吉吉媽, Author at BK Milk ‧ 親子語
 

Posted on March 26, 2019 By

“以往我曾經送過12份生日禮物俾你,不過物質棄掉了就好容易唔記得,今年既生日我送一個經歷俾你,因為回憶先係最難忘”


今年吉爸既生日,我靜雞雞訂左黃金海岸酒店既生日package做禮物,而吉爸就以為只去食自助餐,當自助餐既途中,我就講左以上既說話,再補充一句“我地上去開房啦”,吉爸笑到差d連水都噴埋出黎😂,🍊又跟住我地一齊傻笑~


“生日假期住宿計劃”包括一晚住宿,雙人自助晚餐,雙人午市套餐,生日蛋糕1個(估唔到又幾好食),汽酒1支,姓名刺繡手絹1份,鯊魚冒險島1節,退房時間延至2pm,價錢為$2200(加一服務費),價錢都合理,因本身自助晚餐都要$638/人,午市套餐都百幾蚊一份,當去左個小旅行咁,其實都唔錯😊~


黃金既自助晚餐幾年前食過覺得幾多野食,今次再食都唔差,但可惜無生蠔,有埋就滿分,我鐘意佢有個戶外區,有燒豬、燒魚頭、燒烤食品、海南雞煲仔飯等~而用餐途中會有一位歡樂哥哥行去每張枱度扭波波俾小朋友,🍊見到好開心,佢係第一次收到扭波波🤣


間房都幾大,🍊當然好開心,周圍跑,由於天氣凍無得去泳池,所以我淘左d沖涼玩具帶黎玩,吉好鐘意,尤其隻識嘔泡泡既蟹😂第朝訓醒眼都未張開就話要沖涼🤣


“鯊魚冒險島”係吉最鐘意既部分~首先係人唔多,多數都係酒店住客,地方亦都幾大~

接待處已經有張鯊魚形既枱,

入到去裡面有一個兩層既攀爬區,當中有個彈床係入面,爬到最頂可從旁邊既旋轉滑梯滑落黎,就會係鯊魚既口出返黎😆,

另一邊有隻半船,都係用黎爬既,

再另一邊有好多軟身既大型lego,

仲有幅攀石牆,

旁邊有個小書櫃,

隔離有間幼兒房,當中既設施適合較細年紀既小朋友玩~我地食完晚餐去玩,50mim對吉黎講完全唔夠喉,玩到唔捨得走(老實講又真係幾好玩),所以就應承佢聽日午餐後再黎,小朋友真係好好記性,佢第朝一訓醒除左話要沖涼外,就成朝不停講baby shark😂
價錢係:
50分鐘一節(一大一小)住客$100,非住客$150,(另加一位大人)住客$50,非住客$80
營業時間:10am-10pm


Posted on March 21, 2019 By

吉吉病左幾日,又落左幾日雨,好似好耐無去玩~見今日差唔多好返晒又無乜雨,仲要花展開鑼,就帶住小情人吉(懶浪漫咁)去拍拖~

無去過花展既我,一入埸就好興奮咁:
“吉吉~我地自拍呀!” “吉吉~睇下d花好靚”
“吉吉~有好多唔同款既花”
一開始吉都好配合,影相又笑,又好認真咁賞花!但美好既光陰就只有5分鐘…
之後………

我:“影張相呀~”
吉:“…跑跑跑!(逃走左)”
我:“拖住呀~”
吉:“…吉吉避開!(繼續想逃跑)”
我:“去呢邊睇下呀~”
吉:(佢行另一邊)
我:“(恐龍模式啟動)拖…住…我!”
甜蜜情人mode眨下眼就變返恒常媽媽mode…(哈哈!)

雖然吉對花無乜興趣…賞花既得我一人~我覺得都值得去呀~因為都幾靚,同俾小朋友認識一下有咁多唔同款既花都唔錯~

展覽日期:15/3-24/3
時間:9am-9pm
地點:香港維多利亞公園
入場費:成人$14。4至14 歲兒童、全日制學生、60 歲或以上長者及殘疾人士及其照顧者$7
(星期一至五:60 歲或以上長者、殘疾人士及其照顧者免費)


Posted on March 13, 2019 By

屯門公園共融遊樂場上年12月啟用左一直都未抽到時間去,上星期約埋吉爺吉嫲一齊去玩,又幾好玩喎~
點解叫共融遊樂場?因為呢個係香港第一個有得玩「水」同「沙」既遊樂埸,當中既佈局同遊戲設施適合唔同身體狀況既兒童,連坐輪椅既小朋友都岩去玩。

吉一去到就好想玩水,但有d涼,所以同佢講等夏天熱d先再黎玩水(不過當日都有其他小朋友唔著衫玩水,好勁),佢就跑去隔離跳彈床~彈床有兩款,包括長方形同圓形,原來呢個區域叫“山丘地帶”,除左彈床仲有d高高低低既山丘同大轉盤訓練平衡力~旁邊“音樂感官區”有大型敲擊樂管同鼓,刺激聽覺。

 

行去遊樂場既另一邊,就會見到“爬蟲樂園”,呢度有4款唔同既滑梯同好高既繩網,吉行左第一步繩網,隻鞋’click’住左係個網度佢就有d驚,唔肯再繼續行。隔離既“旋轉地帶”有兩款氹氹轉,同我地平時既氹氹轉唔一樣,設計好特別~旁邊既“感官地帶”有幅觸摸牆,當中有3個轉盤可以玩,又有得照鏡。

行過d就有韆鞦區,有5款唔同既韆鞦,當中有1款係親子韆鞦,可以同大人面對面坐,當然要同吉試下一齊玩,可惜我一坐落去,狠心既吉就講“唔同媽咪坐同嫲嫲坐”,我話坐一陣佢都話唔可以…媽媽我好傷心(可惡的吉)。

玩左大半個鐘就要走lu~雖然有沙有水既公園,但我地無玩過。等夏天我帶齊裝備我地先再黎玩沙玩水啦!

交通方面:我係荃灣搭60m巴士,係“屯門公園”站落,落車向後行返上行人天橋,向屯門市廣場既反方向行,就會去到屯門公園,入去睇公園地圖搵返兒童遊樂場,就會去到!


Posted on March 7, 2019 By

吉以前細個,我有試過用茄子煮麵或蒜蓉蒸茄子,吉都唔太鐘意,今次呢個魚香茄子吉就好欣賞!食左好大碗飯~

免治豬肉55g

茄子110g

蒜頭3粒

乾蔥頭1-2粒

BB豉油3/4茶匙

糖少許

 

醃豬肉調味料:

BB豉油1/4茶匙

糖少許

麻油少許

少許生粉

 

做法:

1)豬肉用調味料醃15min

2)蒜頭及乾蔥頭切碎,茄子切成條狀備用

3)落少許油於易潔鑊,將肉碎炒至7成

4)落少許油於易潔鑊,炒香蒜蓉乾蔥頭,然後加茄子略炒,加入豬肉略炒,再加大約80ml水大火煮滾,然後轉中小火煮至茄子熟透(約4分鐘),最後加BB豉油及糖,加少許生粉水埋獻,ok!!