奶奶有冇責任幫新抱煲薑醋 坐月?

增廣見聞
女人語
Posted on February 22, 2018 By       9,681

180223-cookfor

最近喺網上討論區見到個Post覺得幾得意:人哋聽到有媽媽生咗兩個囝囝之後,就叫佢報定陪月課程,為將來照顧新抱做好準備喎。

咪住先,奶奶係咪真係有呢個責任?

呢位媽媽就覺得,將來新抱陀B,有老公(自己兩個仔)愛錫同照顧已經好足夠,最多都係請工人幫手。奶奶同新抱保持距離先係最美好,仲有自己已經湊大兩件,都冇咩興趣再湊B喇,間唔中幫吓手都得嘅。

baby-belly-1533541_960_720

有人話呢位媽媽懶,我完全唔同意!

Juicy媽好buy一句:折現最實際。奶奶呢個角色,與其話係有責任,其實只不過係一份心意,如果變成彼此嘅負擔就無謂啦。食嘅嘢滋補嘅嘢,買現金卷或者折現,冇人會唔鐘意喇掛!

有時準備自以為好嘅嘢,未必人哋都覺得好。好似有啲媽媽有奶奶「幫」自己坐月,但做法又唔啱自己心水,仲有啲衰奶奶坐月期間問新抱點解唔幫手做家務!我諗大部份新抱嘅心聲都係:奶奶唔幫手都唔好添麻煩。所以有媽媽話,「升級」做奶奶後都唔會做呢啲吃力不討好嘅事。做得好係應份,好可能被嫌三嫌四。啱啱生完嘅女人好多都心情差,分分鐘會畀人爆。仲話個仔同新抱冇錢諗唔掂,不如就唔好生喇,總之就唔好吓吓依賴阿媽。

我覺得好啱喎!大佬,咁辛苦先盼到個仔大,仲唔享吓清福歎下世界咩~仔大仔世界,就唔干涉咁多喇,有咩自己搞掂佢啦。總之我教到兩粒仔有腰骨、錫老婆就得喇!

大家都好似Juicy媽都咁開通嘅話,香港下一代應該少好多婆媳糾紛喇。

即刻Click入討論區一齊傾

飛天中女Juicy媽
育有兩粒仔、一件老公, 湊仔煮飯忙到飛天的中女媽媽一名,平日最愛食花生當減壓。
 
© Baby-Kingdom.com Limited. All rights reserved.