【滋潤祛濕】雪梨乾紫無花果薏米水

幼兒食譜
Posted on May 16, 2018 By       3,227

早幾日買材料煲祛濕解毒嘅涼茶時,店主叔叔就提我解毒之後就要滋潤返,咁就係最好嘅祛濕飲法,之後佢仲教我煲依個既滋潤又祛濕嘅雪梨乾紫無花果薏米水。

哈哈哈…有人教路我就當然係乖乖受教,尤其係祛濕涼茶,因為我真係好怕唔好好預防,小小豬個濕疹壞朋友又嚟搵佢。所以….即刻買埋材料,努力開工煲涼茶~

雪梨乾具生津潤燥、清熱化痰之功效,雪梨本身屬寒涼之物,但雪梨乾經過烤焗後反而潤而不寒;紫無花果係無花果一種,質感較軟,含豐富花青素同埋抗氧化,所以對眼睛同埋皮膚都有幫助,而且仲可以防治傷風、感冒,增強體質。(網上資料)

雪梨乾兩両、紫無花果八粒、生熟薏米各兩湯匙~

生熟薏米洗乾淨後浸半小時~

其他材料浸洗一陣~

煲內放大約1.5L水,然後加入所有材料~

待滾起後,用大火加蓋煲10分鐘~

之後轉用慢火加蓋煲45分鐘~

隔渣後就可以飲得啦~

雪梨乾、紫無花果、薏米依三樣食材我都分別煲過,小小豬都係唔抗拒嘅,所以我都唔太擔心。不過…依三樣一齊煲又真係唔錯,甜甜地都幾好飲呀!
溫馨提示:
由於個別人仕體質不同,所以大家記得煲之前了解下自己,如有疑問,請先向註冊中醫查詢!

KinseyMaMa
一切以小小豬為中心,讓小小豬擁有一個快樂的童年為目標。同隻百厭豬一齊整嘢食又周圍去玩, 記錄我們這一家嘅生活傻事,讓大家可以陪同小小豬一起成長。
 
© Baby-Kingdom.com Limited. All rights reserved.