2019-07-21

6.4K

【濕身爽玩】夏水戰 @海洋公園 x One Piece

日日都落雨,唔通連個天都唔鍾意我?終於等到好天,又熱得太緊要!唔得!再係咁落去會溶㗎!聽講海洋公園有「夏水戰」喎!一於趁住放暑假,帶埋小朋友去爽番下囉喂!

由於時間關係,響屋企一跳...就跳到嚟海洋公園喇!Woo~ XD

海洋公園夏水戰2019以《海賊王》為主題,大家有冇睇過呢套卡通呀?

日本人氣動漫嚟喎!唔係呀嘛?冇?唔緊要,等我帶大家了解多啲!

咁多人嘅?原來排隊去同角色見面呀!行快啲囉!~

嘩!遇見TonyTony·Chopper,實在太好喇!*o*
佢係最鍾意食棉花糖嘅寵物,真係好鬼得意!cute~

除咗佢之外,仲會有唔同角色陸逐出現㗎!
合照完之後,就繼續向「威威天地」進發囉!
經過海濱樂園廣場嘅時候,朗朗被選為接鸚鵡大使~

一二三,飛呀!接到!其實係隻鸚鵡飛得夠準咋!hahaa..

不過朗朗都好有滿足感呢!^^

海洋公園有多個One Piece影相位,佈景色彩繽紛,無論係咪《海賊王》fans都一定會舉機泊照啦!

終於到咗「小海賊水花大亂鬥」,係小朋友(130cm或以下)專屬嘅玩水專區~
齊齊戴上眼罩同拎起水槍~

Are you READY?各就各位,預備作戰!唔嚇得都睇得喎!XD

終於可以入場大玩特玩!晴朗不停上彈...係上水先啱!然後就四圍突擊,戰況激烈!
穿越草帽噴水拱門、超級大水簾同埋噴泉迷陣多個濕身機關,渾身濕晒喇!爽!

3-5分鐘嘅水戰體驗,真係唔多夠喉!唔緊要!過埋去「小海賊泡泡派對」玩下囉!

晴朗一落場就不停以泡泡攻勢出擊,對手們都顯得束手無策呀!

泡泡簡直係晴朗嘅大愛!皆因平時都成日要求浸泡泡浴~
今次場地比屋企個浴缸大咁多,仲唔興奮到震咩?
打完泡泡戰之後,個個都變咗泡泡人,去沖身囉!

場地出面就有得沖身,都好方便喎!
我哋著埋泳衣嚟,又點只濕得咁少身丫!跟住嚟啦!

準備挑戰「巨型路飛草帽」濕身機關喇!3~ 2~ 1~ GO!!!

晴朗呢度淋下,果度濕下,瘋狂不停loop!又再次濕晒身喇!

其實唔駛講,表情已經表達晒一切!勁hyper囉!^o^

另一邊廂,附近嘅「仲夏水花狂舞派對」即將開始~

一班演藝人員大跳火熱勁舞,仲會不時向現場觀眾倒水同射水添!氣氛好熱鬧呀!
既然做梗《海賊王》主題,當然有好多佢嘅精品賣啦!

T-shirt、帽、冷凍毛巾、防水袋、沙灘袋、小挽袋、匙扣、飾物....一應俱全!
我哋睇中咗小童t-shirt同沙灘袋呀!(購買慾又燃起~)

買咗就梗係即著即用啦!我哋仲幫襯埋爆谷套裝添!
啲爆谷熱辣辣而且焦糖均勻,好好味!
索柏造型嘅爆谷桶好靚添呀!
嘆完爆谷,就預備過去熱帶雨林天地果邊喇!

晴朗選擇搭海洋列車過去,因為列車設計令人尤如置身於海底般~
佢哋每次都抬高頭睇實幾時會被八爪魚突襲,百看不厭!hahaa..

嚟到熱帶雨林第一件事,就係要守好水槍炮台呢個崗位喇!
事關好快就會見到晴朗爸爸同朗朗經過~

話口未完就到!透明雨衣嘅爸爸再加黃色雨衣嘅朗朗,瀡梗落嚟喇!描準~ 發射!

有人「射哩眼」望上嚟!我哋被敵軍發現咗喇!不過都冇仇報!正呀!XDD

跟住就去咗「熱帶雨林探險徑」同動物親一親,啱晒「我的志願」做獸醫嘅晴晴啦!

爆谷桶裡面啲爆谷雖然食晒!但晴晴真係好鍾意個桶,去到邊揹到邊~
唔知今晚瞓覺會唔會要攬住瞓呢?@[email protected]
每次到海洋公園都總會玩下攤位遊戲,碰碰運氣嘛!
今次有多款《海賊王》公仔,真係好想抱番個返屋企呀!

晴晴做咩V晒又笑晒?因為佢哋掉咗一陣波就已經有珍寶獎喇!
呢度啲獎好似大贈送咁,好易中,開心到震呀!

好大隻索柏!真係可以抱番屋企囉!~ *o*

再去另一攤位碰碰運氣先~ 朗朗話想要千陽號喎!
晴朗爸爸不停揼,啲龍蝦就不停跳,晴朗都睇得好緊張呀!

結果唔只千陽號,仲帶埋TonyTony·Chopper走添!認真滿載而歸!

話明「夏水戰」,今次入海洋公園當然係主打「濕身」啦!「小海賊水花大亂鬥」同「泡泡派對」都好好玩,可惜每節時間太少,條隊又太長,覺得唔夠喉唯有過去「巨型路飛草帽」再喪玩啦!小朋友玩水嘅時候,大人又可以享受「仲夏水花狂舞派對」嘅熱鬧氣氛,真係唔會悶呀!由於大人冇帶泳衣關係,我哋冇去玩「水戰激鬥」,呢個係適合120cm或以上及12歲或以上人士玩嘅大型水戰區,如果一家大細一齊入去玩一定好刺激啫!

係咪好吸引呢?1個大人可帶1個120cm或以上嘅小朋友入去玩,如果想玩就全家總動員預備齊泳衣喇!

最後要提提有興趣去玩嘅朋友!除咗帶泳衣、毛巾同替換衣服之外,記得帶埋拖鞋喎!我哋忘記咗帶,好彩即場有得賣咋!如果淨係預小朋友玩水,大人就要留意唔同位置嘅「濕身區」喇!稍一唔留神就會中招!不過就算濕咗都有T-shirt賣,唔怕嘅!「夏水戰」可以滿足小朋友玩水慾望之餘,又可以玩埋其他園內機動遊戲同埋睇動物,簡直係一次過滿足晒多重願望呀!而家佢哋做梗香港居民尊享買2送1套票優惠喎!快啲帶埋小朋友嚟爽爽佢囉!

海洋公園夏水戰2019
活動期:2019年7月13日至9月1日
官方網址:https://www.oceanpark.com.hk/tc/park-experience/summer-water-battle-2019


【編按:以上內容為作者之個人意見及立場】