【個心離一離!】小朋友一腳破壞二千萬藝術品 帶小朋友睇展覽要留神!

親子生活
Posted on May 14, 2018 By       3,394


睇多啲展覽,提升返個人嘅藝術方面的修養絕對係好事,帶埋小朋友去,等佢細細個開始薰陶就更應該。好似近排喺香港舉行嘅《法國五月》藝術展覽,聽個名都知厲害,仲要已經喺香港舉行過25屆,不過唔係因為小妹妹「呢一腳」,我都真係無留意呢單藝壇盛事。

 

話說有網民Post咗一張相,喺《法國五月》展覽中拍攝,相入面小妹妹神情都好驚慌,見到幾位相信係保安人員嘅男士同妹妹嘅父母交涉中,旁邊就有一堆藍色類似沙狀嘅物體撒咗出黎。呢啲「沙」就係被譽為顏料界嘅貴族——群青(ultramarine),為藝術家Yves Klein嘅作品,而呢幅作品價值高達2000萬!

 

對於誰是誰非,網民反應都好兩極,有人話小朋友太細個唔應該去博物館,媽咪有好大責任拖到小朋友實一實,今次破壞咗幅畫絕對要負責任;而有好多網民都唔明咁名貴嘅畫,唔係應該有個欄保護返件作品咩?大人都有機會睇唔清楚又踩咗上去。當中仲有段插曲,有目擊者出Facebook post,話家長本身講普通話,但發生事之後突然「轉台」講英文…

 

我自己望張相個心都離一離,如果係自己仔女整爛人地啲畫啊擺設啊…真係會勁唔好意思,仲要賠錢,所以我都同部分網民嘅想法一設:想佢感受藝術,都係等佢大少少先去,唔係話我唔想教佢欣賞藝術,而係我都要尊重返個場合,人地黎睇藝術品,我個小朋友當藝術品係KINETIC SAND(唔好怪我唔識嘢,真心覺得好似….),所以我都係建議大家睇展覽或者去音樂會之前,諗清楚自己小朋友受唔受控制先,無謂破壞自己、小朋友同參觀者心情。

快啲入討論區一齊傾

 
© Baby-Kingdom.com Limited. All rights reserved.