2016-11-29

11.3K

帶著小B去旅行:申請護照篇

20161129_passport01

小JM出世嗰陣我同老公無第一時間為小JM申請護照,一來唔想抱住小JM拎完出世紙又要好趕咁去整護照,二來亦無打算頭半年會帶小JM出國,所以一路都未整。

 

直至十月份,爸B媽咪去完個日本就發覺原來唔帶小JM係會好痛苦架,係一陣陣「相思之苦」!成日都會好掛住小JM,會諗小JM做緊、有無乖、有無食飽之類之類……正正因為呢種「苦」,所以我同爸B決定要為小JM整返本護照,等來緊十二月可以一齊去台中探朋友兼過結婚週年添!(三人行嘅結婚週年)

 

其實為小JM申請護照唔算難,只係需要網上預約同做啲簡單既手續就可以,真係好方便,最緊要就係預先上網做定預約,就可以節省好多輪候時間。

 

網上預約知多啲

網上預約申請護照服務 (含連結)

.預約服務分為兩類,而所需要資料亦會有少少唔同,所以預約時就要小心

.一般可以預約的日期為二十四個工作天,所以要自己預返日子同時間,同時星期六會比較難預約

.如果預約後需要更改或取消,亦可以係網上作出修改

.除了網上預約,亦可以透過電話進行預約:2598 0888

 

類別一):所有人士適用,但由出生翌日起計至第四十二天的新生嬰兒除外

類別二):在香港出生翌日至第四十二天的新生嬰兒適用

 

如果係為小B申請而小B已大於42日的話(以小JM為例),就應該以類別一的分類去做網上預約。

 

進行預約時需要輸入以下資料:

- 申請人HKID號碼 (如果小B未有HKID,就要輸入爸B/媽咪既HKID號碼作)
- 申請人HKID簽發日期
- 小B出生日期

 

*見下例參考圖

20161129_passport03

 

查詢號碼係由自己定,輸入四位數字就可以架啦,可以方便之後再查返紀錄嘛!

 

完成資料輸入部份後,就可以揀預約的辦事處,再揀埋日期同時間就可以遞交預約申請架啦!

 

預備申請文件

完成網上預約後,就需要為小B準備申請文件,仲要帶小B去影相鋪影返張靚靚相添!

 

申請文件如下: (以下資料以小JM為例,小JM係無HKID架!)

- 表格ID 842(適用於16歲以下兒童的本地申請書)

- 表格ROP 3(適用於無HKID的小B們,另需要多一張相片,即總數兩張)

- 表格ID 641(副署師項表格;需要貼上小B照片,及由父母以外的第三者簽署,而簽署必須跨越照片

- 出世紙正副本 (如忘記印影可於辦事處影印)

- 爸B 及 媽咪的HKID

(前後總其需要 3 張相)

 

** 注意 **

必須係遞交申請當日領取證件當日帶同小B同行 (其實一次就可以了)

 

護照相片規格及注意事項

相片規格:

- 相片大小為 40cm (W) X 50cm (H)

- 需要清楚展示申請人既正面

- 白色背景

 

注意事項:

- 相片中的申請人必須於相片正中位置

- 頭髮不可擋住眼睛 或 眉毛

- 不可太光、太暗、有陰影或反光

- 如果有戴眼鏡既話,眼鏡盡可能唔可以擋住眼睛

- 如果小朋友要紮辮既話,就要用黑色橡筋 及 不可配戴頭飾

* 基於照片有得到規格,為左方便起見,建議帶小B去特定攝影專門店影。有啲專門店甚至會有Package,提供埋數碼相片檔案,當然,價錢就可能比普通相片貴少少啦。

 

小JM今次都係去咗專門店影,因為門市太多野吸引小JM啦,真係要花好多時間先捕捉到小JM望鏡既時刻。我地今次Join咗Package,要埋數碼相底,大約HKD 85就有一隻CD連 8 張證件相啦!

 

遞交申請當日既流程 及 收費

當日流程相當簡單,只要係預定時間內到達辦事處排隊,並到指定窗號 (1、2號窗)遞交申請文件,遞交文件後將會獲得籌號。之後就係等工作人員叫籌號,再簽名同核對資料,當然工作人員亦會對照一下小B嘅樣同張相係咪同一個人啦!

 

完成晒之後就只需要等嗌名俾錢,咁就完成晒架!俾完錢之後就會得到一張領證通知 (如下圖),爸B 媽咪們就要記得收好張收據啦,唔係一陣唔見左無得拎就唔好啦!

20161129_passport02

 

收費如下:

小B們的護照有效期限為五年 (十六歲以下兒童)

- 三十二頁 HKD$185
- 四十八頁 HKD$230

 

因為小B們大得比較快,所以我地只係幫小JM申請左 32頁既護照咋。順帶一提,申請護照後會有埋HKID俾埋小B架,所以爸B媽咪唔需要另外再為小B申請。

 

趁著仲有半個月時間,等媽咪我為小JM打點一下旅行嘅裝備同日用品啦,最緊要就係帶小JM鍾意嘅小食,睇來,又係時候準備為小JM入貨啦。

 

【編按:以上內容為作者之個人意見及立場】

相關文章

【海外升學】二零一零年全英最佳私立學校排名 升讀英國學校要點揀?

【閱讀習慣】BB的圖書選擇?內有不同階段的圖書推介

【生活有態度】展現不一樣晚年!老友記也Cosplay玩轉世界名畫

【可愛長輩】爺爺幫孫女簽手冊 簽名內容惹笑眾人

緊貼新冠肺炎最新相關資訊