在媽媽谷裡，當談起奶奶的話題就每個媽媽都會出聲抱怨，只有一兩個媽媽會讚奶奶好！婆媳問題由古到今，而且不論國籍，相信都是千年難解的難題！找到好老公難，如果有個好奶奶更加難上難！
老公可以揀，老公媽媽冇得揀！那只好改變自己睇法，由自己做主動改善與奶奶關係！我都希望老公會孝順我阿媽，我地做新抱的當然都應該孝順奶奶！
自從生了Timtam仔之後我更加明白，十月懷胎，二三十年愛錫栽培養育仔仔，幾年間就比另一個女人搶走，點都會有點失落感，如果呢個新抱對我好，我多左個女孝順我，又照顧到我仔，我先會放心交個仔比佢！
想要好奶奶，我地做後生的可以主動出擊，先做個好新抱！我自己有少少個人心得，我奶奶人很隨和那種，所以比較容易相處，比大家一些心得分享：
1. 多溝通、多關懷
見到面可以多點和奶奶閒談，我每次都會先講天氣，凍左呀呢兩日，有冇著夠衫呀，有冇煲湯水潤下呀⋯⋯
由講天氣開始，可以引伸去不同話題，去關心一下奶奶，聽她分享，大家多點溝通，多點了解。有時候更要打個電話比奶奶，又係講天氣打開話題，藉此關心一下佢，呢兩日落大雨呀有冇出去飲茶呀…
2. 細心搵位稱讚
女人都喜歡被人讚！但又唔好做得太假，我會搵位去讚奶奶，例如有日奶奶穿了件新衫，就讚她件衫著得好睇，又或者個湯好飲，就讚她煲湯好甜好好飲，重點係要搵位讚，要真心讚唔好做得太假，睇得出架！
3. 老公是你最好的公關
如果你有一位神隊友，他應該會懂得在適當時間表揚一下，你曾經做過好老婆的表現比奶奶知，不過很多時，老公都係豬隊友，唯有提下老公，得閒係奶奶面前讚下自己幾句，當然你都要做d野令自己真係有值得讚的地方。
4. 識都要扮唔識
奶奶照顧左老爺和你老公幾十年，一定有一套做事方法，或許同我地新一代的處理方法不一樣，如果無傷大雅，我會靜心聽奶奶講佢的做法，就算我自己識，都會扮唔識問點解呀？咩黎架？點整架？當學多一個新方法，之後跟唔跟佢個方法做自己決定，但至少減少正面衝突。
5. 過時過節要送禮
做左新抱之後，過時過節都要送禮比奶奶，人人喜好不同，過時過節送花膠鮑魚冬菇這些送禮佳品一定人見人愛，如果怕唔識煮，可以買現成的，方便快捷！如果真係諗唔到送咩，都記得要封利是畀奶奶，心意最重要！
其實奶奶養育左我地老公幾十年，係應該要好好報答佢養育之恩，上一輩思想和我們雖然有很大分別，他們的出發點都係為我地好，我們做新抱的可以比多一點主動，多一點體諒，多一點關心，加多少少老公的公關技巧，只要有心，我相信終有日會收買到奶奶的心！
有興趣黎睇下Timtam仔的有趣video:
