今次去大阪旅行，其實都幾即興，大概4月落實訂機票、民宿、租車。今次我哋係兩個家庭去，4個大人，兩個3歲小朋友及1個手抱嬰兒。今次我哋超大膽，挑戰帶寶搭廉航，機票一家三口大概4千蚊左右，早機去晚機返。
早上大概11點嘅機，回程就大概晚上9點。全程大概4小時，和牛B都有瞓全程，但係就瞓得好唔舒服，成日醒。落機直情成個人醒晒 (香港時間凌晨1點!!!) 拎埋行李，不過當日回我哋唔多順利，飛機Delay，行李又Delay，完成斤有嘢返到屋企己經凌晨2點半Zzzzz….。
住宿
住宿方而，我哋都係喺AirBnB (https://www.airbnb.com.hk) 到訂房。房子喺正黑門市場旁邊，仲有停車場(非免費)。位於市中心真心方便!! 房子有兩房，一廁一浴，我哋住6晚，價錢大概5千8左右。
仲有個露台仔，出面有部洗衣機，窗外景色都唔錯。
自駕遊租車
租車雖然令到旅費成本上升，但係絕對方便母乳媽媽、換片餵奶，成件事舒適咗好多。就算無帶到嬰兒去大阪，如果每去完一個景點，小朋友放晒電想好好瞓個覺，自己揸車成件事嚟得好舒服。
我哋租咗架7人車Toyoya Noah大概5千元左右，另外再於當地租車公司申請埋ETC，還車時一次過俾橋費，好方便呢! 申請左ETC好處係，唔需要每次停車摷錢支付橋費，快捷好多。
關於Times Car: http://www.timescar-rental.hk/
大阪遊 Day 1
早上大概8點要去到機票辦理登機手續，和牛B已經好清醒。辦理好所有手續，就去嘆返個早餐就上機啦! 由於係廉航嘅關係，所以全程機係無嘢食嘅，當然啦可以於機上面即場購買嘅。
完全無Delay之下，落機大概當地時間下午4點左右，步行去Times Car拎車大概5分鐘左右嘅路程就去到。完成手續，再揸車返民宿又大概用咗1小時。
無幾多時間可以玩，加上落雨，只所以Hea 遊心齋橋。去固力果大廣告牌前面影張相打卡，再快閃咗心齋橋筋商場。
位於心齋橋筋商場入面嘅一間Waffle甜品店MAISON de gigi，我完完全全被佢吸引咗。
窩夫有多種口味，原味150円，朱古力味170円，抹茶味220円等。
見到一疊疊嘅窩夫，已經流晒口水了!!
窩夫本身都甜，咬落有少少砂糖感沙沙聲，再配埋朱古力就更加甜~
然後去買少少日用品，再去Lawson便利店買啲嘢食就馬上返民宿休息了~
行程上我經常都會去便利店，LAWSON及Family Mart，聽落去好似好Cheap窮遊咁。但其實日本便利店嘅食物質素一啲都唔差，仲好多選擇。
而比較之下，LAWSON嘅小食(炸物)、飲品、食品選擇都比Family Mart較為多。
飯團、便當都超多款!!
LAWSON仲有限定嘅商品"GODIVA x UChi Café"蛋糕及大福餅，超超超好味呀!!!
而去到日本便利店一定要食嘅炸雞小食!!! LAWSON係超多款選擇，真心有排試。
日本嘅便利店，飲品勁多，有啡癮嘅我，第一個目標一定係試飲所有咖啡!!
開足7日Party嘅兩位3歲細路仔。
7日6夜嘅行程，我哋主力係以小朋友行程為主，大概去咗以下嘅地點。旅程中，每晚當班細路瞓晒之後，我哋班大人就會嚟個行程整理。首先要留意第二日天氣，再決定需唔需要調行程。而下面嘅行程，有啲我哋係去唔到，因為有啲景點小朋友真係好鍾意，玩到唔捨得走，我哋唔想掃興令小朋友，所以無特別去追趕行程，去唔到就唯有下一次再去啦。上面分享咗第一天，其餘日子就去咗下面嘅景點; 詳細稍後分享。
Day 2
大阪城 + 大阪城公園+ Kids Plaza + 扇町公園
(睇落行程好多，其實好多景點都係喺正隔離)
Day 3
黑門市場 + 神戶麵包超人兒童博物館&细菌秘密基地 + 神戶動物園王國
Day 4
環球影城 USJ
Day 5
嵐山小火車 + 京都鐵路博物館&梅小路蒸氣機關車庫 + 梅小路公園 + 伏見稻荷 + 花見小路
(完完全全係火車日)
Day 6
奈良餵鹿 + 東大寺
大人之購物日 + 夜遊快閃放電時段 Round 1 Stadium
Day 7 - 回程
海遊館 + 天保山大摩天輪 + The Yu Kids Playsystem + Rinku Pleasure Town Seacle
----------------------------------------------------
Facebook專頁: 和牛B嘅成長專頁
