近年聽多咗全職爸爸呢樣嘢，家庭主夫打理家頭細務，照顧好小朋友都唔係冇可能。今日喺forum見到有剛懷孕嘅媽媽呻，自己打工負責屋企大部份開支，老公一直喺屋企睇住囡囡、做家務同煮飯。知道樓主有咗BB之後，都唔願意出返嚟做嘢，話自己喺屋企湊小朋友仲好啦。
好多媽媽（包括我自己）睇到都諗：嘩，冇嘢呀，男人老狗係咪咁窩囊，老婆同你生仔仲要搵錢返嚟養一家四口？
不過都有啲網民冷靜啲咁睇，而家個情況同老公出去搵錢，覺得自己老婆成日喺屋企好輕鬆一樣啫，只係調轉咗性別。諗深一層全職爸爸定媽媽都好，或者我哋都唔應該諗到喺屋企嗰個係好得閒嘅，做緊全職媽媽嘅都有苦自己知。維持家庭聽落好簡單，但其實可以令出去搵錢嘅一方了無牽掛，背後都付出唔少架！
呢個年代成日講唔好性別定型，女人唔一定喺屋企煮飯湊仔。但見到女人撐起頭家，老公做家庭主夫嘅case，都總會覺得個男人冇鬼用。男人應該有承擔賺錢養家嘅觀念太深入民心，冇計。不過又真係好多嘢得女人先做到嘅：好似懷胎十月、分娩嘅痛楚、產後嘅復元，男人邊有辦法體會架啫？
女人大住肚，但因自己係家庭支柱要顧住份工，冇得好好休息，好容易壓力爆煲架陰公。如果呢個時候老公仲唔拎返啲男子氣概出嚟，出去賺錢幫輕吓，咁就真係講唔過去喇！
講到尾每個家庭會有唔同分工，但不變嘅係要互相體諒補位囉。男人享受喺屋企照顧小朋友唔係問題喎，之不過由個老婆捱生捱死嘅話，咁個老婆唔嫁做女唔係仲好？
