嘩....人細鬼大嘅小小豬學人飲啤酒呀！
哈哈哈...呢一杯當然唔係真啤酒嚟啦，大家估唔估到其實係啲咩嚟呢！
呢杯小朋友啤酒其實係蘋果汁啫喱嚟呀，睇落又真係幾似啤酒喎。當然亦都係小小豬嘅配合，扮到好似飲緊啤酒啦！
其實早幾日見有朋友喺FACEBOOK分享咗呢個小朋友啤酒嘅食譜，我見幾得意，加上又真係非常簡單易整，所以就係今日買齊材料同小小豬一齊整啦！
先準備650g嘅蘋果汁！
魚膠粉(9g)用水(20g)開勻！
之後用熱水坐溶！
蘋果汁用小火煮熱，待微熱後(即出少少煙)就熄火，倒入魚膠粉水拌勻！
之後，先留下150g溶液，用嚟打啤酒泡泡用呀！
放涼後就可以倒進透明小杯，唔需要太滿，大約2/3就可以了！
可以放入雪櫃凝固，普通格就可以啦！
待蘋果啫喱有少許凝固後，就可以將留作啤酒泡泡嘅溶液，用打蛋器打至起泡！
之後將泡泡輕輕手咁，倒進已凝固的啫喱上面！
其後再放回入雪櫃，待冷卻至凝固就完成啦！
哈哈哈...個製成品又真係幾似啤酒！
以蘋果汁做啫喔個味道又真係唔錯，連埋啲泡泡一齊食，個口感又幾特別呀！
睇下個為食豬食得幾滋味！
係夏天食啲冰凍甜品真係一件大樂事，所以如果大家有興趣都可以試吓整呢個簡單易整又攪笑嘅甜品呀！
