【教育導賞團】參觀立法會大樓

旅遊情報
Posted on January 17, 2018 By       975

係電視就成日睇到議員係立法會開會情況,終於有機會可以嚟睇下啦!

其實係因為DADDY之前係網上見到有議員舉行教育導賞團,我地都成日好想嚟八卦下鏡頭以外嘅立法會係點,所以就即刻報名參加,好好彩我地又抽中(最好仲係免費…哈哈哈),所以就嚟參觀啦~

立法會一向都係覺得好莊嚴嘅地方,但原來仲係一個超級守衛深嚴嘅地方,因為一踏入大樓,首先就要穿過X光機檢查,睇下有冇帶危險物品。之後就要向秘書處進行登記,就連小朋友都要帶身份証明文件先可以入內(好在…我手機之前有影底小小豬張身份証,如果唔係佢都入唔到去呀)。

處理好登記之後,我地就係大堂先睇下。場內有兩個模擬主席同議員座位,我地就當然又嚟影下相啦~

大堂內仲有一個展覽區場,介紹立法會日常處理嘅事,同埋工作議員嘅工作。雖然依個題目對小小豬嚟講就好似深左少少,不過佢又睇得幾專心,對一啲簡單嘅介紹佢都好似明明地~

睇完文字介紹,仲有一個卡通短片講解,睇埋依個短片,小小豬話佢明白晒啦~

但其實……佢明白嘅就係有關投票嗰一部分,因為對上一次立法會選議員時,佢地兩父子拎住啲參選者宣傳單張不停講~

睇完一輪介紹,終於到戲肉了,我地跟住導賞團去參觀立法會會議廳啦~

未入會議廳前就先遠望議員休息室,由於依間房就只限議員及政府官員休息之用,所以我地就只可以係門口望下啦~

成日係電視見到嘅會議廳,不過因為係星期日關係,所以我地唔可以係正門進入~

我地經由傳媒路線,終於入到嚟啦。第一個感覺係 ——- 嘩……真係好大呀~

依個時候議員哥哥都有為我地講解平日佢地嘅工作,開會時佢地係點投票,同埋一啲小趣事。小小豬仲發揮佢每事問精神,不停問議員哥哥好多問題,總之就由返嚟開會倏過乜就問到佢離開,真係冇佢咁好氣了(好在議員哥哥都好有善咁答晒佢..呵呵)~

我地仲可以行近少少睇下主席個位添,難得機會就當然要影返張相啦~

之後我地就向三樓出發,去參觀一個有關立法會嘅歷史~

真係唔睇唔知,原來立法會係有咁耐歷史,邊聽邊睇我都真係對立法會了解多左呀~

好在小小豬對啲模型展品都有點興趣,所以都冇悶親佢~

最後就嚟到五樓嘅天台花園,個環境真係超靚呀。因為小小豬要去洗手間關係,所以我地都冇係花園周圍行,不過單係睇依座特別建築物都OK啦~


唔覺唔覺我地係立法會都行左兩個幾鐘,雖然感覺立法會依個題材就好似對小小豬嚟講難左啲啲,不過佢都話幾鐘意,都明白議員哥哥嘅講解。最記得就係個會議廳,當新聞見到會議廳時佢就會話 : 我曾經有入過去,入面真係好大呀!之後就滔滔不絕講佢係入面見過嘅事物啦。

其實立法會大樓仲有一個兒童故事活動,有故事姐姐為小朋友講有關立法會嘅故事(不過要預先致電預約),等我搵日帶小小豬嚟聽下故事先得!

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。
 
© Baby-Kingdom.com Limited. All rights reserved.