LEGO旗艦店在暑假開幕至今已經一個多月喇！身為LEGO迷嘅朗朗梗係要去一去朝聖啦！店舖位於旺角朗豪坊12樓，到達門外，心情已經興奮不已！
點解LEGO人仔放大咗咁多倍嘅？莫非用咗多啦A夢嘅變大電筒？
好大塊LEGO board呀！可以在牆上拼砌出無限創意。
而更吸引朗朗嘅係前面呢張play table，可以畀小朋友玩，嘗試一下砌LEGO嘅樂趣。
店內四周都展示咗好多LEGO模型，淨係展示品都有排睇。好鍾意呢set龍貓主題，勾起不少童年回憶。
傳聞中賣到斷貨嘅VW甲蟲車，又真係幾過癮喎！
現場除了LEGO外，還有多款精品同用品，眼花繚亂。朗朗幫書包揀番個LEGO裝飾先，一於買呢個黑武士啦！
好多盒裝LEGO都砌好咗放晒出嚟做demo，睇啱就可以買返屋企向難度挑戰。迪士尼公主城堡！
Duplo系列都設有展示品㗎！可愛動物園，好似我哋屋企果一set呀！
Duplo區亦設有play table，可以畀小朋友一嘗Duplo系列。不過朗朗仲Duploduplo？超齡喇喎！
朗朗被Batman LEGO吸引住，羅賓漢飛機、batman車，睇到朗朗都好想帶晒佢哋返屋企呀！
“BUILD A MINI”專區放咗好多LEGO人仔同配件。
響呢度可以搵到唔同服式嘅人仔，仲有好多人頭添！唔同嘅樣都有，不如砌番一個mini me出嚟啦！
店內放咗好大副香港特色模型呀！由旺角亞皆老街至山東街一段嘅彌敦道，一直砌到西洋菜街、砵蘭街。好壯觀！
模型做得好仔細，有警員正在天台監視四周，有人在天台BBQ、打理園藝……最特別係亮起LED燈嘅招牌，五光十色效果好靚。
人多車多，咁先似熱鬧嘅旺角嘛！
每一角落都整理得好細緻。梗係啦！砌咗成8個月先完成㗎喎！推住BB車行旺角對於媽媽們嚟講係咪好有親切感呢？
LEGO店就連入貨倉果度門都大玩3D，加上朗朗嘅演技，似唔似同LEGO人對望梗咁呀？
大型LEGO店必有嘅PICK-A-BRICK WALL，大大小小嘅LEGO配件盡在眼前，唔駛再四圍去搵。
呢座山都夠晒震撼啦！
LEGO砌出嚟嘅唔同動物，你又鍾意邊一款呢？
臨走之前記得攞本catalog睇下最新款式呀！
香港開咗第一間LEGO認證專門店，簡直係LEGO迷嘅天大喜訊呀！LEGO新產品會同步響專門店發售，以後就方便好多喇！我哋最鍾意係呢度嘅體驗區，大人同小朋友都可以一齊發揮無限創意，係親子消閒嘅好地方。仲未朝聖嘅朋友，快啲嚟睇下啦！
LEGO認證專門店
地址：九龍旺角亞皆老街8號朗豪坊12樓1B舖
營業時間：早上11時至晚上11時
電話：2613 2888
