家長擔心子女手機不離手 幾時應該開始用手機?

成長健康
Posted on May 9, 2018 By       2,375

家長們對智能產品包括電話、平板電腦等絕對係又愛又恨——細個時一畀個電話BB做「電子奶嘴」,大人就可以靜靜地休息下,但又驚佢會成日睇,影響眼睛健康;到小學高年級,自己返學放學,有個電話畀佢WhatsApp報平安會安心啲;但又擔心佢有個電話會成日沉迷,機不離手!

 

特別係高小及初中學生,家長就「小朋友應否用智能手機」在討論區發表意見:有家長開始畀高小及初中子女用電話,都係因為等佢自己試下返學放學,有電話方便報平安,主要係星期一至五短時間用,但後來發覺有好多同學喺WhatsApp group傾功課,加上老師都會用黎同學生溝通,就放寬咗畀佢哋放學放假都可以用電話。至於幾多歲開始用電話,綜合網民的意見,其實由子女會獨自行動開始就應該要有一部智能電話跟身。

 

雖然家長都好擔心小朋友會用電話成癮,但限制小朋友完全唔用智能手機真係好難,一來會miss咗學習方面嘅重要資訊,二來會影響同輩之間的社交關係,小朋友好容易因此被孤立;亦有家長認為高小及初中學生唔需要手機,一樣可以有正常社交;傾功課更加可以留喺學校傾完先走。

 

對我黎講,我自己深明智能手機有幾易令人沉迷;但同樣我都明白有智能電話為生活帶來更多方便,作為一個潮媽,我個仔唔使好潮但至少可以同同學仔保持到基本的溝通,沉迷與否就真係睇小朋友嘅性格,唔會禁止佢哋用手機。

不過我就有以下幾個做法,各位對於小朋友用智能產品問題好糾結的家長可以參考:

1. 幫子女揀一個限速限量Plan:如果只係想子女同用WhatsApp基本溝通,好間唔中send下Video畀我哋,每個月1gb-2gb都好夠用喇。

2. 屋企定時改Wi-Fi 密碼:唔想佢哋喺屋企不停上網,最好就係定期改Wi-Fi密碼。如果小朋友表現得好,完成功課同溫習,就畀個密碼佢哋上網啦。

3. 設定嚴禁用手機時間:食飯時間我真係好嚴厲禁止小朋友玩手機,有朋友話食飯睇電視唔通又無問題?無錯啊!我寧願佢同我傾下電視劇情,都好過沉迷喺自己嘅手機世界吖嘛!對我自己都係一個提醒,一家人一齊放低個電話好好食餐飯啦!

 

即刻上討論區一齊傾

 

 
© Baby-Kingdom.com Limited. All rights reserved.