茄莉姨姨, Author at BK Milk ‧ 親子語
 

Posted on March 8, 2019 By

好多人都話好難搵人拍拖,搵極都無人啱,由其是女人年過三十,身材同樣貌都好易開始走下坡。有JM呻,人到中年仲未有拖拍,去過好多次Speed dating都唔成功,大家食完飯又係一個人回家,沒完沒了。而且同事大部分都已婚仲生埋B,當大家都傾緊湊仔經嘅時候,作為剩女又有咩好講呢?各位剩女唔使灰心,JM們都出謀獻計,一齊睇吓剩女點樣出Pool:

叫朋友介紹:

朋友介紹有個好處,就係有共同朋友,起碼初步知道佢平日份人係點。為咗終身幸福,不妨叫佢哋幫手留意下,佢哋有時可能係驚你唔鍾意佢哋做媒人所以無主動介紹啫。

去參加多啲男仔參加嘅活動:

去啲多男仔嘅活動,潛水、camping、行山呢類,增加接觸男仔嘅機會!有朋友仔真係得咗,上年年尾結咗婚,個男仔仲要係初戀。朋友仔就係老手,N戀。而家拍拖到結婚1.5年。

可以參考多個勵志故事:「我個fd 係矮小 160磅。中女,身材差,樣貌坦白說係差…已好多年單身,但佢上年走去做gym,行山, 同d男人 一齊操肌肉,玩埋一堆。點知識左個gym 友嘅中醫師朋友…今年結婚閃婚…」

主動:

所謂男追女,隔重山;女追男,隔層紗,唔好畀傳統嘅觀念束縛住。試咗唔一定成功,唔試就一定無行!

去一些朋友聚會或Speed dating,唔好掛住食野或者唔同人傾計互動!成日話:「自己有參加活動架,但唔得咋」,其實咁樣只係個肉體參加咗,心態根本未ready!

打扮好自己:

Speed dating好講第一印象,人哋未識你之前第一眼就係你嘅外表。唔係話要靚,但至少要打扮一下,畀人感覺你重視今次Speed dating同埋乾淨係好重要!

做唔成情侶都可以做朋友:

有時你睇唔上眼既男人,其實都可以做朋友,當然傾唔埋就無計啦。做朋友唔係想當佢係後備,而係識佢地嘅朋友!

「你睇唔上眼既男人佢地都會有朋友,朋友識朋友,佢既男性朋友可能係你鍾意都唔奇,男人除左男朋友仲可以做朋友。我老公都係咁識返黎!係一個我睇唔上眼連我朋友都叫我唔好彩佢既男人,因為佢太矮同太煩,不過我當佢係普通朋友咁聽佢吹下水,之後佢覺得我好好人肯彩佢,佢介紹左我而家老公比我識。」

 

好多人成日講「搵極都搵唔到」,其實係唔會去到「極」,只係未搵到。覺得想要,但未得到,就要再堅持。唔好成日認為已經好努力,做左好多野,但其實仲有野可以做架。加油啊各位JM。

即上討論區一齊傾


Posted on March 7, 2019 By

生幾多個先夠晒數?想追第二個或以上,除咗要睇自己嘅意願之外,兩個小朋友年齡嘅年齡差距亦都係考慮因素之一?有JM開POST問,如果而家生小朋友,大仔就會同BB 相差七年,擔心到時會有代溝、餵奶揀幼稚園又要重頭來過,唔知會唔會應付得到。

正所謂「三年一代溝」,七年已經有兩個代溝了。兄弟姊妹年紀差咁遠,又可唔可以和平共處呢?

:多個人照細佬妹

有JM嘅兩兄弟相差9年,大仔year 1,細仔仲係小學生,大嘅可以教細嘅做功課,簽手冊,幫手接送,陪練琴,幫輕唔少!不過呢個好處呢,好視乎個大嘅鐘唔鐘意細嘅,唔一定保證到!

而且佢哋年齡唔同,對玩具嘅要求都唔一樣,唔使驚佢哋乜都爭餐死!

壞處:有代溝

雖然佢哋因為爭嘢而打交嘅機會大大減少,但隔咁遠佢哋都未必係玩伴,個大嘅只會多左份責任。爸媽要諗一些地方啱大B同細B玩亦都無咁簡單:「當細B需要去公園,大B已經唔中意玩公園。自己走去打籃球。好的是可以少理大B, 但少好多機會一齊玩。」

點都好,唔少JM都覺得,兄弟姊妹感情都係睇緣份,無一定好定一定唔好。小朋友相處係睇性格,唔係睇年齡:「我大女17歲,2女10歲,細囝2歲。大女同2女成日傾密計,唱下歌咁。有時會嗌交,轉頭攬頭攬頸。大女會幫手湊細囝,細囝好鍾意大女。2女會同細囝玩,但會爭野玩。細囝會哈2女,但2女講攪笑野佢就笑到卡卡聲。感情係點,睇你點教,唔好偏心,唔比較。

就算係相差兩年都好,都唔一定保證啱玩吧?與其在意年齡差距,不如諗吓點樣教好佢哋好過!

即上討論區一齊傾

 


Posted on February 28, 2019 By

香港人最鐘意就係去旅行,無論男女老幼都想遠離一下人多車多嘅香港。去旅行呢,又有分跟團同自由行兩種,雖然而家興自由行自己PLAN行程,但都仲有唔少人貪方便跟團。

跟團要焗住同唔識嘅人一齊玩幾日,如果夾嘅話就好開心,唔夾嘅就頭痕了!有JM就分享佢哋跟團嘅難忘經歷,睇到我大跌眼鏡,呢啲經歷自由行一定無可能遇到!

 

1. 一圍枱食飯,畀人食晒啲餸!

參加旅行團通常都要同團友一圍枱咁食飯,遇着的大食又唔禮讓嘅團友就真係自求多福了!有朋友試過同一班大隻佬同枱,次次一開飯就畀佢哋掃晒啲餸:「同枱仲有對老夫婦,老夫婦話老人家唔餓得,咁父母就同領隊講下一餐飯有無得調位,領隊話劃左位無得調,但會諗辦法。到第2餐飯,啲餸都比果啲人掃曬,領隊搵左啲細食的組,分啲餸比佢地。」

就算你係大食都唔緊要,做人最緊要有修養,為他人着想,留返幾舊畀人都好掛:「團入面有4個女仔、似是新移民女仔唔係土生的。食嘢時將自己想食嘅嘢掃晒落自己個碗,我哋真係一舊都食唔到,幾餐都係咁。跟住同領隊投訴,領隊又話安排唔到。好彩後尾幾日有時係食自助餐。」

 

2. 同團嘅男人唔係細路爸爸?

同團有一對夫婦加一對仔囡,JM就主動同小朋友傾計,講開「你爸爸……」,個小朋友就好大聲講:「佢唔係我爸爸!」

咁都未算特別,回港後佢哋出來約食飯,個媽媽叫JM唔好亂講嘢,同媽媽一齊出來嘅係第二個男人,果個至係爸爸。唔怪之得個小朋友咁大反應,偷食都行遠啲,仲帶埋對仔女去!佢地兩間房,仔女一間,佢同個男人一間,小朋友當時係讀小學。

可能小朋友當時細唔會知發生咩事,但大個諗返起唔多唔少都知係咩一回事掛?親眼見住爸爸畀人背叛,對小朋友來講或者會成為佢一世嘅童年陰影!

 

3. 無家教小朋友現晒形

跟團係可以睇到好多無家教嘅小朋友,父母仲要縱容佢哋,最終嘅受害者就係身邊嘅團友!

「有次去跟團,我哋食飯時被編固定同一個有兩個仔(十歲上下)嘅家庭坐。一坐低個阿爸就宣佈「而家去旅行,你哋做乜我都唔會鬧,有乜事等番到屋企先打餐勁」,結果阿爸講得出做得到,個兩個仔玩到痴曬線,試過玩餐枱上個酒樓個啲轉轉盤,喺有餸既情況之下狂轉個盤,啲餸飛曬出黎,個阿爸都唔出聲。。。」

 

4. 日本領隊負傷帶團

日本人對工作認真,甚至為咗工作,受傷都面不改容:「幾年前跟日本一個local tour由新宿去白川鄉,導遊講英文同日文,我諗個團十零人,團友中冇香港人,強國人,個導遊大部分講日文,同我地就講英文,好好禮貌,照顧周到,帶住我地行黎行去,點知食晚飯時,我見佢喺出面坐埋一邊,原來佢隻腳受咗傷,腫晒,包住咗,但開工時都塞落皮鞋度,同埋佢無畀我哋察覺,佢嘅專業令我汗顏……」

 

雖然跟團遇着啲衰團友真係喊3聲!不過都會有唔少人返到來都會成為朋友,約埋下次一齊再玩過!

即刻入討論區一齊傾


Posted on By

愛情係一門要終身學習嘅學問,就算係結咗婚,都唔代表大團圓結局!有JM就喺討論區分享喺愛情路上嘅忠告,未拍拖/拍緊拖/結咗婚嘅你哋都值得睇吓!

 

1. 要有自己生活圈子

好多時一全程投入去愛一個人嘅時候,都會淨係識得為佢付出而唔記得咗自己。例如為咗佢而斷絕同朋友來往、改變自己嘅衣著風格、唔做佢唔畀你做嘅嘢(不論幾無理都好),無晒自己本來啲生活同性格。

唔好以為你做到佢嘅要求,佢就會更加愛你,錯錯錯!男人對於輕易得到嘅嘢,係唔會珍惜。如果你完全聽晒佢話,佢又唔會遷就返你嘅話,關係已經開始唔平衡。當你成個世界都係佢、你要依靠個個人先生存到嘅時候,萬一佢離開你,咁你點算好呢?記住無論拍咗拖或者結咗婚都要維持自己嘅生活圈子,唔好將愛情睇得太重,勿為他人忘卻自我。

 

2. 寧缺勿濫

呢四個大字終身都適用!唔好為拍拖而拍拖,為結婚而結婚,否則只會徒添痛苦。結咗婚之後兩個人愈行愈開、出軌嘅個案比比皆是(可參考夫婦情感)。

與其同一個唔鐘意嘅人結婚,不如畀多啲時間自己搵一個更加夾嘅人。千萬唔好為嫁得出而嫁,婚前明知對方缺點多多都嫁,妄想改變對方,婚後情況一定只會變得更差。

 

3. 自鐘意小朋友先好生

有唔少人可能因為家庭壓力或者人云亦云而去決定生小朋友,又或者覺得自己呢個年紀係時候生小朋友就去做。

記住記住,無論你幾有錢都好,你要先問自己:「自己鐘唔鐘意小朋友?」生咗個小朋友,佢就係屬於你,你要犧牲你所有時間去幫佢餵奶、換片……你有準備照顧佢一生一世未?

 

4. 學識止蝕離場

拍拖嘅時候,唔好咁快鐘意一個人,死心眼認定佢。要不斷觀察佢嘅人格點樣,真係有問題就cut loss。帶眼識人,唔對路即走。千萬唔好一味愛愛愛,盲目包容和忍耐,咁樣只係晒你時間和流多d眼淚。

撞到賤男,飛佢就飛佢,唔好心軟。結咗婚亦唔好死忍,與其大家辛苦,不如快刀斬亂麻,一時的痛苦好過你忍一世。

 

5. 揀老公並唔係睇佢搵到幾多錢

搵男友、搵老公唔好淨係睇人哋搵幾多錢,而係要睇人哋肯洗幾錢係你身上/喺個家庭度。例如有個男人搵10萬一個月但只畀5千家用;同有個男人搵3萬一個月但肯俾1萬5千家用,已經好大分別啦。人哋搵得錢多又唔肯洗錢喺你身上,又關你咩事呢?

 

道理大家都明,但實踐起上來並唔係咁易。希望各位JM 都可以搵到屬於你嘅幸福。

即上討論區一齊傾


Posted on February 26, 2019 By

相信大家都聽過「養兒一百歲、長憂九十九」,生B絕對唔係一個剎那間嘅動作,而係一個一生一世嘅責任嚟!十幾年前嘅廣告都話,養大一個小朋友要四百萬,養多一個並唔係多雙筷咁簡單!啱啱結咗婚嘅姐妹們,有無諗過自己生幾多個?

正所謂針無兩頭利,好多JM都有講低佢哋點解生一個、兩個或者三個嘅原因,大家可以參考吓:

全文…