喺網絡上好多媽媽都呻自己老公係豬隊友,又有唔少人妻疑心枕邊人出去滾。如果有得揀,你寧願另一半精叻定蠢?
近日網上討論區有老婆呻老公 超 級 蠢!有時係幾好笑,但有時真係畀佢激到嘔血!用$100去換張$100 coupon、買嘢唔知價畀人劏都係小事。最經典係去日本旅行,填入境紙時有關犯罪嘅問題剔曬Yes(咁都入到境真係偷笑喇);去首爾旅行時睇錯地圖,行咗5粒鐘先到目的地,仲死撐「都行到去呀」,樓主一句「咁英國都行到去法國啦!」笑到Juicy媽肚痛呀......
唔少人妻紛紛和應,話畀屋企個蠢老公激死咁話喎!例如唔識計折扣、泊完車永遠唔記得泊咗喺邊、少少common sense都冇唔知點解返工冇畀人炒......
分分鐘想「樁」佢一鑊!
有人話,嫁老公唔嫁個叻過自己嘅,仲要湊返佢轉頭,咁嫁嚟做咩?又有人覺得生活有呢啲趣事調劑都唔錯,仲有人覺得好sweet添~話老公太精叻,成日畀佢話鬧,又擔心佢有冇嘢呃自己,咪仲辛苦!我就覺得老老實實冇咩唔好喎,好過冇真本事又要搶住揸fit喇。與其話樓主老公蠢,倒不如話佢係比較率直,唔會「算死草」啫!
其實樓主開post時都講咗一大堆自己老公嘅優點:雖然學歷唔高,但擅長木工、電器;自己同阿女唔開心時聽佢表演講普通話同英文,次次都笑到噴飯;識得砌傢俬,床、大櫃都係自己砌;家務做得好好,洗嘢洗到熠熠炅;廚藝高超,晚晚揸鑊剷煮飯;又捱得又老實,睇親感人嘅戲仲必定會流下男兒淚添。
嘩!咁其實呢個笨蛋老公幾可愛呀,仲好廿四孝添!有咁多優點,係傻瓜咗少少啫,唔過份呀。
蠢又好、醒又好,難得相知相愛,就欣賞多啲對方優點~
有位網民講得好啱,樓主嫁得畀佢,都係因為睇到佢嘅優點勝於佢嘅缺點啫。係呀,人無完人嘛,每個人都總有缺點嘅。揀得佢做老公就冇得怨喇,最緊要係錫自己!
話說,其實呢位人妻開Post,係唔係想曲線晒恩愛啫?
即刻Click入討論區一齊傾