兒而設嘅草地音樂會,小朋友可以一邊聽古典音樂,一邊同表演者互動,認識各種唔同嘅樂器,啟發大腦潛能!

6月29日至7月21日期間,奧海城以及荃新天地將會舉辦多場嬰幼兒互動古典音樂會「Happy Gabby Baby Concert」,以本地原創音樂有聲繪本《Happy Gabby Plays Classical Music》(小不點與古典樂)作為藍本,改編成兒童音樂劇「Happy Gabby之仙樂飄飄」,並由香港管弦樂團首席中提琴家凌顯祐先生帶領多位資深本地音樂家一齊表演!

為咗令小朋友更加享受其中,到時商場會喺中庭設置大草地,等大家可以坐喺草地上輕鬆欣賞悠揚樂韻!家長可以帶埋小朋友同一眾音樂家以及繪本主角Happy Gabby進行有趣互動,寓學習於娛樂,培養小朋友嘅想像力同埋創意之餘,仲可以促進親子關係!

以音樂栽種 視、聽、觸感全方位體驗

聽音樂有助促進嬰幼兒右腦發展,增強佢哋嘅創造力同想像力,更可以鍛煉圖像思維能力。

而且全港首個專為嬰幼兒而設嘅音樂會,「互動」亦係一個好重要嘅元素!嬰幼兒可以透過同音樂家以及童書主角Happy Gabby即場互動,認識同埋體驗多款樂器,包括圓號、豎琴等,Happy Gabby仲會鼓勵觀眾一齊唱歌跳舞!互動交流既可以刺激小朋友嘅視、聽、觸感體驗,增加佢哋身體嘅協調性同運動能力,更有助提升專注力,啟發小朋友對音樂嘅興趣!

今次音樂會將由資深音樂團隊即場演奏,演奏樂器包括小提琴、圓號、豎琴、木琴、軍鼓及鋼琴,而曲目則包括史特勞斯《提爾愉快的惡作劇》、柴可夫斯基《花兒圓舞曲》、聖桑《小星星》及貝多芬《歡樂頌》等,開啟嬰幼兒嘅音樂繆斯!

Happy Gabby音樂童書期間限定店

如果聽完音樂會後覺得意猶未盡?場內將會特設期間限定店,等大家可以將Happy Gabby音樂童書系列帶返屋企,繼續培養小朋友對古典音樂嘅興趣!到時除咗有售Happy Gabby系列嘅首兩本作品《Happy Gabby Plays Classical Musical》及《Happy Gabby Plays Chinese Classics》,亦將會推出新作《Happy Gabby Leads The Circus》,以及以音樂為主題嘅跳棋遊戲,讓孩子透過遊戲愛上音樂!

《全港首個嬰幼兒互動古典音樂會》詳情
日期:6月29、30日、7月1、6及7日
時間:下午3時 及 下午4時30分
地點:奧海城2期地下主題中庭

日期:7月13、14、20及21日
時間:下午3時 及 下午4時30分
地點:荃新天地2期中庭

【編按:以上內容為作者之個人意見及立場】