艾安素記事本, Author at BK Milk ‧ 親子語
 

Posted on February 14, 2019 By

Pig Pig年快樂!!向來對數字絕緣嘅我,真係數埋腳趾都差啲計唔到自己係第幾年同定咩過新年…

思前想後,經過多番核證後,今年已經係第三年喇!(雖然仲有一絲疑惑,明明係得2歲多啲,點解係第三年…)原來單單睇佢新年表現就知道佢真係大個咗好多;由第一年仲係BB,一舊飯咁任人(我)魚肉;到上年,著起件大到3歲都仲可以著嘅賀年外套,行起上嚟仲一仆一碌;到今年,已經識講新年快樂、身體健康,郁下手仔講恭喜恭喜…

作為阿媽,真係有總「月球一小步,地球一大步」嘅感覺,同時又會諗,可唔可以大得咁快?我仲係好掛住嗰個啱啱識自己揸住奶樽嘅定咩、啱啱識拍下手掌嘅定咩、啱啱…再諗下將來佢會成家立室,有自己嘅家庭…終有一日佢都會離開自己身邊,到時放工返到屋企,開門嗰陣就再聽唔到個仔好興奮咁大叫:媽咪!你返嚟喇!

講到呢度,個心都不禁戚戚焉,仲有啲眼濕濕,雖則其實可能係廿幾三十年後嘅事,但我都開始明,有時阿媽會話諗起你手抱嗰陣,仲好似係尋日嘅事,咁講唔係因為搭咗時光機,而係我哋幾時都咁珍惜小朋友成長嘅每一秒時光。依家成日話學做父母要考牌,以我短短嘅幾年貨仔經驗覺得,如果真係要學,首先就係要學放手,唔簡單,但必須做。

放手畀佢試、放手畀佢跌、放手畀佢飛,幾肉痛、幾唔捨得都係必須要做,不竟佢有佢嘅人生,子女從來唔係要嚟實現你做唔到嘅夢想功具;成長道路上,有時父母或者只係需要靜靜企喺佢身後,擔當最強嘅後盾,話佢知即使風大雨大,都有屋企呢個避風港,加油後再出發,咁就夠喇!

原來有啲感覺,真係做咗人父母先會明…


Posted on February 7, 2019 By

拜年呢個農曆新年嘅傳統習慣,原意係想大家趁著呢個開心嘅日子,探望下好耐無見嘅親友戚友,互相送上祝福,迎接新一年嘅來臨;聽落真係好溫情兼美好,但好可惜幻想同現實總係有一段比較長嘅距離。

做咗阿媽之後,就更加覺得拜年呢個活動,根本就係危機處處!而其中一項「危險物品」,佢嘅名字叫長輩;老實講,真係唔係想無禮貌,但唔知點解一個家族入面,總有兩、三位長輩(有三位以下,應該已經叫好彩。)愈大愈唔化,甚至開始走向恃老賣老軌道……

講到尾,其實大家都係想有個愉快新年啫,後輩要尊重長輩就固之然啦,但想人尊重兼成為好榜樣,各位長輩或者都應該提提自己應有嘅禮儀,注意下以下幾點,咁就大家都開心啦!

1. 麻煩洗手先 — 大家都知道每人身上其實有好多睇唔見嘅細菌,明白有唔少長輩都係新年先見一次,又或者係第一次見到BB,想同BB玩下、抱下都係人之常情,但礙於衛生理由,接觸小朋友之前,大家都應該主動去洗下手先,再唔係做下樣,都搵張濕紙巾抹下手呀,起碼大家都安心啲,咁你都唔會想個小後輩病咖?

2. 謝絕三手煙 — 有唔少煙民家長曾經幾愛呼吸都好,為咗小朋友健康,都戒!戒!戒!就算戒唔甩都,要食都走到九丈遠,食完仲要即刻洗手、換衫,目的都只係唔想殘留喺身上嘅三手煙帶到去BB度;講真,唔係要你為咗我個小朋友戒煙,但你有權食,我都有權唔畀你抱,仲要係啱啱食完,成身煙味嗰啲,妙你都唔好問點解啦!

咁為著你嘅身體健康,當然戒煙係最好啦:)

3. 戒掉你的假幽默 — 唔講唔覺,講開就好覺,原來有唔少媽媽都有呢個經歷,就係遇到啲假幽默親友,唔明咩假幽默?舉個例子就係……
唔好再拎啲小朋友名改花名!!!唔好笑,唔有趣,唔幽默!okey?!

呢樣嘢真係講起就嬲,唔知點解啲長輩嘅創意度咁高,無論小朋友叫咩名都有得笑,有個健字就話賤,有個婉字就係丸,仲要次次講,年年講,咁如果我拎你個名講笑又得唔得先?呢樣嘢唔係長輩講就係笑話,後輩講就係無禮貌啩?

4. 人比人,比死人 — 人嘅一生雖然都好難完全離開比較兩個字,但所謂知足常樂,何必成日坐這山望那山呢?每年新年,一家人聚首一堂,有啲長輩就總係無句好,大大聲話呢個乖,嗰個曳,再唔係就呢個叻,嗰個蠢,其實每個家庭都有唔同教育方法,而且每個小朋友都有自己獨特之處,唔係間學校出名啲就係人生勝利者嘅……

最後,祝大家豬年快樂!希望大家都可以擁有一個真.快樂新年!

 


Posted on February 5, 2019 By

農曆新年將至,唔知各位媽媽準備好迎戰未呢?如果你覺得用迎戰嚟形客係太過誇張嘅話,有兩個可能性,其一係,少女!你太幸福喇~家中大小事務,由內到外都有人幫你安排晒、打點好;第二個可能性係,其實你根本未真正感受到過年嘅威力!例如:親朋戚友都唔太多,無乜人上嚟屋企「打擾晒」,又或者無乜長輩壓力要帶埋阿仔去拜年……

可惜呢啲咁夢幻嘅情節,喺現實確係好少發生,淨係講要出街拜年,已經係件非常極之傷頭腦嘅事,有唔少家庭為免順得哥情失嫂意,仲要一日跑幾場,對於唔少新手媽媽嚟講,首次帶住阿仔阿女去長征,實在係一大考驗!

如果唔想新年喺街一頭煙,周圍鋪頭又閂晒門,唔知點算好,首要係記得睇清楚個百寶袋有無執漏嘢喇!

不能忘記系列 (重要指數: ★★★★★)

乾/濕紙巾 — 其實我明嘅,唔使變做樹我都明嘅,件事係非常唔環保,但有時候,真係無辦法,乾/濕紙巾對於阿媽嚟講,真係空氣一樣咁重要。

圍裙/哺乳巾 — 整日流流長,總有一、兩餐要喺外面解決,唔想小朋友整污糟套新年戰衣,圍裙確係不能沒有;至於哺乳媽媽,就梗係要帶餵奶巾啦,大時大節,哺乳室大塞車,你排得,阿B都唔等得,所以最緊要一巾在手,到時先可以任你行!

食物剪 — 唔少食肆都有兒童餐具提供,但食起上嚟,樣樣都大大粒,對於小朋友嘅櫻桃小嘴嚟講,真係不可能任務,所以必需要帶備小小嘅食物剪,呢個item喺小朋友剛剛開始可以出街食大人嘢嘅時候,屬於經常被遺失嘅物件,大家記得準備好喇!

食糧 — 無論奶粉定零食,呢啲日子真係寧帶多,勿偷雞;小朋友對世界嘅要求度其實真係好低,只要有得玩,或者有得食,有好多事情都係可以商量同解決,想輕易解決小朋友嘅壞情緒,食糧絕對幫到你!

紙尿片— 呢個就唔使多解釋啦,同食糧一樣都係寧帶多,勿偷雞;雖則錢解決到嘅問題,都唔係大問題,弊就弊在大時大節,有唔少鋪頭都會放假休息,真係唔係話,要買就有得買,唔想周圍撲,又或者捱貴貨,就記得帶多兩塊喇!

可能係救命符系列(重要指數: ★★★☆☆)

毛巾仔 — 為咗唔使變做樹,毛巾仔就係最好嘅幫手,不過佢嘅缺點係乾嘅時候,未必完全可以抹得乾淨,濕咗又罨住成日,方便度同實用度都比較低。

手部清潔液 — 出到街,唔好話小朋友,就連大人都會周圍摸,遇啱搵唔到洗手間,又急需清潔雙手,進行任何影響到阿B嘅活動,例如:開奶、餵食、抹汗等等,手部清潔液 就絕對幫到你喇。

小被仔 — 除咗出入冷氣地方嘅時候你需要佢,以長征嘅時間計算,小睡片刻對小朋友亦何謂非常重要,有時喺親友屋企,想放低阿B等佢瞓得舒服啲,但又怕生保床一放就醒?私家小被話唔定可以提高佢嘅安全感,等佢差足電,迎接下一場大Project。

後備服裝 — 講到小朋友去街街,周不時都會整污漕啲衫,無論玩到出晒汗、食嘢整污漕,更大鑊嘅尿片滲漏、嘔奶,帶多套衫絕對係明智之舉,而媽媽都唔好大意,為自己準備多件上衣就最穩陣喇。

玩具 – 呢個就要好睇小朋友性格,有啲鍾意玩玩具,有啲鍾意食嘢,主要用途都係防止佢坐得耐,開始悶,周圍搞搞震。

或者幫到你系列(重要指數: ★★★★☆)

掛勾 — 平日帶住小朋友出街已經夠晒一抽二褦,加上新年,有時候親友間都會互相送下年餅,之但係左一盒,右一袋可以點搞?呢個時候掛勾就會係你好幫手!

塑膠袋 — 同阿仔阿女出街製造嘅垃圾可以話係上千計,唔想啲垃圾左塞右塞?又抑或考慮到衛生問題,換完片唔知點處理?最好都係帶定一啲重用塑膠袋,仲可以放骯髒衣服或者任何污糟物品添。

暖水 — 其實有唔少地方都有暖水提供,之但係世事就係永遠你要用嘅時候搵唔到,所以最好都係帶備適量暖水,除咗沖奶同畀小朋友飲,有時喺街外食物太油或者太濃,都可以先浸一浸再畀小朋友食。

口罩 — 踏入流感高峰期,帶住小朋友出入多人地方,最好都係袋定個口罩,保護自己最實際。

應節系列(重要指數: 5★+ 潛力不能估計)

利事袋 — 最後梗係要為小朋友準備個常滿利事袋啦,你覺得聽落有啲巿懀?查實佢真係有實質用途咖!特別係比我呢啲新手又論盡阿媽,阿仔一邊逗,我又一邊派,真係試過喺個袋入面撈亂晒,要分返開+搞清楚個銀碼,實在係頭都大埋,唔通真係要逐封開…=_=”


Posted on January 20, 2019 By

呢幾日人人都搵返啲舊相出嚟,對比自己十年間嘅變化;講到要搵舊相,以前可能有啲難度,但今時今日,有網上平台嘅你,要搵張相,簡直毫無難度!至於呢個方便…… 確實令人又愛又恨,有時佢自己彈出嚟嘅動態回顧,更加係不堪入目。

講返睇舊相,望住自己同身邊人嘅面容轉變,其實最大變化嘅就係依家廿幾歲嘅新一代,講到自己,呢啲數埋都3字頭嘅80後,其實10年前個樣都大定晒啦,基本外表上,除咗多咗兩條眼紋,真係變化不大,反而係心態同身份,就真係坐上咗璀璨又刺激嘅過山車!

由初出茅蘆,到做咗人阿媽,經歷會教曉你好多事情,咁啱今日就喺抗癌少女李明蔚專頁上睇到呢句說話:「曾經太過堅強,但原來這是逞強,其實只會讓自己很累!有朋友提醒了我,其實你是可以脆弱的!」,的確做人係需要有脆弱嘅時候,就係要脆弱過先識得點樣堅強!

而呢個思維模式,有時我都會套用嘅同阿仔「講耶穌」,方面,例如:你絕對可以有情緒,可以唔開心,甚至可以發脾氣,但大前題係唔可以傷害別人,更加唔可以傷害自己!講到尾,做人唔係下下要做到100分嘅!

數數手指,下個十年阿仔將會係十二歲,到時感受應該更深!


Posted on January 18, 2019 By

踏入流感高峰期,以前對傷風敏冒可以話零警覺嘅我,雖則到依家對病菌嘅敏感度都係極其咁低,有時候咳到斷氣都懶得睇醫生,但一聽到幼童係流感高危嘅染病人士,嚴重會引起肺炎、腦膜炎,更有機會出現死亡個案,啲阿媽神經就即時好似蜘蛛絲咁爆晒出嚟!

全文…

 
© Baby-Kingdom.com Limited. All rights reserved.