2018-05-03

1K

【親親大自然】種菇工作坊

話說小小豬曾經睇過一次THINK BIG節目,嗰一集就係佢學校嘅哥哥姐姐去學習點樣去種菇菇。睇完之後佢就一直心思思好想去體驗一下,為左滿足一下小小豬,我都有好努力咁搵,但坊間又真係比較少有依啲農場(或者係我唔識搵啦)。

有一日當我睇BABYKINDOM討論區,見到佢地有種菇工作坊參加活動,咁我就當然即刻報名,好好彩咁又抽中左,所以小小豬期待而久嘅菇菇活動就可以體驗到啦~

我地今次嚟依個菇菇農莊就係大埔樹友農莊,由於我地係自己渣車去,所以都有丁點擔心迷路。好在農莊姨姨好好人,佢係電話教我地點行,所以係冇迷路情況下,終於到達目的地啦~

依個菇菇農莊係由永續尚源社所舉辦,佢地係一所成立不久嘅非牟利註冊社團,由一群熱心於推動有機upcycling人士所成立。主要想透過「惜物減廢 - 廚餘升級再造菇」,等各位大小朋友廚餘都可以好有用呀!

一嚟到農莊各位小朋友都已經非常興奮,大家都好心急去整菇包。不過....我地要聽下導師教我地用正確方法去做菇包~


哈哈哈...恨左咁耐終於都可以嚟整菇菇,依個小小豬又點會唔開心,佢仲好留心咁聽導師講解添~

聽完講解就當然急不及待要出手啦~

首先就利用木碎、燕麥、咖啡渣等...五種有機廢物資源去做菇包,唔係隨隨便便要依照指定分量先可以呀~


之後就要將所有有機廢物資源拌勻好,唔可以有粒粒係入面呀~

之後就可以加水等啲原材料,可以有足夠水份~

之後就可以入袋做菇包啦~


大家都邊落手落腳齊齊唔怕污穢,好專心咁哦~


最後就將菇包封好~


幾經努力,小小豬終於完成左三個菇包啦~

其實依個菇包都未完全完成,仲要經消毒同種菌先叫完成。不過農莊姨姨就每位小朋友送左兩個成熟嘅菇包,等我地可以係屋企都繼續努力照顧菇菇,延續對菇菇嘅了解呀~

係未開始下一環節時,我地就稍事休息,係農場入面玩鞦韆同埋吊床先~


小小豬話依個吊床好舒服,係上面搖住嚟睇都真係唔錯(阿仔,係農莊試好啦,係屋企係做唔到呀...哈哈哈)~

雖然小小豬係為左菇菇而來,不過我相信佢最鐘意一環節就係個「鬥快除雜草」比賽。一聽到準備開始,佢就急急腳去拎個放雜草嘅花盆啦~

其實初時小小豬都唔多敢除嗰啲雜草,佢話唔識分咩係雜草,怕除錯左就影響左植物生長,所以佢一直都只係拾啲枯葉。最後經姨姨教路,佢終於識分雜草,所以佢就好努力咁邊跑邊除雜草啦~


由於只有10分鐘時間,最重雜草嘅就係勝出者,所以小小豬都好努力去除,希望可以勝出比賽~

最後佢有兩大盆雜草呀~

結果係點......當然志在參與,體驗過程先係重點,平日又點可以隨隨便便咁係公園除雜草呢,所以絕對係一個好玩嘅活動~

玩完刺激遊戲,我地就去餵飼山羊~


之後就跟導師去參觀菇棚,聽聽導師分享菇菇嘅小知識~





最後,我地就去旁邊嘅農莊,有得買當造嘅有機蔬菜呀~

一見到有得拔蘿蔔,小小豬又點會放過依個機會,佢都拔左三條蘿蔔呀~


仲買左少少生菜,加埋都只係$20,真係超新鮮又勁抵呀~

跟住國王嚟親親大自然,體驗農場活動,又可以滿足整菇菇,小小豬就緊係超級開心。不過其實我自己都有得著,因為係一個舒服又清新環境玩大半日,自己心情都可以舒暢啲,人都輕鬆啲呀!

【編按:以上內容為作者之個人意見及立場】

相關文章

【學生津貼】本學年起$2500學生津貼恆常化 一文睇清申請攻略!

【早產兒小秋彥】秋彥連續四日有尿仔 爸媽:謝謝大家繼續祈禱念經

【秋系換裝】啞緻的NARS柔霧完美粉底液!打造天鵝絨霧面妝感

【內有不良坐姿示範】設計師發明「矯正坐姿椅」 學生單膝下跪上堂?

緊貼新冠肺炎最新相關資訊