【小小豬熊本親子之旅】自製立體乾花瓶

旅遊情報
Posted on May 14, 2018 By       727

繼續我地嘅親子之旅,今次就分享一個手作活動,可能對小小豬嚟講可能未必係最大興趣,不過我就興趣極濃,因為去熊本最大出口嘅蘭花園參觀,又可以自製立體乾花瓶呀~

今次所參觀嘅蘭花園,據園莊主同我地介紹,佢地主要都係銷售俾各大酒店及百貨公司,而佢地主要都係以白色蘭花為主呀~

當然除左白色蘭花之外,佢地都有好幾個蘭花品種,對於近期好鐘意影花嘅我就啱晒,見到咁靚嘅花真係好難唔密密影低佢地嘅美態呀~




除左新鮮蘭花,園內都有製作唔同種類嘅乾花,用嚟整立體乾花瓶。原來唔係隨隨便便晒乾啲花就可以做成乾花,佢地都要經過防潮、加熱、吹乾…等過程先可以保持花花最美嘅一面呀~

睇完靚靚蘭花,又了解左乾花嘅製作過程,就到左我地嘅DIY時間啦~

原來乾花擺設都有咁多種類,佢同鮮花都好似分別不大,所以初時我都以為係用鮮蘭花整呀~


一切準備就緒,就可以開始啦~

首先就當然係乖乖聽姐姐教我地整依個乾花瓶嘅技巧啦~

之後就到我地動手了,坦白講初時都真係唔知從何入手,因為我完全係零藝術天份,叫我嚟做個設計,真係幾考我~

另外啲乾花又真係幾脆弱,大力少少都好易整爛,當然就唔希望做成浪費,所以都有丁點壓力呀~

最後….我同小小豬都下定決心,只要慢慢做就一定可以整到我地認為靚嘅乾花瓶,所以就分工合作,小小豬就負責揀花花,我就負責放入瓶內~

我地佈置好晒就交俾工作人員封好~

我地嘅靚靚乾花瓶就完成啦,其實…..都唔算差呀(自我感覺良好中…哈哈哈)~

見仲有時間,所以姐姐就教我地整另一款乾花瓶~

嘩…依款水般乾花瓶易整好多,所以小小豬都可以一手一腳自己整呀~


我地三口子嘅傑作,都叫做OK啦…哈哈哈~

正當我地準備離開之際,園內嘅小狗”阿蘭”出現,三位小朋友都好興奮咁同佢玩。尤其係小小豬,佢啲精力就由見到”阿蘭”開始恢復,玩得不知幾開心,仲好唔捨得佢添~

雖然小小豬都有耐心咁齊齊整乾花瓶,不過我都知道佢內心深處都係唔太鐘意依啲咁文靜嘅玩意,佢肯陪我乖乖完成,都應該要讚下佢啦!
題外話:

活動翌日經大會通知,原來我地前往參觀上左日本報紙,仲見到我地三口子添,都真係有點驚喜,為我地今次熊本親子之旅留一個好好回憶啦….哈哈哈~

More Information:

戸馳島 宮川蘭園
地址:熊本県宇城市三角町戸馳397
電話:0964-53-0752
Website:http://www.livingorchid.com/
Facebook:https://www.facebook.com/morimizuki/

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。
 
© Baby-Kingdom.com Limited. All rights reserved.