【親子好去處】SuperPark Hong Kong 芬蘭一站式室內樂園

旅遊情報
Posted on December 15, 2017 By       14,453

親子年度大大大盛事!因為來自芬蘭嘅 Superpark 終於殺入香港,早一排已經勁洗版,今日開幕終於可以率先嚟玩個夠。今日哥哥呀芊知道夜晚有得去玩,就即刻半個鐘內做好哂所有功課起行(不如每日放學都呃佢話有地方去囉不如…)

Superpark就位於「奧海城」的「一號銀海」地下,由奧運站E出口行過去,見扶手電梯落去,到外面見天橋行過對面就係。我目測都要10-15分鐘,正門面向海旁,環境超美!

以遊戲運動概念為主題,簡直可以話係一站式的室內活動樂園,因為佢唔單止適合幼小朋友玩,都啱年青人,甚至大人都一樣咁啱玩。如果帶小朋友嚟放電,可能你自己都要放埋一份

在 Superpark 裡面有這家 Cali-Mex Bar and Grill 都係隸屬於 Superpark 的,下次有機會我呢個扒控要試下佢 D 扒先得!

Superpark 主調顏色為紫+黃,有讀 Art 嘅同學仔一定知道呢兩隻色係對比色,真係好Sharp,本來想大家都搵番紫+黃色衫褲嚟玩,但老實講呢兩隻色平時真係少著少著


今日係 Grand Opening,先聽聽全球行政總裁 Juha Transkanen 講兩句,佢連同創辦人 Taneli Sutinen 都係來自芬蘭,佢哋喺芬蘭開咗一間細細的活動樂園,本預計容納10,000人,結果卻超出15倍。因而在世界各地繼續拓展業務,今年終於嚟到香港。



每一次影相佢哋擺埋D甫士我都唔係好明想表達D乜嘢。唔理咁多喇,快D戴上手帶著好襪準備入去開片啦

成班小朋友就好似跑馬地準備開閘嘅馬一樣(唔好怪我咁樣形容,其實似喪屍多D),職員姐姐一解開個欄帶就即刻衝入去玩

Superpark 設有3個園區
冒險地帶 Adventure Area
有迷你賽車場(是法拉利及寶馬踏板車)、超級車呔滑梯、空中滑索、粒粒障礙牆、兒童歷奇城巿及幼兒體操區等,最啱家長同小朋友一齊玩!
遊戲競技場 Game Area
彈珠足球場、棒球練習場、高爾夫球練習場、街頭藍球場,最正係有雷達及電子系統測量成績,用嚟比賽鬥高分最啱!
自由式殿堂 Freestyle Hall
滑板或踏板車(場地由主辦東京 World Cup Skateboarding 的頂級歐洲品牌設計及建造)、數碼攀石牆
 


佢哋一支箭就飛入嚟「幼兒體操區」就知道 Superpark 安排放喺門口最近地點係無錯


超有深度嘅波波池,芊芊跳咗落去真係得番個頭伸番出嚟!


哥哥就最鍾意玩吊環,飛嚟飛去!最驚你撞親其他小朋友囉


其實每個遊戲旁邊都放咗「遊戲規則」,不過佢哋都唔理咁多….見嘢就爬見嘢就玩


呢座我叫佢做「聰明豆山」因為呢個「粒粒障礙牆」斜坡上的裝置真心好似「聰明豆」同「蛇寫糖」

用唔同方法爬上去再瀡番落嚟,來回幾次真係大人玩都可以減到肥


呢個「空中滑索」係我見過當中最快,點解?因為輔助佢位哥哥真係出全力助跑起碼三分一路程先推佢出去,去到最尾端端真係成個人拋起咗,超刺激!連呀芊都敢玩,果然跟得我出去玩多,食過吓夜粥,大家碌到最尾睇片啦!

仲有多項運動+遊戲的設施好好玩,好似呢個你睇落以為剩係射籃球咁簡單,其實佢係集進攻與防守於一身的遊戲,雙方要將波掉中對方身後的閃燈板,同時又要防止俾對方掉中自己的。同朋友嚟玩一定玩嘅開心,睇嘅笑爆肚。





中途加插同朱薰E打咭!(兩個被老爸迫去影相的小孩

「高爾夫球練習場」兩兄妹跟我玩過咁多次,都仲係好似掃地咁…睇嚟等你哋再大D先教你哋啦

之後再嚟玩保齡球,不過唔係要推倒所有樽,係要將個波碌入去唔同分數嘅窿裡面

哥哥你姿勢錯哂喎


哥哥:「我砌!」其實都唔容易,連我自己一個都碌唔中,可能我屎波啦

又有得射籃啦!「勁力投球王」比起一般玩的大好多,最遠個籃目測真係有成15尺,呀芊只好射最近嗰個啦

哥哥呢種瘋了一樣的射球,我極之唔贊成!大家唔好學佢,一陣掉爛人哋個裝置就慘!


玩完一輪都係用手嘅遊戲,今次到用腳踢啦!「彈珠足球場」將波踢到唔同嘅分數人板或者嗰條好易滑梯嘅軌道,就可以同朋友比賽鬥高分。


睇住佢哋亂踢一通真好好笑


呀芊仲踢踢下走埋上去,佢唔係真係以為自己喺個足球場度踢緊波卦,一陣唔覺意俾哥哥踢個波「省」就痛死!


嘩!我仲以為咁復古有跳舞機,原來係一部更簡單更適合訓練小朋友腦筋及四肢協調的遊戲,只要按熒光幕顯示的位置(同步腳下的台楷也會亮起燈),然後跟著踩落去就得,呢度所有遊戲幾乎唔駛教,小朋友一上去就知道遊戲玩法。



旁邊有個「棒球練習場」,我睇見個棒球發射機噴出嚟個波快到眼都睇唔到,就知道呢個遊戲都係唔啱佢哋玩!影吓人哋就算…(BTW 呢個人真係下下都「嘭嘭」聲)

室內遊戲室點可以冇迷宮玩,迷宮多個出口有唔同類型的瀡滑梯
最刺激係呢條,又長又多彎!
但係除咗爬上爬落,迷宮底下都有D得意又啱小朋友玩嘅設施



呢個「迷你賽車場」佢哋就玩得最耐,雖然係腳踏車,但係一D都唔似,唔駛用好多力氣就已經可以推動架車向前郁,之後睇番資料原來每架車都係法拉利及寶馬踏板車,來頭不小!



連平時踩兩下踩唔到要喊嘅芊,今日都見步如飛!





見到呢個速度計分牌真係好PRO呀…究道我自己係咪TOP5呢?

呢個角度覺得自己好似打機 Mode

我要爬呀芊頭….(做老爸的梗係要一直扮過佢唔到啦…)

遊戲室三寶「波波池」、「瀡滑梯」同埋呢個「跳彈床」點少得,仲要係呀芊嘅至愛。這裡非常安全,因為每張彈床只能容納一個小朋友

另外一邊的彈床就有個海綿池


「超級車呔滑梯」,首先要將個超級滑梯拉上去

瀡落嚟前段較快,到後段就會慢落嚟,非常安全!不過其實都係睇邊個坐喺上面,如果係我玩可能快到甩碌

下圖中並非小女…唔駛嚇親

下圖都並非我犬兒…不過呢個區好啱習過武練過下體操的運動健兒上去玩

「街頭籃球場」名符其實係一個打籃球嘅街場,話時話…依家D康記籃球場咁難 BOOK,不如嚟 Superpark 玩仲好啦!


估唔到哥哥二年班已經夠力射籃…真利害

嘩!「數碼攀石牆」早一排已在網上成日見到,今次到 Superpark 終於可以試玩一下,不過真係堅難…要爬上去維持住已經唔容易,仲要拍打牆上投射出嚟的特效

睇唔出哥哥你又真係可以玩得兩手喎


最後著好 Full Gear 落場踩板同 Scooter 囉



真係由天光玩到天黑,呢個價錢算係超值,而且大人都可以玩埋一份,唔駛喺側邊玩手機






Photo by CANON 5D Mark IV, Len | EF 24-70mm f/2.8L USM
想跟我去體驗其他活動,快D報名親子團,同埋留意專頁公佈詳情啦!
http://goo.gl/forms/CNZMEPoMIWkouK8o2
呀劍評分: 10分
呀劍評語: 玩後感覺得 Superpark 真係適合一家大細,而且我個人認為即使小朋友得3-5歲,唔駛驚冇咩啱玩,也有大部份設施適合,你睇呀芊就知。2歲以下免費,可以入去玩下波波池吧!
地點: 大角咀海輝道18號一號銀海地下
網址: https://superpark.com.hk
開放時間: 星期一至五(10am-9pm)、星期六日(9am-9pm)
收費: $180/平日Day Pass、$240/假日Day Pass
(以上資料更新至文章當日)

Facebook專頁: 呀劍萬帥 kimfamilytravel
Blog網誌 : www.kimfamilytravel.com

kimfamilytravel
我不是甚麼旅遊達人,我寫的也不夠全面,只希望記下太太跟小朋友的點點滴滴,藉此也可跟大家分享些心得!
 
© Baby-Kingdom.com Limited. All rights reserved.