秋天都到咗一段時間,天氣都仲係咁熱。在兒子苦苦相逼之下,小米又再次出動整雪條。
以往小米多數用不同水果作為雪條的材料,今次攪攪新意思,買來了幾支益力多,製作簡單的雪條。
呢種雪條的做法簡單到……米仔不需任何幫助都可以做到。首先,米仔搣開益力多蓋,然後將益力多分別倒滿雪條模,蓋上模蓋,再將佢運送入冰箱,就大功告成。
等待3至4個鐘頭左右,就食得。米仔食得勁滋味!
如果想多點變化,可以加不同材料落去。
方法一:在益力多內加一些細小的水果粒或水果碎。小米試過覺得好好食的有士多啤梨、蘋果、芒果和香蕉,有興趣嘅朋友可以大膽嘗試唔同嘅水果。
另外,可將益力多混合兩種或以上其他飲料。小米試過覺得好好食的有橙汁、菠蘿汁、芒果汁和牛奶,不過要先試味,因為不同份量溝出嚟嘅味道可以差好遠。