點解暑假會有過農曆年feel嘅？各位Daddy Mammy望住個銀包就明，係因為啲錢好似「倒水」咁啊，如果由考完試開始計到開學要歷時2個半月！一家人出個街簡單食個飯睇場戲，閒閒地都使過千，有網民就大呻「放暑假仲慘過過年關」，7月份用錢係平時嘅一倍！今次就同大家嚴選暑假4大「倒水」項目！
學習--興趣班+託管班
除咗平時恆常嘅學習同補習班之外，想佢地過得充實，都會搵其他新嘢學下，多咗好多暑期興趣班、暑假託管費等等，有家長計過，兩個仔嘅興趣班+託管班夾埋要過萬！
玩樂--樂園＋暑假重點展覽
放假輕鬆下，預咗要使好大舊錢嘅項目包括：主題樂園以及暑假兩大重點展覽書展加動漫展！書展動漫展買嘢比平時平少少啦，咁如果真係諗住買書，揀樣玩具畀小朋友，都係一次過買埋有著數！
開學用品--有啲錢真係唔慳得
準備收拾心情開學，未計買新書要幾千蚊，新書包、新校服、新鞋…起碼四位！但係又走唔甩，用足一年，有啲錢真係唔慳得，唔係就好似之前有網民分享買錯三手舊書（按此），盞成個暑假都過得唔開心。
電費--開冷氣都開到窮！
暑假期間真係電費單都唔係好敢睇，有家長話暑假電費比平時直頭會多Double！想使少啲啲留喺屋企休息下，電費就自然會多咗，特別係冷氣費，真係要同佢地約法三章，26度以上先畀開冷氣！
同場加映--慳錢大法
銀包使到就快乾塘，要諗諗計等小朋友又有得玩，唔好成日話悶！有咩又好玩又可以慳錢嘅玩意呢？有網民話整嘢食係好主意，因為買食物材料用有限錢，包下餃子、整下甜品，多咗阿仔阿女幫手做助手，好玩之餘買餸錢都慳返！
有部分家長經歷呢個半月嘅洗禮，使錢麻木到「一千幾百果啲已經無感覺」，不過好消息係，暑假已經過咗一半架喇！終點在望喇，好快捱過去啊各位爸爸媽媽！
