Aminn, Author at BK Milk ‧ 親子語
 

Posted on July 30, 2019 By

阿姐最近上緊D Mind Education嘅playgroup有啲特別,係一個日本playgroup課程,由日本教育出版機構Gakken設計嘅Hoppen Club Playgroup幼兒課程,透過觸覺、視覺、聽覺活動刺激幼兒腦部發展。

  

教材同教學內容都係來自Gakken嘅教學模式,同本地課程分別在於日本課程係多圖多公仔,老師再口述圖案係咩嚟。而返開嘅英語playgroup,學習上係圖畫配合英文單字,講真,呢個年紀始終仲係大BB,主要都係認圖,叻啲嘅都係啱啱識講嘢,未必完全理解到課堂內容。

  

親子互動遊戲小組可以培養幼兒溝通技巧,同時包括聆聽、專注、反應、秩序、顏色、五感、大小肌肉學習,每一個步驟同小活動都有不同的意義同訓練!
  

  

課堂內容:


-課室有擺放玩具,小朋友喺上堂前可以warm up
  
-同Program主角Mimi打招呼

-用水果認三原色:蘋果、香蕉、士多啤梨etc
-觸摸不同毛髮觸感
  
-唔同嘅大、小肌肉練習:貼貼紙、油顏色、觸感體驗

日本教育出名注重培養學童嘅獨立性,雖然係親子互動,但家長只係協助角色,好多時係小朋友自己可以完成。
  

其實BB喺1歲以上已經識觀察表情動作,幼兒課堂做一啲重覆嘅task,或者睇完頭幾個小朋友做完,其實就輕易可以照做。

一個鐘嘅課堂好快又完,每個小朋友都玩得好開心,
你以為BB真係咩都唔識?佢哋已經自己聯誼緊啦~
 

是次小分享完畢,有興趣可按 麵語錄食玩遊記 by Aminn 或 C家重地 Be a Asterholic 其他分享 🙂

Aminn | Beauty.Food.Fun.Parenting.Trendy|

麵語錄食玩遊記 by Aminn (Lifestyle)
www.facebook.com/m.for.aminn 
www.instagram.com/starzaminn 

C家重地 (Parenting)
www.facebook.com/sy.lam.family 

任何合作請接洽:[email protected]


Posted on June 1, 2019 By

之前Chocolate Rain已經喺唔同地方開過workshop、cafe同聯乘餐廳,今次嘅新搞作係近年好受爸媽歡迎嘅親子cafe,Chocolate Rain Forest已經進註翻新嘅將軍澳中心啦!



Chocolate Rain嘅主題店永遠係充滿拼布裝飾,仲有Fatina公仔同產品,身處其中令人心情舒暢~4000呎嘅親子cafe,一個價錢就可以親子同行2個鐘玩樂時間。





場內一半地方係餐飲區,餐廳主打分子料理甜品同幾款精美甜點小食,仲要係米芝蓮嘅級數,有啲唔簡單喔!

呢個就係招牌分子焦糖燉蛋配意大利雪糕Fatina Chefo Jar,裝喺Fatina公仔玻璃樽入面,食嘅時候𢳂一羹就可以一次過食到焦糖脆脆同雲呢拿雪糕嘅雙重驚喜!


呢度仲會提供唔同嘅STEAM工作坊,提供科學益智、手繪、手作等等唔同活動,不過想參加工作坊就需要預約啦!



另外半個場就係小朋友嘅遊樂區,除咗有一個互動遊戲,仲有好colorful嘅大型吹氣波波池、彈床同滑梯,空間亦足夠俾小朋友來回跑!好攰~







不過其實全店最大隻嘅Fatina就放咗喺門口,仲有門口旁邊嘅日式場景,都係必影嘅打卡位呀!


而家仲係試業階段,6月6日就正式開幕啦!

收費:

Eat & Play Set(甜點連飲品 + 遊樂區2小時自由玩)$180* 親子同行(1位成人+110歲以下小童)
Grand Set(甜點連飲品 + 遊樂區2小時自由玩 +工作坊+禮品包)$368* 親子同行(1位成人+110歲以下小童)



地址:將軍澳唐德街9號將軍澳中心地下G32號舖
立刻預約:www.crforest.hk



是次小分享完畢有興趣可按 麵語錄食玩遊記 by Aminn 或 C家重地 Be a Asterholic 他分享 :)

Posted on May 8, 2019 By

將軍澳,其實都唔算新區,作為香港第七個新市鎮,講到「新市鎮」就知有幾舊。

港鐵將軍澳綫過幾年都開通20年,日出康城都10年,近5年將軍澳南發展,私樓、居屋、公屋都起到出海旁啦!醫管局「九龍東聯網」服務觀塘區同西貢區,如果計港鐵綫就係由九龍灣到寶琳,仲有上咗山嘅秀茂坪同去到篤篤嘅西貢,人口接近100萬。現時孕婦要喺公營醫院生仔,係以登記住址分配去邊間醫院,住喺九龍東嘅孕婦只可以被安排去「聯合醫院」。

將軍澳係一個「年輕」嘅社區,好多年輕人搬出嚟住或者年輕夫婦都選擇呢區置業,唔該醫院管理局嘅高層過嚟「落下區」,睇下將軍澳BB車多過乜嘅奇景!講得出「九龍東分娩率下跌」嘅官員唔止無去了解真實情況,連用腦諗下都無!

 

無他~高層係睇數字做事,OKAY!我就用數字話你知:為何我不去聯合醫院生仔!

1. 人多 — 截至2018年11月,香港共有243個公共屋邨,其中48個即係5分之1屬於「九龍東」,公共屋邨就代表人口密度,而包圍住聯合醫院就係順利邨、順安邨、順天邨、安泰邨、秀茂坪邨、安達邨、寶達邨、翠屏北邨、樂華邨等等..單係聯合醫院個山頭已經夠多人,醫管局預而家嘅年青人唔生仔?

2. 唔方便 — 觀塘區嘅居民應該仲肯去聯合嘅,去到觀塘市中心上多半個山就到醫院;住將軍澳同西貢就麻煩喇,將軍澳出觀塘市中心要經過經常多車、壞車、撞車,而且半夜都會塞車嘅將軍澳隧道;西貢就要兜去彩虹返觀塘再上山;OKAY~我知去公院生仔可以call白車直駛去醫院,咁就係好方便?
總之生仔好多突發機會要同時間競賽,點解咁多人口嘅九龍東無「聯合醫院產科」以外嘅選擇?

3. 危險 — 「聯合醫院」同「醫療事故」幾乎劃上等號,公營醫院嘅產科醫療事故近年都有幾單!

喺私院生無錯係環境、過程都舒服啲,不過閒閒地都要7、8萬甚至10萬先落到樓,好多家庭負擔到都只係「俾得出」,有得慳邊個唔想?

然而生仔已經有一定危險,錢都係要洗嘅話不如用嚟求個安心,好過有乜事輕則睇醫生,重則定驚都唔夠俾。再者,而家係啲年輕家庭怕咗你「聯合醫院」而唔去幫襯,正確嚟講係「使用九龍東產科分娩率下跌」,並非「九龍東分娩率下跌」!

講返根本問題,點解我哋對「聯合醫院」甚至「公營醫院」無信心,從而被迫選擇唔享受香港人嘅「醫護福利」?全因為香港政府、醫院管理局漠視醫護人手不足對社會公眾、人命帶嚟嘅影響!

作為立稅人,呢啲係社會責任,啲錢用得其所係政府嘅責任,但係社會建設無論有咩經濟因素,都無可能重要過性命尤關嘅醫療!

錢就俾咗出去喇,我都唔希望將來需要用到政府醫療服務,但有需要嘅時候,唔好話生仔,連睇病醫病都要自己準備好「自願醫保」去為自己條命打算,香港人真係病唔起!噢~忍唔住離題了!

Aminn | Beauty.Food.Fun.Parenting.Trendy|

麵語錄食玩遊記 by Aminn (Lifestyle)
www.facebook.com/m.for.aminn 
www.instagram.com/starzaminn 
C家重地 (Parenting)
www.facebook.com/sy.lam.family

任何合作請接洽:[email protected]


Posted on April 27, 2019 By

作為新手爸爸媽媽,湊BB真係「揦手唔成勢」,但偶然見到BB嘅趣怪表情,又真係覺得好可愛!

初生BB出世之後經常會發生嘅現象,就係「翻白眼」!初生BB會喺瞓覺嘅時侯,無意識之下突然微笑一下,或者扁嘴一下,有時會翻白眼,又有時會發開口夢,其實都係同BB未發育好嘅神經反射有關。




過咗初生階段,BB就會多咗微笑嘅面部表情,你以為佢咁快就識笑,其實仍然係神經反射作怪,並唔係表達情緒或者同人溝通嘅笑 🙁



好多新手爸媽都話初生BB成日好似「遊雲」咁無focus,原來因為佢咃嘅眼仔未發育晒,其實係睇唔清楚嘢㗎!初生BB常見嘅表情應該係——呆...


不過之後BB開始熟悉周圍嘅環境、人同事,各種刺激都有機會引到BB微笑,甚至大笑。加上BB望到嘅所有嘢都會好新奇,大約兩個月左右就可以通過抱佢、同佢講嘢、逗佢玩引發到佢同你嘅互動式笑容㗎啦!



所以做爸爸媽媽,想幫BB影相一定要影好多張,先有機會捕足到「靚樣」,久而久之電話相簿就會變咗咁XD

唔知你哋又有冇捕捉到佢哋嘅搞鬼表情呢?
最後送上Aster初生時期嘅表情包:)

初生—1個月





2個月



3個月


4個月


是次小分享完畢,有興趣可按 麵語錄食玩遊記 by Aminn 或 C家重地 其他分享 🙂

Aminn | Beauty.Food.Fun.Travel.Trendy| 


Posted on April 25, 2019 By

上篇講到因為我要催生,但係子宮頸又開得太慢,最後我都係用咗無痛分娩,Aster喺我穿水之後12個鐘就出咗世啦!

跟住主診醫生就好細心地幫我縫傷口,同一時間姑娘即刻幫BB簡單清潔再用大毛巾包住佢,然後就畀我哋抱下影相。

另一個姑娘就同清潔姐姐極速收拾同清潔房間,產房好快就回復返原本個樣,而產後係需要喺產房休息兩個鐘先可以離開(由BB出世時間計),因為我電話已經畀我玩到無電,所以唯有瞓覺。。。

兩個鐘頭之後已經7點半,我餓咗大半日終於有飯食!生完仔真係好肚餓,我食晒二人份量嘅飯餸!!

另外聽講好多媽媽生完之後去第一篤VV有啲困難,可能因為啱先打搞過陰道同有傷口,不過我完全無問題,自己去到仲要頭兩篤都痾咗1L!過嚟傍住我去廁所嘅姨姨表示驚訝!

喺St.Paul每晚6-8pm都係親子時間,生完第一晚太晏無得見lu~不過我住43夜,仲有兩晚可以見,親子時間係畀BB嘅爸爸媽媽過嚟抱BB同餵奶,不過媽媽任何時間都可以過去BB房,所以親子時間都係爸爸嘅餵奶實習班,媽媽就負責影相!XD





不過講到餵奶,BB房本身定咗每4個鐘餵一次,媽媽可以按時間到BB房餵人奶/水奶,或者由姑娘餵水奶,BB房姑娘除咗照顧BB之外,仲會協助新手媽媽餵人奶同抱BB

親友想嚟探媽媽就好方便,8am-10pm隨時都可以過嚟

反而想見BB就有時間限制,一係喺每日朝早同黃昏嘅探BB時段隔住玻璃「睇」

一係喺餵奶時段同媽咪一齊留喺病房餵奶先有得睇,不過講真返到屋企大把時間睇啦!XD

每朝早同晚,主診醫生都會同姑娘一齊過嚟檢查傷口同子宮復原情況,仲會解答我一啲產後嘅疑問。而兒科醫生亦會早晚過嚟匯報BB嘅唔同狀況同表現(例如痾咗幾多次屎尿、食咗幾多奶等),估唔到一生完就要經歷「家長日」。。。

基本上我生完BB頭兩日都食得走得好happy,係下腹斷斷續續有啲M痛嘅感覺,因為子宮收縮返原本大小需要一段時間,而不適大概會維持一星期。反而第三日我因為塞奶好痛好痛所以好唔舒服,夜晚差啲瞓唔到,本身醫生開定畀我for傷口嘅止痛藥就大派用場。。。

St.Paul嘅病房,無論係4人、2人定單人病房其實間房都係一樣裝修,只係房入面有幾多個床位。至於喺私家醫院生仔嘅價錢因人而異,幾間私家醫院嘅基本收費出入不大,都係包括住院、藥、食物(早餐),反而另收費嘅主診醫生、兒科醫生、麻醉師嘅費用就會有出入,幾多錢埋單真係要睇你選擇嘅醫生,如果住普通病房大概預6-8萬。(最新收費可以上網搵搵「本港私家醫院收費」)

講到無痛分娩,如果我一早已經決定做就直頭唔使等唔使痛啦!唔好處當然就係要打麻醉囉,好處就梗係既方便又快捷,唔止等生嗰幾個鐘可以hea,連生之前剪會陰同生完縫針都無乜感覺,相對唔同生產方式應該算最舒服


同其他私家醫院一樣St.Paul都會有初生BB相連CD送返畀你,不過St.Paul應該係出世第一日(即係幾個鐘內)就被迫影咗。。。睇返Aster個發水厭世樣真係。。。

生仔後感:
*穿咗水係要盡快趕去醫院,但係唔代表好快就生到
*打咗催生唔代表即刻或者好快催到BB出嚟
*忍住陣痛就會令肌肉緊張,宮頸仲難開。。。(即係覺得痛就盡情表現情緒吧!)
*姑娘教落:
生仔唔係講有幾痛,係要睇開咗幾多度!(長知識呀!!!)

 

後記:
懷胎十月其實只係湊仔之路嘅開始,每日餵奶、換片、沖涼、換衫、氹瞓覺,產假每一日都係非常充實,如果屋企無工人姐姐或者陪月姨姨更加係手忙腳亂,歡迎大家一齊加入湊B大挑戰!

(完)

是次小分享完畢有興趣可按 麵語錄食玩遊記 by Aminn 或 C家重地 其他分享 🙂

Aminn | Beauty.Food.Fun.Travel.Trendy|