之前好多朋友仔都話印度椰子係好好,有助清燥熱、止咳功效、滋陰補腎、潤肺養顏、強壯身體機能嘅作用。見咁見功效當然好想試下煲嚟飲,搵左好耐終於都買到,所以就印度椰子清潤湯啦
印度椰子2個、合掌瓜3隻、新鮮粟米2條、瘦肉約$40、南北杏少少
先嚟個主角- 印度椰子
其實買嘅時候都有少少擔心,因為一聽到椰子就覺得係好硬,所以初時都好驚唔識切開佢。不過.....原來佢係冇大大粒嘅咁硬,仲好易就可以切片啦
合掌瓜去心切開一半、粟米去皮切塊
瘦肉洗淨汆水備用,我今次用左豬肉眼嚟煲,因為之前藥材店哥哥傾開,佢話其實煲湯用瘦肉係比較好,尤其係咳就一定要煲瘦肉,因為豬展比較肥,會易灼喉,冇咁好呀
煲內放約2L水,將其他材料放入煲內
水滾後轉用慢火煲兩小時(因為有印度椰子,所以係要煲耐少少先出味呀)
最後加少少鹽就飲得啦
哈哈哈...又係一個一湯兩食嘅餸,又可以煮左個餸啦
真係唔講得少,煲完啖湯又真係好鮮甜,勁有椰子香味,而且飲落仲好潤添。就連我家大老細都讚口不絕,當然...我嘅小FANS小小豬都好賞面,飲左兩大碗呀!