2018-06-18

1.8K

【虎羽有云】鹿兒島1on1育兒之旅

6月頭Wilma媽偉大嘅老細請全公司同事去鹿兒島4日3夜,因為芊羽係要奶睡嘅BB,我就唯有帶埋佢去,丟低心裏暗喜嘅爸爸

行程只有Day 1同Day 2嘅晚餐同同事食飯,其餘時間都係自由組隊活動,帶住一個BB嘅我,實在唔想要暢快旅遊嘅同事照顧,所以就成為獨行俠喇~(佢哋已經照顧咗我同芊芊好多)

鹿兒島主要係個行山睇景影靚相嘅地方,事前Wilma媽嘗試search過親子遊行程,發覺好多地方都唔適合同1歲未夠嘅BB去;櫻島睇火山但太多火山灰、霧島有神社吸靈氣但BB冇咩睇、仙嶽園適合小朋友去但芊羽太細、屋久島靚絕但full gear媽媽handle唔倒⋯

經過多番考量,Wilma媽組合咗以下行程,順利完成!大家如果諗住帶小B去鹿兒島育兒行可以參考參考:

Day 1 -
坐HK airline往Kagoshima 11:50a.m.航班,我哋係住中央站附近嘅酒店,由機場去大約一個鐘,去到酒店安頓已經傍晚6點。

35143853_533344497060531_7029766968446025728_n

呢日嘅晚餐同同事食串燒,然後去到Aeon掃咗一支大水同杯麵以防大食媽媽夜晚肚餓,就返酒店休息。

Aeon收9點,如果冇帶齊BB食物或執漏用品可以Day 1先黎補給。
*便利店係冇BB嘅即食固體食物㗎~*

Day 2 - 
一直糾結到底去水族館定係動物園,最後見tripadvisor 評分係平川動物園較高,就決定咗我哋Day2行程。

由中央站撘JR往指宿方向喺五位野站落車,再步行20分鐘,就會幾經辛苦到達動物園。
*要有心理準備步行唔易行,有大暗斜⋯沿路係馬路,得飲品售賣機補給

35345817_533344420393872_6844752318638850048_n

入到園區,就立即見到足浴池同迎面嘅長頸鹿~
園內有141種唔同動物,睇動物嘅距離好近,可以餵兔仔羊仔,有跑埋腳邊嘅公雞,亦有一繩之隔嘅袋鼠。有別於香港同國內,環境乾淨整潔,就算動物例如鱷魚潛入水都可以清晰可見。
而且沿路有「順路」指示牌,唔會有miss咗嘅區域,初時Wilma媽預期用2個鐘快行,行足3個幾鐘先夠睇。

   

呢個動物園嘅性價比好高,除咗動物,仲有摩天輪同碰碰車等小量付費遊戲。雖然路途稍遠,但都好值得去。

平川動物園
開放時間:9am - 5pm

入場費:成人 500円 中小學生 100円
幼兒免費

嬰幼兒設施:園內嬰兒車租賃 300円
大量多用途洗手間及育嬰室(每步行五分鐘都見到一個!)

交通:
1)JR鹿兒島中央站→五位野站(乘坐指宿枕崎綫約25分鐘)
五位野站→步行平川動物公園(步行約20分鐘)

2)巴士(鹿兒島交通公司2號綫、每隔20分鐘一班、車程60分鐘)
鹿兒島站前(水族館前)→天文館→高見馬場→郡元→谷山站前→五位野站前→平川動物公園

去完動物園,下一站係最期待嘅嬰兒用品瘋狂購物。
Akachan同西松屋對媽媽們黎講未必陌生。未出發鹿兒島Wilma媽已經search定去哂2間朝聖嘅路線同分店地址。
撘返指宿綫去到宇宿,步行10分鐘,就會去到西松屋,對面商場2樓就係Akachan,簡直一石二鳥!

西松屋係日本知名嘅嬰幼兒連鎖店,佢亦有做網店,唔少香港嘅媽咪都有喺網上買佢嘅衫仔。佢主打平價路線,質地係冇咁好,但絕對可以接受。
鹿兒島呢一間分店勝在冇乜人,貨品亦算齊全,Wilma媽喺呢度買咗浴衣、衫仔、泳衣、玩具、BB小食俾芊羽同朋友嘅小朋友做手信。
呢間分店好似已經算係幾細,但係單拖湊住魔王芊行動物園行到筋竭力疲嘅我,依然喺呢度行咗成粒鐘⋯

35191386_533344163727231_2266895240751218688_n35302377_533344140393900_9218566599810744320_n35144114_533344203727227_4181664452413751296_n

再嚟就係性價比更高嘅Akachan,首先要強烈建議大家認住佢嘅日文寫法,因為佢個鋪面係完全冇英文,係商場外面如果你唔知佢個日文名你根本唔會認到佢。

第二個建議,就係大家最好去咗Akachan先去西松屋。因為Akachan嘅貨品比西松屋更靚更多!
宇宿分店係上年11月先開張,店舖面積目測2000呎,由懷孕期需要嘅用品到小朋友3歲嘅衫都一應俱全。自家牌子嘅質地極好,浴衣更加係必買又抵買單品。但因為Day2約咗同事晚餐嘅關係,喺呢度匆匆半小時就要趕車,完成咗我哋Day2!

西松屋宇宿店
地址:〒890-0073 鹿児島県鹿児島市宇宿2丁目2−18 宇宿ショッピングセンター内2階
營業時間:10am - 9pm

Akachan宇宿店
地址:〒890-0073 鹿児島県鹿児島市宇宿2丁目3番5号 オプシアミスミ2階
營業時間:10am - 9pm

提外話,同事們兩晚都去我哋酒店樓下嘅屋台村,感覺地道,影靚相同飲酒傾計一流,如果冇帶小朋友可以一戰!

35283706_533344503727197_1967392997809061888_n

Day 3 -
呢一日我哋嘅行程較為隨意,去到原本應該更早嚟嘅指宿。
指宿呢個地方有好多景點,例如沙浴、溫泉、傳說有水怪嘅池田湖、人工嘅花海。一出車站,就有南國小島嘅感覺,有好高嘅樹。
原本打算食嘅流水麵,但因為要趕上預早訂咗嘅特別列車,最後轉移陣地,我哋去到日本最南車站—西大山。

35302376_533344120393902_5120812446717575168_n35227998_533344053727242_3567279942045532160_n

由中央站乘撘一個鐘嘅車程(注意,去西大山班次唔密),芊羽比爸爸更叻,去到日本至南。呢個車站本身係冇人嘅,得一個寫住「日本最南車站」嘅打卡必影牌,一個有好食抹茶軟雪糕嘅大型士多,一個代表幸福嘅吊鐘,一個黃色嘅郵箱。但因為天色好靚,又有繡球花,喺呢個地方,Wilma媽同芊羽影咗幾十張相⋯

35319053_533343830393931_1831141332211466240_n
返到指宿,我哋坐預先訂飛嘅不停站特別列車指宿玉手箱號(要喺JR網站登記成為會員再預訂)返中央站,沿途可以望到好靚嘅海景,令人腦袋放空呢~

  

返到中央站,購物狂Wilma媽Day2 Akachan未夠喉,又再去多次宇宿akachan補買一堆戰利品,滿載而歸返酒店

35266132_533388683722779_8291574471056162816_n

夜晚7點,我哋喺酒店休息咗一陣就撘巿電去天文館。
天文館係一個商店街,媽媽們要買藥妝同手信都可以喺到搵齊。
但當然,相比大阪等大城市,天文館大概只有三分一嘅舖頭,係一個一兩個鐘行哂嘅地方

Day 4 -
完結育兒之旅,Wilma媽作最後衝刺,黎到中央站Amu plaza。
呢個商場非常好行,有大人嘅衣物、玩具精品,有一層更加係本地兒童服裝集中地,如果媽咪係鍾意買嘢,呢度可以消磨一個下午。
我就同扭眼瞓嘅芊羽,去到商場頂層影貼紙相,完美結束我哋今次飛甩爸爸日本自由行旅程喇!

總結呢4日3夜1on1之旅,日本擁有極完善育嬰設施,確係帶小B去旅行嘅最理想地點。一路上嘅多功能洗手間,衛生嘅街道環境,見Wilma媽一個女人仔抱住扭抱BB又抽住BB車上唔倒有一大級嘅JR忍唔住熱心幫忙嘅乘客,令我哋順利完成旅程。
雖然芊羽大個肯定唔會記得呢段回憶,但媽媽唔會忘記呢個屬於我哋兩個人嘅小歷險。

希望大家親子遊都會考慮下比較少人揀嘅鹿兒島,多謝你哋睇我呢篇超長遊記
我寫得唔係好仔細,如果你哋想問關於以上行程嘅資料歡迎inbox虎羽有云或comment,我會盡力解答~

【編按:以上內容為作者之個人意見及立場】

相關文章

【媽媽護膚】懷孕期間免疫力較弱 患疣影響到寶寶的健康?

【新冠肺炎】簡單易整又慳錢 教你DIY四款口罩收納夾

【新冠肺炎】全球停學引發跨世代災難 聯合國警告:弱勢社群風險最高!

【新冠肺炎】夫妻被迫分隔異地 丈夫無法見證孩子成長

緊貼新冠肺炎最新相關資訊