2018-05-29

9.1K

回流返港難搵工 網民怨父母無遠見:用幾十萬學費幫我畀首期好過啦!


去外國讀書機會唔係人人都有,講緊供一個未有搵錢能力嘅高中生供到大學畢業,生活費學費樣樣都係錢,幾年間嘅使費動輒要幾十萬!要父母有返咁上下積蓄先供到。但近日有網民開post畀意見,以過來人身份提大家諗清楚應唔應該供仔女去外國讀書,原因係:當年父母無遠見,一早應該留返啲錢幫我畀首期好過供我去澳洲讀書!

 

大家睇到呢度可能會諗,係唔係因為當年父母逼樓主去外國讀書,所以有條刺啊?絕對唔係!當年考完會考成績麻麻地唔想出黎做嘢嘅樓主,知道阿爸阿媽好想佢讀大學:「好怕出嚟做嘢,repeat又覺得好瘀,於是就嗌阿爸阿媽供我去外國讀。」嗱,其實係樓主自己話要去外國讀書架喎…但係點解最後又要怨父母呢?請睇埋落去…

 

結束咗幾年既留學生涯,阿爸阿媽就叫樓主要返香港搵工,唔想返香港嘅樓主免為其難接受現實返香港。搵工嘅過程中樓主受盡白眼,只有好少見工機會,而見工嘅HR都會睇埋樓主個會考成績,之後係等消息…結果回流香港幾年都只係做緊同專科無關嘅文職工作,有無去外國讀書根本無分別!樓主總結:「有時我會諗如果會考嗰陣阿爸阿媽用筆錢幫我畀首期,依家就唔使咁辛苦,日日hea仲賺到幾百萬,累我而家做死一世都揾唔返!」

 

呼…睇完個post真心覺得樓主講得好絕,睇到有少少嬲嬲地!無錯,當年買樓就當然無今時今日買樓個價咁癲,早買早享受呢樣嘢我當然明白!不過有心水清嘅網民就講到重點:「讀書同俾首期根本就係兩回事。唔通你父母畀左首期你,你又一定條路好過而家?」有好多網民分享好多讀書唔叻去外國,結果出人頭地嘅例子,結論係一個人成功與否,要講天時地利,最重要都係講心態。

 

睇返樓主嘅帖同埋回應,出現好多「如果」:如果阿爸阿媽有遠見…、如果我阿爸阿媽有盡過力…、如果依家有樓收租…,就知道樓主問題係:我無問題!

 

就算係香港定外國每個人都有自己生活上遇到嘅困難,讀到名牌大學一定順風順水?讀唔成書就一定會搵唔到錢?當年買到樓今日就有條件Hea?如果覺得難搵工,就更加應該好好裝備自己,無人可以擔保裝備好自己後就會有人賞識,但出發點係樓主個心態要諗點樣改變現狀,唔係不停將責任歸究父母無遠見。最後有網民都好同情樓主父母,講咗一句幾中肯嘅說話:「掉返轉,佢哋都會諗幾十萬攞嚟畀首期,做定期,都好過投資係你身上。」

 

入黎討論區一齊傾:澳洲畢業返嚟好難競爭,畀首期好過

【編按:以上內容為作者之個人意見及立場】

相關文章

【親子活動】「童心同行送平安」親子月捐計劃 不一樣的學習體驗 從小培養孩子善心!

【兒童健康】小朋友反覆生針眼可能有寄生蟲?醫生:或被家長傳染!

【母嬰關係】BB哭泣是建立依附關係的訊號!爸媽4招回應有助增加BB安全感

【兒童情緒】小朋友留意蔡天鳳案感焦慮不安 專家建議3招安撫情緒

緊貼新冠肺炎最新相關資訊