【母親節鉅獻】爸B Master Chef 媽咪:絕對係心意搭救

夫妻關係
親子生活
Posted on May 11, 2018 By       1,929

母親節就嚟到,與其出去被各大食肆劏到一頸血,不如花少少心思,媽咪可能仲開心~今次笙演奏家盧思泓就獻上佢珍貴嘅第一次,同一對仔女挑戰煮餐愛心爆棚嘅住家飯畀老婆歎!

笙演奏家盧思泓先生、鋼琴家湯美蓮女士同佢哋嘅小朋友盧睿風、盧睿晴。如斯優雅嘅音樂世家,到底入唔入得廚房呢?我哋好快就會知道~

呢個畫面,好可能做媽媽嘅見到已經心都甜晒,唔使食飯都飲水飽~

雖然做足功課,但落手做原來都唔容易,加上湊著兩位小朋友。爸爸,任重而道遠啊~

試食時間~

雖然帶子係炙燒同刺身fusion嘅口味、叉燒炒蛋似腊肉炒蛋,檸檬雞翼甜蜜入口但食唔到檸檬味……媽媽最後都係照單全收,畀出10分滿分~仲話畀我哋聽:「呢個10分唔係指味道,絕對係心意搭救!」

睇吓佢哋嘅感言:

爸爸盧思泓:

印象之中我應該從來沒有煮過飯,小時候只有看著媽媽煮,曾想學卻無從入手,技術僅流於煮即食麵及煎荷包蛋水平,曾獨自居住的數年間,一向以茶餐廳為伴,賴以為生。

惟初出茅廬時,同事建議派對中各人自己準備一道菜餚,無可奈何急抱媽媽佛腳,學了檸檬雞翼,成為獨門秘技。年代久遠,記憶雖依稀,但相信食太座唔死,便成為了母親節給太座的一份禮物。另外叉燒炒蛋和西蘭花炒帶子,都是想像中大大概概能夠駕馭的,便膽粗粗嘗試一下。

過程中,煮飯唔見米,煎蛋無落奶,帶子半生熟,雞翼外皮焦,內裡紅當當,用來遮掩的檸檬味被糖水沖走,好好地一隻檸檬雞翼,搞到 …… 失敗!

煮飯果真不易,先後次序錯了,飯菜上枱時隨時已經凍哂,今次希望太太唔好介意,粗粗地都算一餐。跟她識於微時,話哂幾十年黎第一次,仲要同仔女一齊煮,手忙腳亂得黎都希望送給她一個特別的母親節~

媽咪湯美蓮:

老公突然說要煮飯給我吃,我心諗佢做咩無端端咁好死,廿幾年黎杯麵都無冲過一次俾我,今次仲要話同啲仔女合作。

後來知道原來要拍攝,咁應該幾好玩,姑且俾佢試一試。話就話係同仔女一齊煮,但其實都係老公為主,又知佢應該都唔係幾掂,所以都係之前問問佢想煮乜,點知我都未問佢,佢又問番我轉頭…..

老公話佢有獨門秘技檸檬雞翼。好!睇下係咩料。另外為著大家健康著想,我建議了西蘭花帶子同叉燒炒蛋,呢兩味餸如無意外應該會比較安全,食我唔死。好,去片!

睇住佢地,其實仲緊張過自己煮,無端白事老公走去炒蛋先,好唔好味都算,但炒完放喺度咁耐,都凍哂啦。西蘭花切到碎哂,叫都叫唔住。雞翼都煎到燶了,佢仲要死撐話有BBQ風味……

其實佢地一齊煮俾我食,我當然十分開心,今次真係第一次,好好醜醜我地都食哂所有嘢。希望佢地遲啲再有新嘗試啦,下次我會叫定外賣先~

哥哥盧睿風:
煮飯開頭好好玩,不過之後就有啲悶。同攝影哥哥玩就最開心。

妹妹盧睿晴:
其實我都只係切嘢同打蛋,幾好玩咁囉,不過爸爸煮得唔好食….

 

想知煮食過程爸B有咩蝦碌騰雞事?即上Baby Kingdom Facebook專頁睇片!

BK Milk
《親子王國》為爸爸媽媽提供的優質營養食糧。
 
© Baby-Kingdom.com Limited. All rights reserved.