KinseyMaMa, Author at BK Milk ‧ 親子語
 

Posted on July 4, 2019 By

行街市見到好靚嘅節瓜,咁就加埋蟲草花同乾螺頭一齊煲,等兩位老細提高免疫力。咁….依排嘅天氣真係陰晴不定,一時又落大雨,一時又出太陽,咁又真係好容易令人病,佢地一病我就慘啦,所以要趁依家打好個底嘛~

蟲草花就有滋肺補腎護肝、抗氧化、防衰老、抗菌抗炎、鎮靜、降血壓、提高機體免疫能力等作用;螺頭滋陰潤燥補肝腎;節瓜具有清熱、清暑、解毒、利尿及消腫等功效;淮山健脾開胃,其他好處為治療久泄久痢、肺氣虛燥、及消渴尿頻等症;紅蓮補脾止瀉,益腎澀精,養心安神;蜜棗止咳潤肺、化痰平喘功效。(網上資料)

節瓜兩條、蟲草花一両、乾螺頭一両、淮山一両、紅蓮一両、蜜棗三粒及瘦肉約$40~

乾螺頭就先用清水浸泡過夜,等佢浸至軟身~

蟲草花及其他藥材就浸洗一陣~

節瓜刮去外皮後切件~

瘦肉洗淨汆水~

煲內放約2.5L水,待水滾後加入所有材料~

待再次滾起後,繼續用大火加蓋煲約15分鐘~

然後轉慢火加蓋煲多1.5小時~

最後加鹽調味,就可以飲得啦~

溫馨提示:
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!


Posted on June 28, 2019 By

親戚朋友每次見到小小豬都總係會話「仲乜佢咁瘦呀?」「仲乜佢咁細粒呀?」「佢依家係咪讀緊一年班?」,真係俾佢地講到我好似刻薄自己個仔咁仲,雖然我已經成日同自己講「我點湊又關佢地乜事?總之我自己知我照顧得豬仔好好就得,個仔精靈聰明就夠」。但…….老實講聽到有時都會十級嬲呀!

唔知點解隻豬仔食極都好似唔多吸收,所以我都好努力咁周圍搵下有冇啲食譜可以幫到手。就係一次同去相熟藥材店入貨時,同店主叔叔傾開,佢就教我煲依個太子參淮山田七瘦肉湯,可以滋補强壯同時又有助長高,而且對脾胃功能弱,身材偏矮及偏瘦小朋友很有幫助。

一聽到咁就緊係即刻執返份材料試下煲俾小小豬飲啦~

田七除可以止血外,尚有通脈行瘀及造血之作用,能促進小朋友發育長高 、提高學習和記憶能力的作用;太子參又名孩兒參,它不是參科植物,屬石竹科植物,有人參功效但力稍弱,很適合小朋友用;而配太子參、淮山、紅棗及雞胸肉同用,能健脾補氣血,對小朋友發育長高有一定幫助;淮山健脾開胃,其他好處為治療久泄久痢、肺氣虛燥、及消渴尿頻等症;紅棗均補心脾、益氣安神。(網上資料)

太子參15g、田七15g、淮山37g、紅棗6粒及瘦肉約$30(由於係第一次煲田七,唔知係咩味,所以只係煲約四碗湯份量)~

紅棗洗乾淨後去核~

其他藥材浸洗一陣~

瘦肉洗淨汆水~

煲內放2.5L水,然後隨水加入所有材料~

待水滾後繼續用大火加蓋煲約10分鐘~

之後轉慢火加蓋煲多2小時~

最後加鹽調味,就可以飲得啦~

湯嘅味道對於我同老公嚟講都唔大問題,都係普通藥材湯味咁啦。不過對小小豬嚟講就一定唔係好啱飲,因為田七同太子參煲起都會有淡淡嘅似人參嘅甘味道,小小豬就一向唔多鐘意依個味,所以我都要半氹半威迫利誘之下先飲左兩碗(到第二碗時佢習慣左個味就飲得快好多啦)。

可能小小豬都想快高長大,當佢知道個湯嘅功效之後,就叫我再煲多啲俾佢飲,仲攪笑話唔會再怕嗰一陣甘味添。

哈哈…其實佢唔講我都會再煲多幾次,飲多啲就可以快啲增高增磅嘛!

溫馨提示:
– 孕婦及感冒患者不宜飲用!
– 由於個別人仕體質不同,所以大家記得煲之前了解下自己,如有疑問,請先向註冊中醫查詢!


Posted on June 26, 2019 By

街市冇豬肉賣但又想飲返啖湯咁點好?咁就最好嚟返一個素湯,見街市有老黃瓜,就加埋赤小豆同扁豆一齊煲,嚟一個健脾袪濕嘅湯啦~

老黃瓜有消暑清熱、降燥火利水、解毒功效;赤小豆就利水除濕,和血排膿,消腫解毒;扁豆可以健脾和中,消暑化濕;紅蘿蔔利尿消炎;粟米健脾和胃,利水通尿,益肺寧心;陳皮主治脾胃氣滯、脘腹脹滿或疼痛、消化不良;蜜棗止咳潤肺、化痰平喘功效。(網上資料)

老黃瓜一個、粟米一條、紅蘿蔔一個、赤小豆一両、扁豆一両、腰果兩両、陳皮一角、蜜棗三粒~

赤小豆、扁豆、腰果及蜜棗浸洗一陣~

老黃瓜去籽切大塊~

紅蘿蔔去皮以滾筒式切塊~

粟米去皮洗淨切塊~

陳皮浸至軟身,然後刮囊~

煲內放約2.5L水,然後隨水加入陳皮~

待滾起後,加入所有材料~

繼續用大火加蓋煲約15分鐘~

之後轉慢火加蓋煲多1.5小時~

最後加鹽調味,就可以飲得啦~

其實我都有一段時間冇煲素湯,因為我家兩位老細都係食肉獸,總係覺得有肉落肚先叫好,一聽到話係素湯都會有點……。

但今次佢地飲完都話唔錯,清清甜甜又有黃瓜嘅香,每人兩大碗就清晒成煲湯啦!

老公仲叫我多啲煲素湯,咁就可以飲得清淡啲又可以健康啲!(我當然唔介意,只要係地肯飲我就一定會煲,而且煲素湯功序係少啲啲之餘,又可以慳返買豬肉嘅錢嘛…..哈哈哈)

溫馨提示:
– 由於涉及藥材成份,個別人仕體質會有所不同,所以大家記得煲之前了解下自己,如有疑問,請先向註冊中醫查詢!


Posted on By

話就上星期小小豬病左成個星期,冇晒胃口之餘又食左成個星期藥,見到都真係超心痛。終於雨過天晴,依隻百厭豬已經變返隻精靈豬,見佢有返啲胃口就當然要煲返啖湯水俾佢補返下。

剛剛病好就煲啲清清嘅湯,所以就嚟一個合掌瓜馬蹄椰棗瘦肉湯,可以生津之餘又清清熱啦~

合掌瓜利尿排鈉,有擴張血管、降壓之功能。據醫學研究報道,合掌瓜對兒童智力發展影響較大,可以提高智力;馬蹄可以清熱解渴、涼血解毒、利尿通便及幫助消化;紅蘿蔔有健脾助消化、潤燥明目;椰棗有豐富鎂鐵,食物纖維同埋胡蘿蔔素。另外佢嘅糖分係單純糖,所以就更加容易消化吸收,可以減輕腸胃負擔;南北杏可止咳下氣,潤燥消積。(網上資料)

合掌瓜兩個、紅蘿蔔一條、馬蹄約十粒、椰棗六粒、南北杏一湯匙及瘦肉約30~

南北杏及椰棗浸洗一陣~

合掌瓜洗淨去心切塊~

紅蘿蔔去皮以滾筒式切塊~

馬蹄切去頭部及底部,然後去皮~

瘦肉洗淨汆水~

煲內放約2.5L水,然後待水滾就可以加入所有材料~

待再次滾起後,繼續用大火加蓋煲約15分鐘~

之後轉慢火加蓋煲多1.5小時~

最後加鹽調味,就可以飲得啦~

溫馨提示:
由於個別人仕體質不同,所以大家記得煲之前了解下自己,如有疑問,請先向註冊中醫查詢!


Posted on May 16, 2019 By

一提起元洲仔,小小豬就會諗起WWF熊貓,又會諗起上年嚟參加「世界自然基金會」嘅夏日學堂活動。原來話咁快又一年了,今年我地又嚟參加WWF夏日學堂 2019體驗日,學做一個「城市生態學家」呀~

其實依幾日天氣都唔好,我地出門口時都仿然係落住毛毛雨,所以都有一刻擔心會唔會玩得唔夠盡慶。不過好在天公造美,活動開始之時毛毛雨就BYEBYE,又有少少陽光,所以各位大小朋友都可以好投入咁體驗夏日學堂活動。

嚟到元洲仔自然環境保護研究中心之後,第一部分就當然係要乖乖留心聽講解先啦~

導師姐姐先嚟俾一啲Pikachu精靈圖片俾我地睇,嘩….之前都唔係好覺,但原來對比之下,寵物小精靈公仔又真係同平日見到嘅小動物好相似,有齊各樣生物特徵。

當然姐姐俾我地睇係有目的啦,希望小朋友可以平日多留心觀察,就算係一隻十分細小嘅小動物,佢都有特別之處呀~

接住就介紹各種生物類別,好在之前小小豬做專題研習時都有少少認識,所以係玩小遊戲時佢都有答啱,仲玩得好投入添~

之後就集中向小朋友講解浮遊生物~

我地仲學習利用電子顯微鏡觀察海水中嘅浮游生物~

我地依一組就嘅海水就多數係海草,我地見隔離組有小魚添~

雖然都只係海草,不過係電子顯微鏡下睇到一粒塵嘅海草可以變到咁大,都已經令小朋友睇到嘩嘩大叫啦~

之後姐姐仲俾左一隻水蝸牛俾小朋友觀察~

小小豬唔係玩玩下,佢真係好留心咁觀察隻水蝸牛,仲話隻水蝸牛表面好滑潺潺,不過睇住佢好攪笑哦~

之後我地就出去戶外花園,發掘元洲仔生物多樣性,同時亦進行另一個活動,就係去用昆蟲瓶捕捉昆蟲,細心觀察昆蟲特徵,之後就幫佢地影返張靚相,留嚟一陣間整精靈圖鑑用嘅~

真心好鐘意依一個環節,因為正好訓練小朋友要多觀寮周圍環境,同時又可以了解生物同環境嘅互相關係,從而令小朋友學懂對各種生物,甚至大自然都要互相尊重

以小小豬一向粗心大意又唔夠細心,兼又掛住玩嘅情況下,要佢半小鐘內搵十二款生物再去影相,老實講我估佢唔可以完成任務,我仲講笑話佢捉到一隻都算佢叻仔。

係DADDY幫忙之下,小小豬都好努力係花園都好細心咁周圍,終於佢地兩父子就捉到第一條蚯蚓啦~

之後都接住捉到甲蟲、螞蟻、蟬、蠶蟲 …,其中有兩隻仲係小小豬自己搵到,仲一手一腳將佢地放入昆蟲瓶添。雖然最後都搵唔夠十二個,不過小小豬都已經算係超額完成啦…哈哈哈~

我地將昆蟲放入瓶內觀察過後,影完相做完任務之後,就要將昆蟲輕輕咁放回原來位置,一定要好好愛護小動物呀~

之後我地就返回教室,聽姐姐教我地用一啲科學儀器測風速風向同埋海水鹹度及含氧量~

聽完書就當然要親身體驗,先嚟睇下海水鹹度先,不過可能剛剛落完雨,所以啲海水鹹度都唔算太高~

測試海水含氧量~

專用嘅風速測量儀器~

仲利用簡單工具嚟測風向呀~

最後就玩一個關於市區「精靈」尋食物遊戲~

小小豬抽中左一隻市區會出玩嘅蝙蝠(我唔記得左個名添),佢就要係花園內搵小甲蟲圖片俾佢做食物啦~

係戶外玩完遊戲之後,之前影左嘅昆蟲相片姐姐已經幫我地PRINT好,可以返屋企整屬於我自己嘅市區「精靈」圖鑑啦~

完成左整日活動,仲可以有一張小證書添。小小豬話今次活動好玩又學到好多嘢,仲話對生物有更多了解,仲叫我要多啲帶佢去觀察昆蟲添呀~

今年暑假「世界自然基金會」除左有一天日營嘅「城市生態學家」之外,仲有兩個分別兩天及三天日營嘅「海洋探索家」同埋「自然歷險隊」,俾唔同年紀嘅小朋友探索香港獨特自然生態環境,如果大家有興趣可以去官方網址望望有關詳情及活動細則。

兒童夏日學堂活動日期及內容可以瀏覽:https://wwf.hk/SummerSchool2019

More Information :
Website:www.wwf.org.hk
Facebook:https://www.facebook.com/wwfhongkong