2017-02-17

23.9K

【親子餐廳】荔枝角日式平板燒 X 小朋友遊樂場

20170217_PLAYHOUSE

親子餐廳越開越多,但平板燒嘅似乎只此一家。二月份生日會一浪接一浪,今次嚟到日式餐廳焱咲自煮理平板燒概念店為一班2月出世嘅小朋友舉行生日會,場面好熱鬧呀!

 

考考大家,知唔知「焱咲」二字點讀?我識我識!讀「艷」「笑」,查實我都係上網search㗎咋!位於荔枝角一座盡是美食嘅工廈,競爭咁大,點樣可以突圍而出呢?跟貼啲,跟住我哋嚟啦!

 

餐廳主打平板燒,每枱都設有電磁爐同抽氣設備。

 

開放式廚房外放滿玩具同車車模型,好吸睛喎!

 

不過點都唔及呢間兒童遊戲室吸引,不愧為親子餐廳,誠意度攞滿分!有孖住瀡嘅滑梯、波波機、不同款式嘅馬仔同車車,仲有玩具櫃添呀!

 

由餐廳座位區可以透過大玻璃窗望入去遊戲室,家長望到小朋友玩嘅情況,食都食得放心啲啦!

 

好喇!講番我哋個party先!今次有16位壽星仔女都係同年同月出生,淨係禮物陣容都已經夠晒壯觀喇!

 

各小朋友入到去遊戲室,你瀡我又瀡!non-stop咁不停瀡滑梯!

 

晴晴話馬仔都要瀡埋一份,見住啲馬仔we晒落嚟就笑到咔咔聲。哥哥快啲去幫手接住啲馬仔啦!

 

匿埋響呢度自成一角一樣咁開心!

 

最受歡迎都應該非呢部波波機莫屬。每次彈出一大堆波波出嚟嘅時候,就引來全場起哄!有啲執波、有啲放波、有啲拋波、有啲仲托埋個兜去接波,總之咩玩法都有齊,玩到勁high呀!

 

去到情緒最高漲嘅一刻就係咁嘅樣,呢張簡直係代表作啦!

 

除咗以上設施之外,馬仔、車仔都好搶手㗎!

 

開餐lu!我哋所揀嘅食物有鹽燒海蝦、香煎雞翼、燒菠蘿、雜錦炒烏冬、海鮮焗飯、肉醬螺絲粉、牛油蜜糖粟米杯、迷你熱狗、炸魚薯條、春卷拼咖哩角、雜錦串燒、一口餃子、雜果沙律同埋椰絲啫喱糖。好豐富呀!

 

平時開party多數叫到會,今次有廚房即煮即上,啲食物熱辣辣。好正!有美味嘅食物,梗係開心啦!

 

食物唔係一次過放晒出嚟!而係不停煮,不停添新款。啫喱糖同雜果就係啱啱擺出嚟㗎喇!

 

口乾仲可以到雪櫃攞飲品添!好多選擇呀!

 

如果唔夠亦可以自費添嘢飲,好似呢幾支咁可愛嘅兒童香檳$88/支,啱啱尋日先空運抵港㗎咋!

 

餐廳嘅食物以清淡為主,因為佢哋主打係小朋友都可以食得,所以味道唔會太濃。如果大人覺得唔夠味,可以加少少放在枱上嘅調味料。但我又唔覺唔夠味喎!啲食物ok好味,我仲不停添食添!

 

集體遊戲時間,大家都玩得好投入呀!

 

到戲肉喇!去到生日會嘅高潮——切蛋糕時間。睇下班小朋友幾落力一齊去吹蠟燭。

 

晴晴5歲大個女。生日快樂!最緊要身體健康呀!

 

臨走帶埋份生日大禮物回家,拆開好surprise,晴晴樣樣都咁鍾意,仲要攬住bear bear一齊瞓覺添呀!

 

焱咲地方唔算好大,但差不多一半空間去咗兒童遊戲室度,店主都好重視兒童嘅快樂指數喎!我哋party套餐係殘廢餐,店員會煮埋畀我哋食,實在太好喇!之前仲擔心又要照顧小朋友,又要自己燒,唔知顧得邊樣添!

 

最欣賞佢哋嘅係即煮即上,食物新鮮熱辣,平時party叫到會梗係無得比啦!開完party都唔覺個身大油煙味,唔知同佢哋嘅無油燒烤有無關係呢?不過唯一唔好嘅係booking太full,我哋係半年前book定㗎喇!係咪好誇張呢?相信食物同服務質素好先繼續有咁多捧場客。有機會都想再嚟過呀!下次一於試下自己燒,嘗試動手自煮理嘅新體驗!

 

焱咲自煮理平板燒概念店

地址:九龍荔枝角長沙灣道883號億利工業中心9樓916室
電話:6295 0918
Facebook專頁:按此

 

【編按:以上內容為作者之個人意見及立場】

相關文章

【牙醫話你知】如何處理牙斑?什麼是滲透式樹脂補牙?

【營養師話你知】不同脂肪對小朋友健康的影響

【跟住小編做媽咪】母乳媽媽唔易做 壓力大到幾乎抑鬱? 私心分享醫院級別奶泵!

【麻疹】6至12個月大嬰兒可提前接種疫苗 1個方法知抗體夠唔夠

緊貼新冠肺炎最新相關資訊