Peggy媽媽與柏宇仔, Author at BK Milk ‧ 親子語
 

Posted on May 6, 2019 By

在家必備:HAPPY MAT

  • 只要放係光滑枱面,底部可以完全貼實,等BB點拎都拎唔到,唔怕佢掉餐盤。

不過Peggy媽媽都係初期加固既時候先用放下菜芯,西蘭花之類俾柏宇仔拎,因為餐盤有少少過大,放上Aprica 既high chair 餐盤會痴唔實(所以買果陣要留意返餐椅上既餐盤位置空間足唔足夠),所以到後期都係用黎放食物多,之後逐少逐少俾佢。

 

防污之選:TIDY TOT

  • 飯衣連托盤既設計,可以防以BB食野既時候整污糟身體,同時可以防止BB將食物身掉落地下。

Peggy媽媽覺得非常好用,係加固初期玩多過食,而且又好messy,可以直接將食物放到上去可以俾柏宇仔自由發揮,享受學習進食既樂趣。

不過隨著BB越黎越大個,就要小心,因爲佢地既手仔已經長左,可以抓起托盤既邊邊去彈走d食物,而且已經可以將手伸出托盤外既位置掉食物,當有以上行為既時候,恩物就會失效,所以柏宇仔1歲打後已經冇再用。

 

外出必備:TINY DINER

  • 餐墊底部有吸管設計,可以吸實枱面(但一樣都係要光滑既枱面先可以貼實),而且收納方便。

隨著柏宇仔大個,進餐時間穩定同冇咁messy,Peggy媽媽都會帶柏宇仔出外食午餐同晚餐,一件飯衣,一塊TINY DINER,就可以俾佢係旁邊乖乖一齊食飯,唔洗洗怕枱面唔乾淨,而且有個凹槽位置可以收集食物碎渣,唔怕跌得太多食物落地下。

作為BLW媽媽,帶BB出街食飯最緊要係食完飯要幫手清潔返餐廳既地下,因為有時食飯都會比較messy,唔好加重清潔人員既工作同埋令餐廳反感。

以上3樣都係Peggy媽媽俾柏宇仔用過後既產品,希望介紹完可以幫大家簡選到適合既用餐工具,下次會再大家介紹埋1歲後所用既學習餐具同學習碗!

 

 


Posted on April 30, 2019 By

雖然柏宇仔係行BLW,但由7個月大起,我就有帶佢去玩Messy Play,等佢接觸多d唔同既觸感,刺激感官,有助腦部發展,初初細個既時間,咩都唔怕,面對乾/濕麥皮完全唔怕,仲會走去食,對麵粉、生粉水之類一樣都唔怕,我完全會俾佢自己玩自己探索。

全文…


Posted on March 26, 2019 By

保榮路兒童遊戲室係全港第一大政府遊戲室,早前閉館進行翻新工程,仲善用場地空間,加設左d大型玩樂設施,3月18日重開已經人山人海,所以翌日就早d約埋柏宇d朋友仔出黎玩,試下新場,即刻帶大家睇下有咩玩啦!

當日我地9點40分左右去到已經有不少家長帶同小朋友等候10點派籌,而場內已經有不少小朋友玩,估唔到平日早上都咁多人,可見新場真係吸引。

館外新設左一個等候區,估唔到等緊都有野玩,一排櫈有4個位置,每排櫈前都有一個Masterkidz Education 既牆上學習遊戲(幼稚園都有選用),俾小朋友打發時間同埋學習,激讚全個等候區入面共有10款,可以學習下生物既生長週期,又有得學習科學,同時又可以訓練下小手肌肉。

 

 

到左十點正就開始派籌,張籌既設計都好新穎,係一張Boarding Pass,由香港飛去屬於小朋友既小小世界,令媽媽都一同回復童心,每一場可以容納50個大人連小朋友,名額有限。

派完籌之後,就去左體育館後面既保榮路公園玩一陣,做下熱身,之後再返遊戲室玩。下次再介紹埋呢個公園,都係玩樂好去處。

到十點半,終於可以登機飛去小小世界啦!

新設計分左2半部份:

  • 左手邊比較適合識爬至3歲小朋友玩,綠色區域入面有好多唔同種類既可愛動物,內置磁石,可以俾小朋友貼上牆身,另設有好多可移動既方塊俾小朋友玩樂,郁動大肌肉,中間部份仲有一間冰屋可以俾小朋友自行組合,發揮創意同解難能力。

   

    

  • 右手邊爬架專為4-9歲小朋友而設,家長們一定要留意,小心陪同,此爬架可以訓練小朋友膽量同有助大肌肉發展,柏宇初初上去都唔驚,仲爬得好快,但去中間橋位置都比較驚,最後同我一齊溜滑梯落地,媽媽表示好好玩,但柏宇仔要練大膽。

    

   

後記:

柏宇仔係場內不停又爬又跑,媽媽表示十分攰,放完佢電又放埋我電,返到屋企食完午餐就秒速入睡,值得推薦,十分好玩,得閒再黎過。

另外,新場地規管好好,一定要有小朋友在場先會向家長派飛,避免左幫人拎籌同埋不停入場既情況,等多d小朋友可以玩。

有興趣家長可以係早上時間黎玩,比較上少人等候(因爲有媽媽分享晚上時間來玩,需要等上一小時或以上時間先可以拎籌,實在太耐啦 !)

除左去Playhouse ,免費既政府遊戲室都係唔錯既選擇,下次再同大家介紹其他不同政府遊戲室。

 


以下是保榮路體育館兒童遊戲室資料:

(資料來源:康樂及文化事務處)

  • 地址: 新界上水百和路19號
  • 遊戲室主題:小小世界
  • 入場限額:50位(大人連小朋友)
  • 開放時間(定期保養日除外*):
  1. 早上8時30分至9時15分
  2. 早上9時30分至10時15分
  3. 早上10時30分至11時15分
  4. 早上11時30分至下午12時15分
  5. 下午1時30分至2時15分
  6. 下午2時30分至3時15分
  7. 下午3時30分至4時15分
  8. 下午4時30分至5時15分
  9. 下午5時30分至6時15分
  10. 晚上7時30分至8時15分
  11. 晚上8時30分至9時15分

*定期保養日(每月第二及第四個星期一上午7時至下午1時,如該日為公眾假期,保養日則順延至下一個工作日)

  • 派籌時間:
  1. 早上8時
  2. 早上9時
  3. 早上10時
  4. 早上11時
  5. 下午1時
  6. 下午2時
  7. 下午3時
  8. 下午4時
  9. 下午5時
  10. 晚上7時
  11. 晚上8時
  • 前往途徑:

。76K號巴士…朗屏至清河邨 (大約30分鐘一班)

。78K號巴士…上水至沙頭角 (大約 20 – 30分鐘一班)

。70K號巴士…華明至清河邨 (循環線,大約15 – 20分鐘一班)

。273A號巴士…彩園至華明(循環線,大約 5 – 10分鐘一班)

。273B 號巴士…清河邨至上水鐵路站 (循環線, 大約8分鐘一班)

。277E號巴士…天平邨至藍田鐵路站 (大約30分鐘一班)

。502號 綠色專線小巴…大埔那打素醫院至清河邨 (大約12 – 15分鐘一班)