2018-07-14

3K

【兩日一夜輕鬆小旅行】嘉湖夏逸AR體驗親親大自然

雖然小小豬都仲有半個月先開始放暑假,不過佢都已經開始大玩特玩,每一日唔去玩都唔安樂。咁...其實都已經係學期尾,平日又冇乜功課,去玩都係好正常事,始終小朋友就係需要去玩嘛!

今個週未佢就真係玩得超興奮,因為帶佢參加嘉湖海逸酒店為暑假推出嘅「嘉湖夏逸AR體驗親親大自然」,有玩水之餘又可以來一個AR大自然之旅添~


嚟住酒店就當然房間都係一個重要一環,所以我地CHECK-IN之後就即刻到房間望望兼休息一下。我地今次入住嘅房間係屬於DELUXE PARKVIEW(需另加 $250),整體上房間都OK幾舒服~

由房間望出去個VIEW都唔錯,景觀都好開揚,而且仲可以望到公園同游池添~

休息一陣,小小豬都已經急不及待要去玩,我地第一站就係去整BEAR BEAR銅鑼燒啦~

銅鑼燒其實我地間中都有係屋企整,不過次次都係我整俾兩位老細食,難得今次大會一早準備好晒所有份量,又有哥哥姐姐教,所以就全權交俾小小豬負責啦~

就係因為份量材料一早預備好,所以小小豬都係依指示一步步咁整,所以佢都話....原來都係好簡單~

終於嚟到最困難部分(就係煎),由於小小豬屬於七歲以上組別,所以可以自己煎(七歲以下小朋友依個部分就會由職員代為負責)。初時佢都真係冇乜信心,最後佢就要求姐姐要一路陪住整,就係咁佢嘅BEAR BEAR都煎得唔錯呀(其實......都係姐姐功勞...哈哈哈)~

煎好銅鑼燒就可以佈置個BEAR BEAR樣,之後塗埋CREAM同生果就完成啦~

小小豬個製成品都唔錯,起碼都見到係一個BEAR BEAR....哈哈哈~

整好晒就當然要即刻食左佢啦,其實味道都係其次,最重要係小小豬一手一腳去整,佢都不知幾有滿足感,不停讚好味添~

當然....小小豬一心嚟都係為左個玩4項酒店水上遊戲設施,包括水上滑梯、水上碰碰船、水槍大戰同城堡彈彈床(小朋友可以係5個遊戲中任選其4,每個戶外水上遊戲限時10分鐘),所以整完銅鑼燒之後就即刻跑上房間換泳衣,之後就開始佢嘅放電工程啦!論鐘意程度就一定係依個水上滑梯,小小豬話中間有少少波浪,所以超刺激,佢仲連玩左五六轉,真係辛苦晒各位哥哥嘅照顧了~

睇依隻豬仔笑得咁開心,就知佢有幾鐘意玩水啦...哈哈哈~


玩完滑梯就嚟水槍大戰,依一PART我地大人真係好危險,兩個仔係追住我地嚟射,為左我部相機著想,都係回避下安全啲,所以我地就遠觀佢地玩啦~

最後就嚟玩下碰碰船啦~

原本以為佢地玩完水就一定好攰,點知原來仲有大量精力(點解佢地精力咁旺盛),所以我地就再去玩AR遊戲啦!每位參加左依個套餐嘅小朋友都可以得到遊戲單張一份~

我地家長們就先下載有關程式~

之後就可以係酒店五個唔同地方,SCAN個場景就可以有小動物出嚟,唔好以為只係睇短片咁簡單,係片段中係會有小動物教我地學習保護大自然資訊呀~

睇晒五個AR,就可以回答同短片中有關問題~

回答晒問題就可以有一份小禮物啦~

玩左成日各位大小朋友終於都攰,所以我地就食自助晚餐,之後小朋友們就去玩一陣小朋友俱樂部就乖乖瞓覺覺豬啦。

瞓醒就當然食一個豐富早餐~

食飽飽就當然爭取時間繼續玩,所以我地就去左酒店泳池游過痛快。但原來依個酒店泳池係唔可以影相,所以我地就只好乖乖聽話,純享受玩水啦。
話咁快兩日一夜活動又完結,你問小小豬佢就一定係話鐘意(因為有得玩嘛)。但其實我自己都幾享受,簡簡單單咁HEA遊兩日充充電都係一見嘗心悅目嘅事嚟呀!

「嘉湖夏逸AR體驗親親大自然」套餐:
. 標準客房住宿一晚
. 紐約紐約國際美食自助早餐
. 親子AR體驗大自然之旅
. 神秘禮物(每位小童乙份)
. 戶外水上遊戲四項
. “Bear啤”鮮果銅鑼燒製作班(乙節)
. 免費使用室外游泳池、健身室、蒸氣浴、桑拿浴、小朋友俱樂部及戶外遊樂場

Website:https://www.harbour-plaza.com/resortcity/SpecialOffer-summer2018-tc.htm
Facebook:https://www.facebook.com/HarbourPlazaResortCityHK/ 

 

【編按:以上內容為作者之個人意見及立場】

相關文章

【牙醫話你知】如何處理牙斑?什麼是滲透式樹脂補牙?

【營養師話你知】不同脂肪對小朋友健康的影響

【跟住小編做媽咪】母乳媽媽唔易做 壓力大到幾乎抑鬱? 私心分享醫院級別奶泵!

【麻疹】6至12個月大嬰兒可提前接種疫苗 1個方法知抗體夠唔夠

緊貼新冠肺炎最新相關資訊