因為屋企附近嘅街市大裝修(要等到八月中先重開...都幾大件事),我又唔想去平價店買,去超市買又好似貴貴,而且又唔想好似同啲姨姨搶靚肉咁,所以依排少左煲湯,點知依個小小豬竟然投訢話冇湯飲。
好啦...既然佢開到口,咁我就即刻買齊材料,煲個清熱滋潤嘅雪蓮果合掌瓜海底椰瘦肉湯~
雪蓮果具有消涼退火、清熱解毒、祛斑除痘、增強機體免疫、防癌;合掌瓜就清熱解毒、理氣和中、疏肝止嘔;海底椰有助清燥熱、止咳、滋陰補腎。(網上資料)
雪蓮果1個、合掌瓜2個、海底椰1両、南北杏1湯匙、蜜棗2粒及瘦肉約$30~
海底椰及南北杏浸洗一陣~
雪蓮果去皮切塊~
合掌瓜切半去心,然後切塊~
瘦肉洗淨汆水~
煲內放約2L水,然後隨水加入所有材料~
待滾起時,用大火加蓋煲約15分鐘~
之後轉慢火加蓋煲1.5小時~
最後加入少少鹽調味就飲得啦~
啖湯真係超級清甜,加上餓左我啲湯水都有一段日子,所以小小豬話好好飲,佢仲一口氣飲左兩大碗,仲叫我下次可以再ENCORE添....真係好一隻氹C人嘅傻豬仔呀!
溫馨提示: 由於個別人仕體質不同,所以大家記得煲之前了解下自己,如有疑問,請先向註冊中醫查詢!