諗返起想當年未做人母嘅我，其實係好唔鍾意小朋友，我覺得佢地好麻煩，覺得佢哋係小魔怪。雖然一心唔想生，但係當年數下手指，自己都好快會奔3，所以要認真計劃一下…
但生BB之前，我身體都算唔錯丶健康，唯獨是M期成日都唔準…所以就試下去睇中醫到調理一下先啦~
醫師話我身體都幾健康~只需重點調經就可以。大概3個月，其實M期都已經準返晒。
當Ｍ期都準返之後，就開始不設房，點知話咁快就BINGO咗!! 諗返起去到懷孕第5週嘅時候，o個時我仲未知道有咗。但我開始有啲反應，飲凍嘢會覺得下腹有少少陰陰痛，但好快就唔痛。返工追車跑完下腹又會有少少痛，食左韮菜之後有作嘔嘅感覺，再加上本來已經tune返準時到嘅M，又遲左…遲左…遲左。於是我懷住興奮又緊張嘅心情去驗孕~~嘩嘩嘩~~第一條線好快出現，第二條線..勁慢勁慢..仲要若隱若現!! 我開心到差啲o係廁所到大嗌出黎~勁興奮!! 係兩條線呀!! 只係第二條線淺色啲!! 朋友話，淺色嘅原因係因為懷孕太初期啦，所以會咁!!
即刻打開廁所門同老公講，中左中左!! 我真係有左，點知睇梗電視老公出奇地冷靜，冇晒表情…呢一刻我覺得我老公其實係咪唔想要? 點知隔左差唔多一個鐘，原來老公係擔心梗「錢」。佢都好開心嘅，但一時之間反應唔切。
第二日，再去診所到驗多一次，confirm一下係咪真係bingo~真嘅!!我無發夢真係中咗~~~醫生仲嗌我快啲決定去邊間醫院到生，快快去排期添呀~~夜晚我即刻同老公講，我決定去QE生。最初其實有考慮廣華定QE，但最終都係揀左QE~因為QE好彩嘅話係可以照結構~慳返幾千蚊~
除左去政府醫院排隊之外，好多朋友都話最好去埋私家兩邊CHECK住BB嘅情況，所以我就搵多個私家去CHECK住~其實每次去私家，我地2公婆都好開心好興奮~因為每次都可以見到BB，每次去都有唔同~~由初初一粒閃閃下嘅豆豆，變到睇得出人形，有手有腳，望到有手指，肚dom仔~個感覺真係好奇妙~
體重方面，我就冇乜點樣增長到，終極到生為止其實我只係重左10磅左右。至於個腰圍去到生o個陣，就足足粗左13吋!! 個肚仲要又圓又長呀~~~打橫睇成個飛機欖咁~
成個孕期，最開心係!! 老公將我當公主般呵護~上車落車都會參扶我，冇BB o個時點會丫…一落車佢望都唔望下我就自己行左去啦…理得我行去邊丫。夜晚大肚婆最興抽筋，當然我都走唔甩…明明佢好難會扎醒ge人，聽到我慘叫”老公，抽筋呀，好痛呀!!”佢就會即刻醒~而家…阿女喊到拆左天，佢都冇反應…除咗咁，每次我話唔舒服，本身要出街佢都會唔強迫我， 俾我o係屋企好好休息，每餐想食乜都係我話事~總之無比溫暖同溫韾呀~
呢269天，我真係…I’m the Queen of the world. 但而家我只係一個奶媽 & 一個奴隸。
除咗咁，我最懷念嘅係BB去到19週開始，我有種好夢幻輕輕力嘅胎動!! 諗返起，都好開心，好興奮!! 每次我同朋友傾計，阿女喺肚入面都好似想傾埋一份咁，o係入面不停郁~~
至於飲食方面，好得意!! 和牛B 仲係一粒豆o個時，佢已經幫我戒左一日一杯咖啡呢個習慣。 另外就係，我其實只係戒左d生冷食物，同埋唔適合孕婦食嘅野食，同埋我最鍾意嘅蟹.. 其餘我乜都冇戒，辣、煎炸、薯片我都照食!!
好彩，我就冇孕吐，流啡呢d情況，真係要感謝神! 因為我陀得真係好舒服!! 仲一路都好輕盈，睇我個背脊完全唔似大肚婆 (所以搭車成日被人撞!!)。去到37週開始行唔郁…直情膝頭都痛!! 可能太瘦吧…朋友成日笑我，一對筷子篤住個波咁，食肥d啦!!
269天，話長唔算長，話短又唔算短~總之呢段時間，我係好開心，95%時間都係好開心，只有5%係嬲嬲豬~唔知係咪因為咁，所以和牛B好鍾意笑，好樂天。準媽媽嘅情緒真係好重要，要好好享受整個孕期呀~!! 我覺得最艱難嘅時間，就係最頭o個3個月，因為老人家成日話BB小器，要忍口唔好同人講。不過o係呢一part，我係西人!! 我覺得開心嘢唔怕講，如果BB不幸小產，都係因為BB發育得唔健全，所以佢先會自然流產。網上有啲文章都有講過，所以我並唔擔心。
懷孕、生仔，相信好多人都會諗起…「生仔好痛!!」、「十級m痛」、「好驚!!」、「唔想被人剪」。其實唔知點解，我陀住o個時都冇諗，都係抱住順其自然嘅心態。係直至，準備放產假，個肚大過籃球o個時，成日肚實實o個排，我開始有少少淆底~但係，呢種淆底感覺又好快冇~去到醫院等生o個2日，我直情覺得，點解咁耐都唔出黎…好悶呀!! 坐監咁…到穿水o個刻~!! 「嘩~!! 媽咪!! 發生乜事?! 我要點樣做呀?! 救命!!」其實你問我生仔痛唔痛，我覺得唔痛架，到而家我都只係覺得我好滑稽，因為我催生o個十幾個鐘，我都係咁典床典蓆，話好急屎好想痾咁樣! 又唔係痛，係有d唔耐煩好攰，就黎痾得出，但唔准痾~好難以形容o個種感覺!! 不過人一世物一世，生仔呢d經歷，我都覺得要經歷下嘅，唔親身經歷過，係唔知自己媽媽幾咁偉大!! 當然啦，做父母前真係要好好考慮清楚，因為責任好大! 同養小動物一樣咁大!
祝各位準媽媽, 順利生產, 開開心心!! 好好享受孕期~
