香港土地問題有幾嚴重？就係結婚都怕輪唔到公屋呀！嗰日畀我喺Forum睇到人問「排公屋緊要定排期註冊緊要」，真係有啲心酸！樓主同男朋友一齊已十年，仲有埋小朋友。仲唔註冊係怕兩個人註冊後入息過咗申請公屋嘅規限，而另一半都好老實咁講：我覺得公屋重要啲囉。
講真，邊個女人理性到聽到呢啲說話唔心淡先得架。不過結婚的確樣樣嘢都係錢。註冊、擺酒、林林總總都使唔少架。
咁網民嘅反應都幾兩極。有人話：個男人想同你結婚，都唔使等十年、等到小朋友都有埋喇。會唔會一開始個男人就冇心一齊，甚至個小朋友都只係意外嚟？咁Juicy媽咁睇喎，我哋又唔係福爾摩斯，都係唔好亂咁估喇，嘥氣。
講返公屋緊要定註冊緊要喇，有人又咁睇：梗係要層樓喇！樓跟自己一世，個人男人行唔行到過世又話唔埋喎。同埋都相處咗足足十年，點會無啦啦先醒起要結婚呀，根本結唔結都冇所謂喇。
不過我又唔認同喎，可能我老土喇，結婚係為組織一個家庭嘛，點會跳步跳到一齊住同生仔先諗返轉頭架。到時小朋友返學、或者另一半大吉利是入醫院，兩個人法律上都冇關係，應該點解釋呀？
講到呢度，可能有人話，都係土地問題嘅錯。如果上車嘅機會唔係咁渺茫，就唔會有呢個選擇題出現喇。成家立室，可能而家呢一個年代唔再係理所當然，真係好唏噓～
