2月21 號，一瞓醒已經好唔舒服、好滾，成個人都發熱，老公幫我用耳探探過，Check到發燒，於是都係決定去睇醫生，但就唔係睇西醫，而係去睇中醫，感覺上好似安全D同放心D。
去到診所等咗一陣就見醫生，醫生一把脈就好快check到BB性別，仲同我地分享佢太太最近都陀B，仲要係孖女添。醫生細心檢查完就話我係感親，應該係畀人傳染到，的確，最近公司有同事病左。醫生就開咗兩日藥俾我，都係比較溫和嘅藥，話要靠我自己同病菌打仗。好啦，咁我唯有努力下啦！
終於睇完醫生，老公都可以放心D，返到屋企佢就負責煲粥我食，我就負責休息。就係咁我由晏晝訓到夜晚食晚飯，食完沖咗個涼又好似真係精神咗，嗰陣都只不過係飲咗一劑藥咁大把咋，感覺好似有D用，咁就諗住應該聽朝瞓醒會無事，一心準備返多一兩日就放產假同準備同老公去慶祝生日兼食好野，點知……
到半夜兩點左右我突然覺得個人好滾，熱到好辛苦，又怕郁來郁去整醒老公，於是諗住起身洗面同搵退熱貼，當我貼左幾塊退熱係身同額頭之後，我以為會舒服D，點知都只係好得一陣，個人依然係好熱，所以決定再洗個面去埋toilet再試下瞓。
驚嚇嘅事就來啦……就係我去完toilet抹完想沖廁個陣見到個廁所係「紅色」，我先先係呆咗幾秒，再諗係咪即係見紅，之後抹一抹面再入房叫醒老公，老公一聽到我叫佢就彈左起身，叫我即時換衫同沖涼，但係下一秒佢就話：「咦？唔係喎，你啱啱沖完無耐咋喎，都係快D換衫啦，唔好沖啦，唔係一陣我怕你整親呀，你又唔舒服。」
我換緊衫嗰陣已經聽到老公叫醒姐姐拎走佬袋畀佢，同向老爺奶奶講聲。到我ready出門口嗰陣老公就飛快咁帶住我去截的士，今次好快截到，比起上次「狼來了」易好多，但去到QM附近竟然見到Road Block，好彩我地無被截。
一去到QM就直上K9南產前房，經過上次之後老公就好熟手，知道要去登記，登記完佢都知道今次有排等啦……因為預計臭豬B好快就會降臨！
同上次一樣，攪好晒手續之後老公只可以係出面等，而我就要駁機Check BB心跳同宮縮，老公雖然心急，但依然記得幫我買水同蛋糕，如果唔係，我呢個為食貓一定好肚餓……
係我駁機既時候都分別有幾位準媽媽入院，有D係見紅，有D係穿水……同樣準爸爸們都表現得好緊張。
終於係3點幾4點攪掂晒D野，可以出外面見一見老公，見到老公又緊張又擔心又攰個樣真係辛苦晒佢，已經照顧咗我成日，到而家半夜都仲要挨眼訓等我，我唔係好忍心見到老公咁攰，而我又未生得既情況下，我決定叫老公返屋企抖下先再返工。
而我就乖乖地咁返去張床都攤下，因為真係瞓唔著又有D緊張，所以都真係幾掛住老公係身邊嘅Moment……幾經辛苦終於挨過咗呢個moment，6點左右就開始有嬸嬸同姑娘來量體溫同血壓；7點左右就派餐，而我所食嘅就係一碗「肉碎粥」，食咗一半度，就有姑娘來通知我同另外幾位媽媽要去做「開鉗」檢查。
一聽到就知唔係好野來啦，即係又要放隻鴨咀入去check，未check都無事，一check，真係痛到不之得了，真係想殺人……醫生check完之後就話畀我知我係見紅同穿左水，要決定到底催唔催生。
**穿咗水後最好24小時內生產，否則會增加胎兒感染率**
因為我唔知點揀好，姑娘就叫我打俾老公商量，點知老公都係叫我自己揀，於是我就問姑娘催生同唔催生嘅分別。
1. 催生
會即時種痘係手度落催生藥，每4個鐘會check一次宮頸度數。（注意： 種左豆落咗藥就唔食得野架啦，所以我只靠個半碗粥來生）
2. 唔催生
會畀多24小時你自己生，即係自然作動咁個D，會痛D囉，因為會耐左；如果過左24小時都未有反應既話都一樣係要催生。
聽完又係度諗：「咦，好似催生好D，唔駛痛多日，同埋如果BB今日出世咪唔會同老公同日生日囉。」（因為老公個嫲嫲話唔好同日喎，雖然唔知點解）
於是姑娘就叫我通知老公，但係我個電話已經被沒收左 （有姑娘幫我執好同keep晒D野），所以姑娘就借電話畀我通知老公，係我打畀老公嗰陣姑娘就幫我開始種痘，叫我同老公講來到直接過產房搵我就得啦喎（咦，咁又幾好喎，可以早D見到老公 ）。
十點零鐘去到產房，個人仲未係好緊張，只係覺得好攰。助產使姐姐好好人，知我落咗藥同尋晚無點休息過，所以幫我較暗左D燈光叫我休息下。係老公未來到之前，我就係產房好Realx咁聽住音樂望住個海咁等藥力發作。
老公好快就飛的過到來我身邊，真係好多謝老公願意陪產（其實我都怕我生嗰陣發癲個樣畀老公見到，但最後老公話我都算okay）。因為老公同我都好攰，所以係間咁暗又播住咁柔和音樂嘅房度我地都好快咁恰左一陣嘅，瞓醒咗我地仲講咗陣笑添。
老公一路陪我，陪到2點半有助產使來檢查（即係吊左藥4個鐘），Check完發覺宮頸都只係開左兩度，仲話至少要多6-8個鐘先開晒，個下我都O咗咀，仲有咁耐真係滴汗……
於是助產使就幫我加大少少D藥，同時又叫我不如落床坐生產球或者行下，對加快產程有幫助，我都同意咗，而老公就係側邊陪住同扶住我，助產使仲教老公點用嗰個止痛嘅電子脈衝機（個名係咪咁叫？真係唔記得），坐咗半個鐘左右，我見到都3點，加上頭先檢查過話無咁快生得，所以我叫老公不如落去食野先。就係老公落左去食Lunch嘅時候，我嘅惡夢就來啦……
老公落咗去唔夠半個鐘我開始 Feel 到子宮收縮得勁咗同痛咗，開頭都仲忍到，可以用止痛機頂住，但之後嘅痛越來越勁，部止痛機較到盡都止唔到痛啦已經……但助產使咁啱又行開咗，而我又真係痛到不之得了， 痛到叫左一句：「唔得啦！」跟住按鐘叫人來。
有個助產嘅嬸嬸入左來，見到我痛到好辛苦就幫我掃背，掃咗一陣係舒服返D，但唔夠一陣就痛過，嬸嬸見我咁辛苦就叫我不如上返床，再叫人來檢查。係等緊人來檢查嗰陣，嬸嬸曾經游說我打「無痛」，但正正因為我知道「無痛」對大同細都副作用，所以我堅決拒絕！（突然覺得上產前班原來都有D用，因為可以增長知識，唔駛誤信而挨多針）
另外，嬸嬸知道我老公落咗去食野，所以就幫我call老公返來。當我係床上面痛 到不得了嗰陣，嬸嬸畀咗個枕頭我夾住，叫我扮蝦米，嬸嬸就幫我掃背來安撫我，直到負責嘅助產使姐姐返來。幫我準備接生既助產使姐姐食完飯返咗來，一來就幫我檢查，原來已經開到8度，可以準備生得。
係呢個moment間產房即時變得好熱鬧，因為多咗幾個幫手既嬸嬸同姑娘，而老公亦好快咁換好衫返來陪產。當全世界都ready既時候，助產姐姐亦開始「落指示」準備叫我點樣PUSH，但其實我根本聽唔入耳，只係靠老公係耳邊再重覆指令同安撫，其間我亦做左兩次危險動作－－PAT PAT離床！助產姐姐好快就Stop咗我，叫我冷靜，因為怕一個唔覺意我用咗力而PatPat又離床嘅話好易跌咗個B出來，咁就好危險同牙煙架啦！
因為太痛同想快D生完，所以全程無用笑氣，一聽到指令就不停PUSH，PUSH咗唔夠幾下，助產使就話已經見到BB既頭髮，叫我努力D……好快半個鐘度，臭豬B就降臨呢個世界啦！
原來生完出來個下真係會好感動，特別係當BB伏係胸口嗰陣，有種不其然想喊嘅感覺，突然有種「我已經做咗媽媽」嘅感覺。
當所有野都okay晒之後，助產使姐姐同我講我無傷口，只係擦傷少少，唔駛縫針，嗰下就真係鬆咗一口氣，因為我真係好怕痛。
助產使話會畀BB同我地相處兩個鐘左右先推我上房，而臭豬B就要去兒科，因為出世前照到腸有光影，所以要去一去兒科，如果無問題就會第二日返我身邊，一出世就要同BB分開，真係有D唔捨得。
到我返到落產後房個陣，突然好自然咁摸咗個肚一下，嗰下先醒起BB出咗世，唔再係我肚入面，嗰種感覺真係好奇怪。
為咗BB嘅健康著想，我決定咗要餵人奶，雖然會辛苦，同埋會有人反對，但我都唔理，我會盡我最大既努力去做到最好！同時我亦要多謝老公係我身邊支持我呢個決定啦！
臭豬b，初次見面，我係媽媽呀！多多指教，我地3個一齊努力啦！
**有樣野好神奇，就係明明未生之前發緊燒架嘛，到我生得個陣又退咗，所以無咁辛苦，但生完之後個晚又燒過……**
題外話：無痛妢娩係咩？
其實係會係背脊度注射麻醉藥，以減輕陣痛帶來嘅痛楚達至舒緩效用。但另一方面亦帶來一D副作用，就好似：
．延長產程：使用無痛後，需要於生產前兩小時停藥先可以再生產，因為怕會唔夠力PUSH。
．有機會出現休克
．有機會引致小便，背脊及頭痛問題
．有機會影響BB呼吸功能
