10句媽媽必講口頭禪 你今日講咗未?

2019-09-10 1.1K


大家細個做女嗰陣,有冇覺得阿媽好長氣成日煩住晒?(可能而家都仲係XD)回憶返自己做女嗰陣,成日嫌阿媽同一句嘢講N咁多次,成日忍唔住躁佢底。但而家做咗人阿媽,開始不自覺重蹈阿媽嘅覆轍,每日都講好多次一模一樣嘅說話……早兩日見到有網民喺討論區列出6個做人阿媽經常講嘅口頭禪,一Click入去睇,媽呀!中晒!

 

1. 「唔好跑,慢慢行!」

呢句好多媽媽話係小朋友年紀仲細嘅時候講得比較多,因為幼兒或者幼稚園階段嘅小朋友經常Natural high,跑步多過行路,而且叫極都唔停!

 

2. 「你要我講幾多次先聽?」

真係,幾乎每日講100次……講到口水都乾!例如講咗好多次食飯時唔可以拎隻腳上嚟,但就硬係唔聽,係都要激到阿媽紮紮跳!

 

3. 「我數到三,你就要……」

呢句同上面嗰句經常一齊出現,因為阿仔阿女講極都唔聽,所以要升級,恐嚇佢一定要按指令去做,通常佢Feel到阿媽啲火氣升級咗,都會肯聽!

 

4. 「再唔執玩具,我就掉晒佢!」

真係唔明,明明細個有教佢哋執玩具,但唔知點解,大大吓又執吓唔執吓,係都要出動「掉玩具」呢招先肯聽!其實老娘都唔想咁勞氣,點解要迫我呀!

 

5. 「做完功課未?」

雖然自己細個都唔鍾意做功課,但做咗人阿媽就會明白,功課係唔做唔得,所以每日都要講呢句去督促阿仔阿女做功課,做個有責任感嘅學生!

 

6. 「而家幾點鐘,仲唔去睡覺?」

而家啲小朋友多咗好多娛樂,真係比以前夜瞓咗好多,到十點幾、十一點幾都仲係好精神,就算夾硬夾佢返房,都係咁話「好精神」、「瞓唔着」……

 

個Post下面啲留言仲提出咗好多阿媽成日講嘅口頭禪:

「快啲啦!」

「仲唔快啲起身,遲到喇!」

「專心上堂呀。」

「飲多啲水呀!」

 

唔知各位JM又最常講邊句呢?Click入討論區一齊傾啦!

 

 

 

【編按:以上內容為作者之個人意見及立場】