kimfamilytravel, Author at BK Milk ‧ 親子語
 

Posted on April 11, 2019 By

復活節又到,又係同小朋友去掘蛋的時侯,不過去掘都要玩得舒服,如果要小朋友去同人逼,掘蛋玩到食哂塵,咁又何必呢?!所以我介紹大家去黃金海岸酒店參與「黃金海岸酒店親子尋蛋樂」…

今年係黃金海岸酒店第二年舉辦親子尋蛋樂活動。

除咗有好多復活節主題活動及工作坊,仲會有節日限定食品供應。

仲有恐龍主題遊戲,小朋友就最鍾意!

我哋一到步 Check-in 安頓好之後,就即刻去酒店範圍內的戶外花園玩尋蛋遊戲,姐姐細心地同小朋友講解遊戲玩法。

每人一張地圖,先有幾個小任務要去搵同埋完成,然後先可以去搵蛋,如果可以搵到金蛋(只有一隻)的家庭,仲可以贏到大獎。

我好欣賞他們設計的小任務,因為真的都要親子一組去完成,已非大人撓埋對手站一邊,要小朋友自己去玩。

哥哥同妹妹好鍾意呢個任務,要求自己成組玩一次。

每完成一個小任務,就要找職員姐姐簽番個名作實。

嘩!呢個任務要媽咪抱住哥哥,仲要跳住咁去到終點,哥哥咁大個,真係少D腰力都唔得。

相反妹妹就輕易得多。(我要影相,幫唔到你lu…^.^)

佢哋兩個興奮到急急腳要盡快搵哂8個任務出嚟完成。

最後完成任務,就到指定尋蛋區去搵金蛋!

記住金蛋只得一隻,所以大家要鬧快完成任務同搵出金蛋贏大獎呀!

之後畫面一轉,我哋就到酒店外的「飛天鋼索」玩!

上次到黃金海岸酒店玩過一次,佢哋意猶未盡,今趟要再來玩多次。

起飛前梗係要拍照留念啦!

芊芊經已一D都唔驚,仲話要飛多幾轉!

唔好俾佢停,玩完飛索再番入去酒店玩戶外遊戲。

每一次酒店設計的戶外遊戲,都俾我哋驚喜。

其中一個用瑜珈波當保齡球咁碌

仲要係碌低恐龍超攪笑!

最後都不敵三隻大恐龍,打佢哋唔低!

雖然碌唔低佢哋,但係都可以一齊影番張相呀!

轉個頭輪到哥哥,佢大力一掉即刻隊冧幾件。

跟住去玩障礙遊戲,仲可以著起恐龍裝玩㖭!

呀芊呢個造型應該係條飛龍!

穿過障礙再去波波池搵恐龍公仔。

跟住又到哥哥出場,佢著起呢套恐龍戰衣,真係惹來全場大笑。

連佢自己都玩咗好耐,先至發現原來有對假腳在自己前面。

跟住接住去玩人肉彈床,小朋友要預先穿起魔術貼戰衣上去玩。

唔單只可以將個波黐上去。

仲可以將自己都黐埋上去。

當然唔少得係充氣淜梯啦!

今次滑梯仲勁斜,超級爽皮!呀芊來回玩咗數十圈!

玩到身水身汗,到要來個break上房抖一抖。

一如以往,舒適房間搭無敵靚景,真係度假Mode開動。

佢兩個真係勁量電芯,一坐低就拎起頭先尋蛋贏的獎品,拆出來即玩!

今次住宿計劃分別有兩個Workshop,其中一個係「發掘恐龍化石工作坊」。

兩個著起成副武裝,又真係幾似模似樣喎!

小朋友要用工具又揼又掃,將恐龍化石搵出來。

最估唔到係…咁多小朋友之中,完成得最快竟然係呀芊。

哥哥好努力咁慢慢揼。

芊芊望到左右隔離咁慢,覺得自己好勁!

終於集齊11件恐龍化石,然後就可以砌番完整一隻恐龍骨。

小朋友可以化身成考古學家,個個都好投入去玩。

如果連續入住兩晚,仲可以參與埋「復活兔杯子蛋糕製作坊」

張相當然係樣板啦!唔知哥哥同芊芊可唔可以整得咁靚仔呢?

著起圍裙同埋廚師帽。

開始幫預先焗好的Cup Cake塗上Cream。

芊芊細心地加上適量的椰絲。

加埋對眼仔同鼻哥,成個樣就出來啦!

小朋友指定動作…偷食!

芊芊完成啦!加埋對綿花糖耳朵,又真係好可愛喎!

哥哥都完成啦!但隔離有位小姐好似已經開動食緊…哈哈~

最後就介紹番復活節自助晩餐, 簡直就係我同媽咪最期待的一餐。

成個下晝都放電,玩到身水身汗,夜晚最正就係可以嘆番一餐咁豐富的自助餐。

我話過呢晚一定要一個人拆夠10隻蟹腳!

仲有靚靚壽司!

當然唔少得超精美的甜點!

聆渢咖啡廳Cafe Lagoon的自助餐,其中最出名不過就係設有戶外燒烤區。

我哋唔客氣啦!準時 6:30 起動…

今年復活節(4月15日起),聆渢咖啡廳Cafe Lagoon更會加入日韓主題菜餚,仲設計咗幾款精緻食品,超適合一家大細。

最吸引我係呢款水果壽司,壽司用的飯唔係米飯,而係常於甜品用的糯米,食落超煙韌好味,哥哥見到有芒果都即刻引唔住要多件。

嘩!饅魚仲大舊過D飯,你見過未?!我依家見過啦!

睇得又食得的蛋糕甜點。

食到飽飽番入房前,要特別介紹一下呢部Well#自助飲水機,其實好些年前已介紹過

所以話黃金海岸酒店真係走在最前,為咗嚮應環保,房間不設礦泉水供應給住客,大家要自備水樽到Well#智能添水站斟水飲啦!

信和旗下6間酒店(當然包括黃金海岸酒店)已安裝近100部添水站計,兩個月內已累計減省了12.7萬個塑膠瓶,料全年可節省膠瓶達160萬個。

到咗第二朝早,大家都瞓得好好又舒服,真係叉足電!

落嚟再嘆番個自助早餐。

甚少入鏡的我都住得好滿足好開心。

享用過美味早餐後,我哋就到哥哥呀芊至愛的「鯊魚冒險島」玩個夠。

今次同埋成班老友嚟玩,真係開心好多!

身後兩位小朋友是做甚麼?玩斷背嗎?還是前面三個較正常,哈哈~

依家復活節都有機會熱到溶,所以大家不妨都準備泳衣,來到黃金海岸酒店,可以提早下水禮。

仲有凡預訂尊尚海景客房連露台*,即可免費享用沙嗲軒復活節晚餐乙客,價值港幣$436喔!

*視乎房間供應情況

Photo & Video by Sony A7III FE 16-35mm F/2.8 & GoPro HERO 7

呀劍評分: 10

呀劍評語: 每次來到黃金海岸酒店,就好似回到老家,大部份酒店職員都幾乎認識,他們都看着哥哥跟芊芊長大,真係體驗到甚麼叫賓至如歸。雖然來了數次,但每次同樣給我們驚喜及愉快的兩日一夜,真的…再次多謝黃金海岸酒店。

復活節樂滿「Fun」住宿計劃 簡介

踏入活力無限的春季,酒店亦為大小朋友準備了豐富的節日美饌及復活節樂滿「Fun」住宿計 劃;還有第二年舉辦的「黃金海岸親子尋蛋樂 2019」,小朋友可與爸爸或媽媽合作,於草地上 找尋過萬隻彩蛋,贏取超過四萬份及總值港幣六十萬的獎品,綻放笑臉。

推廣期

2019 年 4 月 12 至 4 月 28 日

復活節樂滿「Fun」住宿計劃適用於兩位成人及一位三至十一歲之小童。第二位小童入住則每 位每晚額外收取港幣$400 起(另收加一服務費)。住宿計劃客人更可以優惠價享用自助晚餐, 兩位成人及一位小童只需港幣$1,200 起。

【免費晚餐優惠】凡預訂尊尚海景客房連露台,即可免費享用沙嗲軒復活節晚餐乙客 (價值港 幣$436) 供 2 位成人及 1 位小童享用

更多詳情

http://bit.ly/2Uxazz3

地址

屯門青山公路青山灣段 1 號

鯊魚冒險島遊樂場

開放時間

10am至10pm(每節50分鐘)

收費

酒店住客: HK$100 / 50分鐘

非酒店住客: HK$150 / 50分鐘

* 以上收費為一位成人及一位小童
* 凡預訂於「酒店優惠」網頁內所列出的住宿計劃,可免費暢玩乙節

兒童小火車

開放時間9am至12nn 及 2pm至6pm(來回大約10分鐘)

收費

酒店住客每次$40/ 非酒店住客每次$60

至Kids遊樂園

開放時間9am至6pm

免費

*詳情請參閱主題客房計劃內容或遊覽以下網址:

https://www.sino-hotels.com/hk/gold-coast/tc/facilities/

使用設施前,需向職員預先登記

電話

2452 8888

網址

https://www.sino-hotels.com/hk/gold-coast/

(以上資料更新至文章當日)

Facebook專頁: 呀劍萬帥 kimfamilytravel

Blog網誌 : www.kimfamilytravel.com


Posted on March 22, 2019 By

真係一個節日接住一個,好似農曆新年過咗冇耐,話咁快又要迎接復活節啦!提到復活節就梗係一定要去香港迪士尼樂園一年一度盛事「迪士尼巨星嘉年華」啦!

原來都有兩年冇去過香港迪士尼樂園搵花蛋,見距離考試仲有少少時間,一於同佢哋兩個開戰之前入去玩下開心下!

早一個星期預告佢哋知,會入香港迪士尼樂園玩,兩個開心到不得了!芊芊話「好耐都未去過啦!」(其實剛剛聖誕先去過…)

今次到樂園看見好多Duffy and Friends,佢哋見到廚窗就話未有呢隻未有嗰隻…

我就即刻話「不如我哋去搵花蛋囉」轉移視線,哈哈~

不過襯早上人唔多,就梗係先去連玩幾個平時成日排哂長龍的遊樂設施啦!

之後我哋就邊行邊搵花蛋!今年多咗好多唔同迪士尼朋友的花蛋,加加埋埋有超過100隻,佢哋兩個發現到勁開心。

今日天氣真係超好,雖然有D熱,但係總好過落雨呀,熱咪有藉口俾佢哋買雪糕食囉!

其實我哋仲有好多遊樂設施未玩過㗎!好似「迷離大宅」、「泰山樹屋」、「森林河流之旅」等,今日開住香港迪士尼樂園手機APP,早計劃好每個行程,所以可以去到更多地方。

又發現到兩隻新花蛋啦!

之前芊芊一直都好怕坐船,我同佢講職員開船技術好好㗎,一定唔會暈船浪!

結果佢肯上船仲玩得好開心!

玩咗大半日後,就同佢哋兩個去Shopping,因為之前芊芊默書第一次攞到100分,所以就應承咗佢,可以送佢一份小禮物!(當然哥哥都有份啦!)

哥哥話我之前拎咁多次100分都冇嘅!因為少先至昂貴嘛…(希望佢唔好因為咁下次拎個零分番嚟!)

店內仲有好多復活節限定商品,全部都超可愛喔!

本來想同破壞王影相,不過嚟遲一步,好快就已經滿額截龍…(見有個爸爸早咗個半鐘去排定隊,真係無得輸!)

無辦法啦!同花蛋影相一樣咁開心。

玩完買完仲可以睇埋下午花車巡遊,真係好開心好滿足呀!

平時來都係多數睇晚上的花車巡遊,其實日間的都一樣咁精采好睇。

睇完巡遊我哋就即刻行番出去,乘搭度假區酒店穿梭巴士,因為我哋預約了到「迪士尼探索家度假酒店」的餐廳食Tea。

平均10-15分鐘一班超方便!計好時間一來到就啱啱好有車上。

第一次來到酒店(還未到過住宿),哥哥同芊芊都好開心,以為可以入住酒店…

不過因為佢哋好肚餓,所以後來同佢哋講其實只係來食Tea,都冇失望仲好興奮!

酒店大堂超美的喔!

仲可以同高飛合照!

餐廳就位於2樓,只要落一層就可以。

今次我哋要去的係「芊彩餐廳」,我同芊芊講話間餐廳個名有個「芊」字,跟住佢仲以為我係講笑,然後見到自己個名就更加開心!

今日正主理「Duffy and Friends Tea Party」,可以一家人來個自助下午茶,老婆同小朋友都好開心!

哥哥同芊芊坐低後知道原來係自助餐,兩個都興奮到不得了。

仲要係妹妹鍾意嘅Duffy and Friends。

這個特色飲品我起初以為係士多啤梨汁,原來係集合咗多款水果而製成,超好飲呀!

食物仲好多選擇,老婆最鍾意呢個意大利薄餅,佢大讚又靚又好食!

食得下午茶,甜品一定唔少得啦!

全部都係超可愛造型。

仲有「Duffy and Friends」的Macarons,見到都唔捨得食喔!

好失禮咁夾到成枱都係!大家放心,最後全部都食得哂㗎!

開餐起動,我哋唔客氣啦!

一家人雖然在一起已經好滿足,不過有陣時去好地方食餐好,大家都會更Warm㗎!

見住佢哋兩個食到唔停口,做父母就最滿足啦!(成日驚佢哋唔夠飽…哈哈~)

食飽飽後,打算番去樂園再玩,見穿梭巴士未到就再入店內逛逛!

番到香港迪士尼樂園,我哋就繼續去玩住搵花蛋,一入園區就見到小仙子,仲記得以前唔係放呢個位置,所以每年入嚟搵花蛋都一定好有新鮮感。

新朋友仔呀!「銀河守護隊」的Groot及Rocket呀!

當然唔少得Incredible啦!

搵完花蛋再反玩幾個遊樂設施,今日真係開心又滿足,我問芊芊今日開唔開心,佢都不停答我好開心x100,跟住我就話「咁可以番屋企開始溫測驗啦!」

秒down…

睇下今日佢哋影嘅相,就知道佢哋有幾開心啦!(全部自導自演自求拍攝…哈哈~)

Photo by Sony A7III FE 16-35mm F/2

想跟我去體驗其他活動,快D報名親子團,同埋留意專頁公佈詳情啦!

http://goo.gl/forms/CNZMEPoMIWkouK8o2

呀劍評分: 10

呀劍評語: 今年多咗好多迪士尼新朋友花蛋,仲有放嘅地方都唔同咗,包保入去搵花蛋仍好有新鮮感。

迪士尼巨星嘉年華

踏入繁花似錦的爛漫春季,香港迪士尼樂園春日盛事「迪士尼巨星嘉年華」,定必滿足你對春天的各種奇妙遐想;由3月7日起至6月26日,快相約家人好友同遊,感受香港迪士尼樂園世外桃源般的愜意春日。

*「奇妙處處通」會員專享限時「好友同行」優惠,以每位減免港幣$200攜同好友入園暢玩。

(以上資料更新至文章當日)