第一次參與智樂Playright舉辦的「社區共建遊樂場」活動
今次會場設於迪欣湖，事前要在網上報名，先報先得，毋需抽簽！
哥哥同芊芊都玩得好開心好興奮………好FREE！！！！
我哋喺屋企樓下餐廳(大利小廚-已經成為我哋既飯堂)食過早餐
跟住就同哥哥芊芊工人出發迪欣湖(今日媽咪唔得閒)
我哋喺石硤尾搭港鐵到荔景轉東涌線到迪士尼站(大約40分鐘)
出閘後妹妹突然開大，不過都好…去哂一陣唔駛煩，因為嗰邊只有流動廁所
出閘後向迪士尼相反方向行，到巴士的士站方向行到盡頭見到呢個牌行前少少
就會見到大會安排的免費專車，直接送到迪欣湖活動中心
我哋於早2個鐘到，所以都唔係太多人上車
我哋打算可以在迪欣湖先玩玩，然後才到會場，可以唔駛太趕！
5分鐘唔駛！好快就到咗迪欣湖啦！
呢度有四人單車同四人艇出租，不過今日冇時間玩啦！
我哋先到遊樂場俾佢哋放一放電先
唔算好大！但係已經夠玩。
呢度分開兩邊設施，一邊俾小朋友、另一邊俾小小小朋友！
周圍都見到米奇標誌。
呢度設施用咗船做主題，
有個船頭喺度梗係要玩吓 "U jump I jump" 啦！
芊芊就喺度攬住條柱「如果痴痴的等…」等咩？
梗係等佢最鍾意既韆鞦啦，
通常D爸爸媽媽都好好…見到有人排隊好快就叫自己小朋友落嚟讓人玩先。
每次見到芊芊打韆鞦咁開心，我都會好開心，覺得自己所有煩惱都只不過微不足道！
(突然感性起上嚟)
俾佢放咗半個鐘頭電之後我哋都差唔多要出發，
因為會場係植物園嗰邊，所以我哋要沿湖邊走到瀑布區都需要一段時間，
我哋沿路行都見到有好多人嚟呢度野餐！
見到呢棵植物好得意！
芊芊話係Strawberry！
兩兄妹影咗好多張靚靚相！
佢哋兩個一路行一路執樹枝執樹葉！
呢棵樹既樹葉特別黑…所以喺度影番張相！
其實小朋友真係好需要空間跑跑跳跳，
只係我哋居住既空間限制咗佢哋既發展。
一路行都會見到有個指示牌帶你去會場
到咗瀑布區啦！眼見到有條龍尾係橋上面，
因為大會分段放人入去，令到場內保持一定人數，等大家都會玩得開心自由！
但係意外既事發生了…我部iPhone Hang咗機(因為要show個QRcode俾職員確認身份)
但係佢哋安排得好好，佢哋先找幾個職員在人龍先幫大家登記，
至於我最後都入唔番部iPhone，但係佢最後只要講番個電話號碼俾佢知，
佢喺事先預備咗既List Print out度搵番我個名就攪掂入得去。
穿過橋底就見到會場…好多小朋友已經在場玩緊！
起初我以為大會係會安排有好多個攤位，然後每個遊戲都需要小朋友去排隊玩，
但係原來整場都冇特定既位置，大會將所有物料亂放於草地所有位置，而且冇特定既玩法指引！
等小朋友自己去發掘去探索，自由去發揮！只安排適當數量既義工姐姐喺附近幫助小朋友。
場內有多款唔同既物料…塑料、竹籮、木板、魔術貼、膠紙、繩等等。
隨便在草地上收集各樣物件，自創變成一個機械人！
妹妹就未係好掌握到應該點樣發揮
推吓車軚先…
哥哥唔知喺邊度搵到兩碌高橋踩，
佢一踩即刻有成3個姐姐過嚟扶佢…太誇張了吧，
係真心驚佢跌定係佢美男計得逞！
之後又唔知喺邊度搵咗D嘢嚟…然後放D波波落去做運送，
小朋友就係應該有自己想像空間去做自己想做既事，
唔應該在預設既空間同規則去玩去生活！
之後見到有小朋友係度玩推車仔…哥哥就即刻自己搵材料去自製番一架
之後再行到另外一個區域又見到其他材料
係一D鐵框同木板，哥哥就諗到要起一間屋住，
工人同妹妹都一齊幫手！
我又幫佢哋做咗一度門，只係用魔術貼縛住一邊鐵框
跟住我哋LOCK LOCK LOCK 玩「有冇人喺度」遊戲！
芊芊好開心，不斷自己打開門又閂門行出行入
芊芊話呢個係煮食爐用嚟煮嘢食！
隔離就係睡房…簡直同依家長實D樓一樣咁細，Open Kitchen，Open Bedroom…
我諗過多幾年後D單位就係咁，唔止Open Kitchen，係Open Toilet！！！
其他家庭都玩得好開心，同好有創意！
上一手做出嚟既韆鞦！！芊芊即刻坐上去試吓先，我諗芊芊第日可以成為「韆鞦達人」
另外呢個車軚木碌區，睇到大會用些卡板等林料設計咗D障礙設施俾小朋友爬嚟爬去
連我自己睇到都覺得好好玩…
差唔多行哂整個場地，真係玩極都唔願走…
平時成日喺屋企玩窗簾都俾我鬧，依家喺呢度可以玩個夠。
然後我哋就去咗個小山坡度玩瀡落嚟
好刺激好好玩！！
最後嚟到呢個紙皮箱區，紙皮箱幾面都黐咗好多魔術貼，
好容易就俾小朋友叠起上嚟，
個頑皮仔哥哥鍾意叠到好高跟住推落嚟撞自己…好攪笑
最後沿住湖的另一邊慢慢行番去活動中心，
邊玩邊行…好快就番到去！然後喺7仔買番少少熱食，
坐低休息吓食埋就搭番專車到迪士尼站番屋企lu。
Photo by CANON 5D Mark III，Len | EF 24-70mm f/2.8L USM
呀劍評分: 10分
呀劍評語: 真係無得頂！1. 唔駛排隊; 2. 自由自在; 3. 發揮創意，如果再有機會一定要再嚟！
智樂「社區共建遊樂場」 簡介
由香港迪士尼樂園度假區全力支持的智樂社區共建遊樂場，齊備各種玩得、變得、搬得、疊得、滾得、組合得的各種物資，邀請有興趣的爸爸媽媽與孩子一同前來，創造出一個由小朋友話事的遊樂場，大玩特玩！
地址
香港迪士尼樂園度假區迪欣湖活動中心植物園
參加日期
2015年12月13日(星期日)
參加時段
下午2時至5時
免費參觀
交通
乘搭港鐵在迪士尼站下車，在公共運輸交匯處免費轉乘活動專用穿梭巴士(服務時間上午9時30分至下午5時30分)，或公共巴士R8，直接到達迪欣湖活動中心。
網址
https://www.facebook.com/Playright-Childrens-Play-Association-139074302803304/？fref=nf
電話
2898 2922
*大家留意日後活動地點，日期，時間及報名方法公佈
(以上資料更新至文章當日)
